പത്തനാപുരം താലൂക്ക് ആശുപത്രിയുടെ നിര്‍മാണത്തെ വിമര്‍ശിച്ച ആരോഗ്യമന്ത്രി കെ. മുരളീധരനു മറുപടിയുമായി മുന്‍മന്ത്രി കെ.ബി.ഗണേഷ്‌കുമാര്‍. ലോകോത്തര നിലവാരമുള്ള ആശുപത്രി പത്തനാപുരത്ത് വരുന്നതില്‍ ആര്‍ക്കാണ് ഇത്ര ഭയം എന്ന് ഗണേഷ്‌കുമാര്‍ ചോദിച്ചു. ആശുപത്രിയുടെ നിര്‍മാണത്തിന്റെ ക്രെഡിറ്റ് സ്വന്തമാക്കാന്‍ ചിലര്‍ ശ്രമിക്കുകയാണെന്നും ഗണേഷ് കുറ്റപ്പെടുത്തി. സമൂഹമാധ്യമ കുറിപ്പിലൂടെയാണ് ഗണേഷിന്റെ പ്രതികരണം.

ഗണേഷ്‌കുമാറിന്റെ കുറിപ്പിന്റെ പൂര്‍ണരൂപം:

പത്തനാപുരത്ത് ഒരു രാജ്യാന്തര നിലവാരമുള്ള, അത്യാധുനിക സൗകര്യമുള്ള ഒരു താലൂക്കാശുപത്രി വേണമെന്ന എല്‍ഡിഎഫ് സര്‍ക്കാരിന്റെ ആഗ്രഹമാണ് അവസാനഘട്ടത്തിലേക്കു കടന്നുകൊണ്ടിരിക്കുന്നത്. അപ്പോഴാണ് ഇപ്പോഴത്തെ എംഎല്‍എയുടെ നേതൃത്വത്തില്‍ ആരോഗ്യമന്ത്രി മുരളീധരനെ പത്തനാപുരത്ത് കൊണ്ടുവന്ന് ഇത് ആശുപത്രി അല്ല വലിയൊരു ഹോട്ടല്‍ പോലെ ഉണ്ടെന്ന പരാമര്‍ശമൊക്കെ നടത്തിയിരിക്കുന്നത്. സാധാരണക്കാരും പാവപ്പെട്ടവരും പോകുന്ന ഒരു താലൂക്കാശുപത്രി, ആ ആശുപത്രിക്ക് പഞ്ചനക്ഷത്ര സൗകര്യം വേണമെന്ന് ആഗ്രഹിക്കുന്നതില്‍ എന്താണ് തെറ്റ്? മികച്ച ലോകോത്തര നിലവാരമുള്ള ആശുപത്രി പത്തനാപുരത്ത് വരുന്നതില്‍ ആര്‍ക്കാണ് ഇത്ര ഭയം?. ഓരോരോ മുടന്തന്‍ ന്യായങ്ങള്‍ പറഞ്ഞു ആശുപത്രി നിര്‍മാണം നീട്ടിക്കൊണ്ടുപോയി അവസാനം അതെല്ലാം ചിലരുടെ ക്രെഡിറ്റിലാക്കാനുള്ള ഗൂഢതന്ത്രമാണിത്. അല്ലാതെ വേറൊന്നുമല്ലാ.

പണി ഇതിനകം പൂര്‍ത്തീകരിച്ചിരിക്കുന്ന, തിരഞ്ഞെടുപ്പ് പെരുമാറ്റച്ചട്ടം വന്നതുകൊണ്ട് മാത്രം ഉദ്ഘാടനം നടത്താന്‍ കഴിയാത്ത പല പദ്ധതികളും സ്വന്തം ക്രെഡിറ്റിലാക്കാനുള്ള ഓട്ടത്തിലാണു ചിലര്‍. അതിനു ചെറിയൊരു ഉദാഹരണമാണ് ഇതിനകം പണിപൂര്‍ത്തീകരിച്ച കൊച്ചിക്കടവ് പാലം സര്‍ക്കാരിന്റെ നൂറുദിന പദ്ധതിയില്‍ ഉള്‍പ്പെടുത്തി വീണ്ടും പൂര്‍ത്തീകരിക്കുമെന്നു പറഞ്ഞു പത്രപ്രസ്താവന എല്ലാം കൊടുത്തിരിക്കുന്നത്. അതെല്ലാം പത്തനാപുരത്തെ ജനങ്ങള്‍ തിരിച്ചറിഞ്ഞതിലുള്ള ജാള്യത മറക്കാനാണ് കൊറോണ ഏതാ, നിപ്പ ഏതാ എന്നൊന്നും തിരിച്ചറിയാത്ത, ചൂടുണ്ടായാല്‍ കൊറോണ പോയിക്കൊള്ളും എന്നു പറയുന്ന ഒരു മന്ത്രിയെയും കൊണ്ടുവന്നു ആശുപത്രിയിലെ സന്ദര്‍ശന നാടകം. പുനലൂര്‍ താലൂക്കാശുപത്രിയില്‍ അത്യാസന്ന നിലയിലുള്ള രോഗികളുടെ ഉള്‍പ്പെടെ മുന്നിലൂടെ ഉച്ചത്തിലുള്ള മുദ്രാവാക്യങ്ങളുടെ അകമ്പടിയോടെ കൊടിയും പിടിച്ചു സന്ദര്‍ശനം നടത്തിയ ഒരു മന്ത്രിയുടെ അഭിപ്രായ പ്രകടനങ്ങളോട് ഇതില്‍ കൂടുതല്‍ ഒന്നും പറയാനില്ല.

കഴിഞ്ഞ ദിവസം പത്തനാപുരം താലൂക്ക് ആശുപത്രിയുടെ നിര്‍മാണ പുരോഗതി നേരിട്ടു വിലയിരുത്തിയ കെ. മുരളീധരന്‍, 'ഇത് ഹോട്ടലാക്കാനേ കൊള്ളൂ' എന്ന വിമര്‍ശനമാണ് ഉന്നയിച്ചത്. സിടി സ്‌കാനിങ്, എംആര്‍ഐ സ്‌കാനിങ് എന്നിവയ്ക്കാവശ്യമായ സൗകര്യങ്ങളില്ലാതെ ആശുപത്രി നിര്‍മിച്ചത് ശ്രദ്ധയില്‍പെട്ടപ്പോഴായിരുന്നു മന്ത്രിയുടെ വിമര്‍ശനം. നിര്‍മാണച്ചുമതലയുള്ള ഇന്‍കല്‍ ഉദ്യോഗസ്ഥര്‍ ഈ ആഴ്ച തിരുവനന്തപുരത്തെത്തി വിശദീകരിക്കണമെന്നും മന്ത്രി നിര്‍ദേശിച്ചു.