അങ്കമാലിയില് വന് സ്പിരിറ്റ് വേട്ടയില് പിടികൂടിയത് 1248 ലീറ്റര് സ്പിരിറ്റ്
വ്യാജമദ്യ നിര്മാണ കേന്ദ്രത്തില് നടത്തിയ പരിശോധനയില് 1,248 ലീറ്റര് സ്പിരിറ്റ് പിടികൂടി എക്സൈസ്. അങ്കമാലി കോതകുളങ്ങരയില് ദേശീയപാതയോരത്ത് സിമന്റ് ഹോളോബ്രിക്സ് നിര്മാണ കേന്ദ്രത്തിന്റെ മറവില് പ്രവര്ത്തിച്ചിരുന്ന വ്യാജമദ്യ ബോട്ട്ലിങ് യൂണിറ്റാണ് എക്സൈസ് സംഘം കണ്ടെത്തിയത്.
ഓണത്തോടനുബന്ധിച്ച് സംസ്ഥാനത്ത് വ്യാജമദ്യ വിപണനം തടയാന് എക്സൈസ് നടത്തുന്ന 'ഓപ്പറേഷന് തണ്ടറിന്റെ' ഭാഗമായി നടത്തിയ പരിശോധനയിലാണ് വന് വ്യാജമദ്യ നിര്മാണ കേന്ദ്രം കണ്ടെത്തിയത്. കര്ണാടകയില് നിന്ന് സ്പിരിറ്റ് എത്തിച്ച കൊല്ലം ചത്തന്നൂര് പി.ജെ. നിവാസില് രതീഷ്, പറവൂര് ചെറിയപള്ളംതുരുത്ത് കക്കനാട്ട് വീട്ടില് സന്തോഷ് എന്നിവരെ എക്സൈസ് അറസ്റ്റ് ചെയ്തു. പിക്കപ്പ് വാനില്നിന്ന് ഹോളോബ്രിക്സ് യൂണിറ്റിലേക്ക് സ്പിരിറ്റ് ക്യാനുകള് ഇറക്കുന്നതിനിടെയാണ് ഇരുവരും പിടിയിലായത്.
കര്ണാടകയിലെ ഹുബ്ബള്ളിയില് നിന്നാണ് ഇവര് സ്പിരിറ്റ് എത്തിച്ചതെന്ന് എക്സൈസ് വ്യക്തമാക്കി. വാഹനത്തില് തവിട് നിറച്ച ചാക്കുകള്ക്കടിയിലാണ് സ്പിരിറ്റ് ക്യാനുകള് ഒളിപ്പിച്ചിരുന്നത്. കൊടുങ്ങല്ലൂരില് അടുത്തിടെ നടന്ന സ്പിരിറ്റ് വേട്ടയുമായി ബന്ധപ്പെട്ട് ലഭിച്ച രഹസ്യ വിവരത്തിന്റെ അടിസ്ഥാനത്തില് അങ്കമാലിയില് നിരീക്ഷണം ശക്തമാക്കിയതാണ് സംഘം പിടിയിലാകുന്നതിലേക്ക് നയിച്ചത്.
അങ്കമാലി സ്വദേശിയായ ബൈജു എന്നയാളാണ് ഹോളോബ്രിക്സ് നിര്മാണ കേന്ദ്രം വാടകയ്ക്കെടുത്ത് നടത്തിയിരുന്നത്. ഇയാള് ഒളിവിലാണ്. ഹോളോബ്രിക്സ് കമ്പനിയോട് ചേര്ന്നുള്ള മുറിയില് മദ്യം നിറയ്ക്കുന്നതിനുള്ള ഉപകരണങ്ങള്, അളവുപാത്രങ്ങള്, വ്യാജ ലേബലുകള് പതിക്കാനായി തയാറാക്കിയ സ്റ്റിക്കര് പേപ്പറുകള്, കുപ്പികള്, അറുപതോളം അടപ്പുകള് എന്നിവയും എക്സൈസ് കണ്ടെടുത്തു. സ്പിരിറ്റില് വെള്ളവും നിറവും ചേര്ത്ത് പ്രാദേശിക ബാറുകളിലും കരിഞ്ചന്തയിലും ചില്ലറ വില്പന നടത്താനായിരുന്നു സംഘത്തിന്റെ പദ്ധതി.
അറസ്റ്റിലായ പ്രതികളെ കോടതി റിമാന്ഡ് ചെയ്തു. സ്ഥാപനത്തിലെ സിസിടിവി ദൃശ്യങ്ങള് എക്സൈസ് കണ്ടെടുത്തിട്ടുണ്ട്. സംഭവത്തിന് പിന്നില് ഉള്പ്പെട്ടിട്ടുള്ളവരെയും സ്ഥല ഉടമസ്ഥനെയും ഉടന് പിടികൂടുമെന്ന് എക്സൈസ് ഉദ്യോഗസ്ഥര് പറഞ്ഞു. എറണാകുളം ഡപ്യൂട്ടി എക്സൈസ് കമ്മിഷണര് പി.കെ.സതീഷിന്റെ നിര്ദേശപ്രകാരം അങ്കമാലി എക്സൈസ് ഇന്സ്പെക്ടര് എ.വിപിന്ദാസിന്റെ നേതൃത്വത്തിലായിരുന്നു പരിശോധന. അസിസ്റ്റന്റ് എക്സൈസ് ഇന്സ്പെക്ടര്മാരായ പത്മകുമാര്, പി.കെ.ബിജു, സുരേഷ് ബാബു, റെഞ്ചു എല്ദോ തോമസ്, വി.എസ്.ഷൈജു, പ്രിവന്റീവ് ഓഫിസര്മാരായ ഷിബു, രാജേഷ്, സിവില് എക്സൈസ് ഓഫിസര്മാരായ അജീഷ്, നൗഫല്, സല്മാനുല് ഫാരീസ്, സജീഷ് എന്നിവരും പരിശോധനയില് പങ്കെടുത്തു.
https://www.facebook.com/Malayalivartha
