ആനയെ തുരത്താന് വനംവകുപ്പ് നിര്മിച്ച ഒന്നര കിലോമീറ്റര് നീളമുള്ള കിടങ്ങ് ഇപ്പോള് ഭീഷണിയില്
മലമുകളില് ആനയെ തുരത്താന് വനാതിര്ത്തിയില് കിടങ്ങില് ഒന്നര കിലോമീറ്ററോളം ദൂരത്തില് മൂന്നാള് താഴ്ചയില് വെള്ളം. താഴ്വാരത്തുള്ള 40 കുടുംബങ്ങള് ഭീതിയിലാണ്. എരുമേലി പഞ്ചായത്തിലെ ഏഴാം വാര്ഡായ പാക്കാനം ഇഞ്ചക്കുഴിയിലാണ് ഇത്. കാട്ടാന ഉള്പ്പെടെ വന്യമൃഗങ്ങള് നാട്ടിലേക്ക് എത്തുന്നത് തടയാനാണു വാര്യാട്ട് കോളനി മുതല് ഇഞ്ചക്കുഴി വരെ കിടങ്ങ് കുഴിച്ചത്. ഗ്രാമപ്രദേശത്തിന് മുകളിലായി കുന്നിന്ചരിവിലുള്ള കിടങ്ങില് ലക്ഷക്കണക്കിന് ലീറ്റര് മഴവെള്ളമാണ് തടഞ്ഞത്. കഴിഞ്ഞ ദിവസം ശക്തമായ മഴയില് കിടങ്ങ് നിറഞ്ഞൊഴുകിയെന്നു മുന് പഞ്ചായത്തംഗം ജോമോന് വാഴപ്പനാടി പറഞ്ഞു. കിടങ്ങിലെ വെള്ളം വലിയ പൈപ്പുകള് സ്ഥാപിച്ച് പുറത്തേക്ക് ഒഴുക്കിയാലേ പരിഹാരമാകൂവെന്ന് നാട്ടുകാരനായ പുളിക്കല് ജോസ് പറഞ്ഞു.
എംഎല്എ ഉള്പ്പെടെയുള്ളവര് വിഷയത്തില് ഇടപെട്ടതോടെ വനം വകുപ്പ് ഉദ്യോഗസ്ഥര് എത്തി ഒരിഞ്ച് വലുപ്പമുള്ള പൈപ്പ് സ്ഥാപിച്ച് വെള്ളം താഴേക്ക് ഒഴുക്കിത്തുടങ്ങി. പൈപ്പിലൂടെ ഒഴുകുന്നതിനെക്കാള് ശക്തിയില് ഉറവവെള്ളം കിടങ്ങിലേക്ക് എത്തുന്നുണ്ടെന്നു നാട്ടുകാരനായ പാറയ്ക്കല് വിശ്വംഭരന് പറഞ്ഞു. കിടങ്ങ് നിര്മിക്കാന് പൊട്ടിച്ചുമാറ്റിയ കല്ലുകള് ഉള്പ്പെടെ മലയുടെ മുകളിലുണ്ട്. വെള്ളം കെട്ടിക്കിടക്കുന്ന കിടങ്ങ് പൊട്ടിയാല് വലിയ ദുരന്തമാകുമെന്നു നാട്ടുകാരനായ ചാലുപറമ്പില് രാജപ്പന് പറഞ്ഞു.
കിടങ്ങിനു 400 മീറ്റര് താഴെ താമസിക്കുന്ന കുന്നപ്പള്ളി ജോസഫും മറിയാമ്മയും ദിവസങ്ങളായി ബന്ധുവീട്ടിലാണ് കഴിയുന്നത്. വെള്ളം പൊട്ടി ഒഴുകിയാല് പ്രദേശത്തെ വീടുകള് ഉള്പ്പെടെ നശിക്കുമെന്നതിനാല് ശക്തമായ മഴ പെയ്യുന്ന സമയങ്ങളില് മറ്റുള്ളവരും സുരക്ഷിതസ്ഥലത്തേക്കു മാറേണ്ട സ്ഥിതിയാണ്.
https://www.facebook.com/Malayalivartha
