തമിഴ്‌നാട് സര്‍ക്കാരിന്റെ ബജറ്റ് പ്രഖ്യാപനത്തിനെതിരെ ശക്തമായ പ്രതിഷേധവുമായി കേരളം രംഗത്തെത്തി. മുല്ലപ്പെരിയാര്‍ അണക്കെട്ടിലെ ജലനിരപ്പ് ഉയര്‍ത്തുമെന്ന വിഷയത്തില്‍ തമിഴ്‌നാടിനെ ഔദ്യോഗികമായി പ്രതിഷേധം അറിയിക്കുമെന്നും ആവശ്യമായാല്‍ കോടതിയെ സമീപിക്കുന്നതടക്കമുള്ള നടപടികള്‍ പരിഗണിക്കുമെന്നും ജലവിഭവമന്ത്രി മോന്‍സ് ജോസഫ് വ്യക്തമാക്കി. ഒരു സാഹചര്യത്തിലും മുല്ലപ്പെരിയാറിലെ ജലനിരപ്പ് ഉയര്‍ത്താന്‍ അനുവദിക്കില്ലെന്നു മന്ത്രി പറഞ്ഞു. ഡാമിന്റെ സുരക്ഷയാണ് കേരളത്തിന്റെ പ്രധാന ആശങ്കയെന്നും 142 അടി എന്ന നിലപാടില്‍ മാറ്റമില്ലെന്നും മന്ത്രി പറഞ്ഞു. നിലവിലുള്ള കരാറുകളും െ്രെടബ്യൂണല്‍ വിധികളും കോടതി നിര്‍ദേശങ്ങളും അനുസരിച്ച് മുല്ലപ്പെരിയാറിലെ ജലനിരപ്പ് ഉയര്‍ത്തുമെന്നാണ് തമിഴ്‌നാട് ബജറ്റില്‍ പ്രഖ്യാപിച്ചത്. ഇക്കാര്യത്തില്‍ കേരളത്തിന്റെ വിയോജിപ്പ് തമിഴ്‌നാടിനെ അറിയിക്കുമെന്നും മന്ത്രി പറഞ്ഞു.

ജലവിഭവകുപ്പിലെ പ്രധാന ഉദ്യോഗസ്ഥരെ പങ്കെടുപ്പിച്ചുകൊണ്ടുള്ള ഉന്നതലയോഗം മോന്‍സ് ജോസഫിന്റെ അധ്യക്ഷതയില്‍ സര്‍ക്കാര്‍ അടിയന്തരമായി വിളിച്ചു ചേര്‍ത്തു നിലവിലെ സ്ഥിതിഗതികള്‍ വിലയിരുത്തുകയും ചെയ്തു. പ്രഖ്യാപനത്തിന്റെ പശ്ചാത്തലത്തില്‍ മുഖ്യമന്ത്രി വി.ഡി. സതീശനുമായി മോന്‍സ് ജോസഫ് കൂടിക്കാഴ്ച നടത്തി. സര്‍ക്കാര്‍ നിലപാട് ചര്‍ച്ച ചെയ്തു.

മുല്ലപ്പെരിയാര്‍ ഡാമിന്റെ കാര്യത്തില്‍ കേരളത്തിന്റെ നിലപാട് സുവ്യക്തമാണെന്ന് മന്ത്രി പറഞ്ഞു. ''മുല്ലപ്പെരിയാറില്‍ പുതിയ ഡാം നിര്‍മിക്കുക എന്നതാണ് അടിസ്ഥാന നിലപാട്. കേരള ജനതയുടെ സുരക്ഷ ഉറപ്പാക്കാനും തമിഴ്‌നാടിന് ആവശ്യമായ ജലം ലഭ്യമാക്കാനും കഴിയുന്ന വിധത്തില്‍ ഇരു സംസ്ഥാനങ്ങള്‍ക്കും സ്വീകാര്യമായ നിലപാടാണ് കേരളം മുന്നോട്ടു വച്ചത്. 2026 ഡിസംബര്‍ 31 ന് മുമ്പ് നിര്‍വഹിക്കേണ്ടതായ ഡാം സുരക്ഷാ പരിശോധന തമിഴ്‌നാട് ഇതുവരെ നടപ്പാക്കിയിട്ടില്ല. 131 വര്‍ഷത്തെ കാലപ്പഴക്കമുള്ള മുല്ലപ്പെരിയാര്‍ ഡാമിന്റെ സുരക്ഷയുമായി ബന്ധപ്പെട്ടുള്ള ആശങ്കകള്‍ ഗൗരവമായി നിലനില്‍ക്കുന്ന ഇന്നത്തെ സാഹചര്യത്തില്‍ സുപ്രീംകോടതി അനുവദിച്ചിരിക്കുന്ന 142 അടിയുടെ മുകളിലേക്ക് ജലനിരപ്പ് ഉയര്‍ത്താന്‍ ഇന്നത്തെ സാഹചര്യത്തില്‍ ആര്‍ക്കും അവകാശമില്ല. സുപ്രീംകോടതി നിര്‍ദ്ദേശിച്ചിരിക്കുന്ന അടിസ്ഥാന കാര്യങ്ങള്‍ പോലും പരിഗണിക്കാതെ ഏകപക്ഷീയമായി തമിഴ്‌നാട് നടത്തിയിട്ടുള്ള പ്രഖ്യാപനത്തോട് കേരളം പരിപൂര്‍ണ്ണമായും വിയോജിപ്പ് രേഖപ്പെടുത്തുന്നു'' – മന്ത്രി മോന്‍സ് ജോസഫ് വ്യക്തമാക്കി.