ഇനി മുതൽ ബിവറേജസിൽ ഒഴിഞ്ഞ മദ്യകുപ്പികൾ തിരികെ വാങ്ങില്ല. പദ്ധതി നിർത്തലാക്കിയെന്ന് ബിവറേജസ് കോർപറേഷൻ. വ്യാഴാഴ്ച മുതല്‍ പദ്ധതി പിന്‍വലിക്കാന്‍ തീരുമാനിച്ചതായി ബെവ്‌കോ അറിയിച്ചു. പ്ലാസ്റ്റിക് കുപ്പികള്‍ തിരിച്ചെടുക്കുന്നതായി കുടുംശ്രീ, ശുചിത്വമിഷന്‍ വഴി നിയോഗിച്ചിട്ടുള്ള ജീവനക്കാരെ 20 നുശേഷം പിന്‍വലിക്കാന്‍ കുടുംബശ്രീ മിഷനും ശുചിത്വ മിഷനും റീജിയണല്‍ മാനേജര്‍മാര്‍ ഔദ്യോഗിക അറിയിപ്പ് നല്‍കാനും നിര്‍ദേശിച്ചു.

എല്‍ഡിഎഫ് സര്‍ക്കാരിന്റെ കാലത്ത് 2025 സെപ്റ്റംബര്‍ 10 മുതലാണ് തിരുവനന്തപുരം, കണ്ണൂര്‍ എന്നിവിടങ്ങളിലെ തിരഞ്ഞെടുത്ത 10 വീതം ചില്ലറ വില്പനശാലകളിൽ പരീക്ഷണാടിസ്ഥാനത്തില്‍ പദ്ധതി നടപ്പാക്കിയത്. എന്നാല്‍ പ്രായോഗികമായ പല ബുദ്ധിമുട്ടുകളും നേരിടുന്നതായി ബോധ്യപ്പെട്ടതിന്റെ അടിസ്ഥാനത്തില്‍ പദ്ധതി അവസാനിപ്പിക്കുകയാണെന്ന് ബെവ്‌കോ അറിയിച്ചു.

ഒഴിഞ്ഞ പ്ലാസ്റ്റിക് മദ്യക്കുപ്പികള്‍ തിരിച്ചെടുത്ത് അധികമായി ഈടാക്കിയ 20 രൂപ തിരിച്ചു നല്‍കുന്ന പദ്ധതിയാണ് ബിവറേജസ് കോർപറേഷൻ അവസാനിപ്പിച്ചത്.

പദ്ധതിക്കു കീഴില്‍ ഇതിനകം വിറ്റഴിച്ച പ്ലാസ്റ്റിക് കുപ്പികള്‍ 20 വരെ ഉപഭോക്താക്കള്‍ക്കു തിരിച്ചേല്‍പ്പിക്കാം. അതിനുശേഷം ഒഴിഞ്ഞ മദ്യകുപ്പികള്‍ സ്വീകരിക്കുകയോ റീഫണ്ട് തുക നല്‍കുകയോ ചെയ്യില്ല. ഇക്കാര്യം ചൂണ്ടിക്കാട്ടി നോട്ടീസ് പ്രദര്‍ശിപ്പിക്കും.

മദ്യത്തിന്റെ എംആര്‍പിയേക്കാള്‍ 20 രൂപ അധികമായി വാങ്ങുന്നതിനെക്കുറിച്ച് ഉപയോക്താക്കള്‍ പരാതികള്‍ ഉന്നയിച്ചിട്ടുണ്ട്. കാലിയായ മദ്യക്കുപ്പികള്‍ യഥാസമയം ചില്ലറ വില്‍പനശാലകളില്‍നിന്നു നീക്കം ചെയ്യാത്തതിനാല്‍ മദ്യം സംഭരിക്കേണ്ട സ്ഥലത്തിന്റെ വലിയൊരു ഭാഗം ഇതിനായി നീക്കിവെക്കേണ്ട സാഹചര്യമുണ്ടായി.

ഓണം ഉള്‍പ്പെടെയുള്ള സമയത്ത് ആവശ്യത്തിനു സ്‌റ്റോക്ക് സംഭരിക്കുന്നതിന് ഇതു തടസമുണ്ടാക്കും. കൗണ്ടറിലെ തിരക്കിനിടയില്‍ കാലിയായ കുപ്പികള്‍ ശേഖരിക്കുന്നതും കൈകാര്യം ചെയ്യുന്നതും ചില്ലറ വില്‍പ്പനശാലകളിലെ ജീവനക്കാര്‍ക്ക് അമിതമായ ജോലിഭാരം ഉണ്ടാക്കുന്നുവെന്നും ബെവ്‌കോ വ്യക്തമാക്കുന്നു.