തിരുവനന്തപുരത്ത് കല്ലറയില്‍ പതിനാലുകാരന്‍ ആത്മഹത്യ ചെയ്ത സംഭവത്തില്‍ അയല്‍വാസിയായ പ്രതിയെ പൊലീസ് പിടികൂടി. അയല്‍വാസിയായ 58കാരനാണ് അറസ്റ്റിലായത്. കുട്ടിയെ ഇയാള്‍ പീഡിപ്പിച്ചതായി പൊലീസ് പറഞ്ഞു. പോക്‌സോ ചുമത്തിയാണ് അറസ്റ്റ്.

കഴിഞ്ഞ വെള്ളിയാഴ്ചയാണ് ഒന്‍പതാം ക്‌ളാസ് വിദ്യാര്‍ത്ഥി ആത്മഹത്യ ചെയ്തത്. കുട്ടിയെ വീടിന്റെ വരാന്തയില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു. സമീപവാസികളായ രണ്ടുപേര്‍ നല്‍കിയ മൊഴിയാണ് പ്രതിയുടെ അറസ്റ്റിലേക്കെത്തിച്ചത്.

കുട്ടിയെ ഉപദ്രവിക്കാനായി പ്രതി കൊണ്ടുപോകുന്നത് കണ്ടുവെന്നായിരുന്നു ഇവര്‍ മൊഴി നല്‍കിയത്. തുടര്‍ന്ന് പൊലീസ് നടത്തിയ ചോദ്യം ചെയ്യലിലാണ് പ്രതി കുറ്റം സമ്മതിച്ചത്. പീഡനത്തില്‍ മനംനൊന്താണ് കുട്ടി ആത്മഹത്യ ചെയ്തതെന്നാണ് പൊലീസിന്റെ നിഗമനം.