മാദ്ധ്യമപ്രവര്‍ത്തകന്‍ കെ എം ബഷീറിനെ വാഹനമിടിപ്പിച്ച് കൊലപ്പെടുത്തിയ കേസില്‍ പ്രതി കൃഷി വകുപ്പ് ഡയറക്ടര്‍ ശ്രീറാം വെങ്കിട്ടരാമനെതിരെ നിര്‍ണായക മൊഴിയുമായി സാക്ഷി. 2019 ഓഗസ്റ്റ് വെളുപ്പിന് മൂന്നിനാണ് ശ്രീറാം വെങ്കിട്ടരാമനും സുഹൃത്ത് വഫ ഫിറോസും സഞ്ചരിച്ചിരുന്ന കാര്‍ ഇടിച്ച് സിറാജ് പത്രത്തിന്റെ തിരുവനന്തപുരം ബ്യൂറോ ചീഫ് ആയിരുന്ന കെ എം ബഷീര്‍ മരിച്ചത്.

കേസിലെ അഞ്ചാം സാക്ഷിയും പിഡബ്ല്യുഡി ഓഫീസ് വാച്ച്മാനുമായ മിഥുന്‍ തോമസാണ് വെളിപ്പെടുത്തല്‍ നടത്തിയിരിക്കുന്നത്. അപകടം നടന്നതിന് പിന്നാലെ ശ്രീറാമിനെ കണ്ടപ്പോള്‍ കൈകളില്‍ രക്തം പുരണ്ടിരുന്നതായാണ് മിഥുന്‍ കോടതിയില്‍ മൊഴി നല്‍കിയത്.

അപകടം നടക്കുന്ന ദിവസം താനും സുഹൃത്ത് അനില്‍കുമാറുമാണ് ഓഫീസില്‍ ഡ്യൂട്ടിക്കുണ്ടായിരുന്നത്. കാര്‍ ഇടിക്കുന്നത് നേരിട്ട് കണ്ടില്ലെങ്കിലും വാഹനം അപകടത്തില്‍പ്പെട്ട് കിടക്കുന്നത് കണ്ടിരുന്നു. ആ സമയത്ത് ശ്രീറാമിനൊപ്പം ഒരു സ്ത്രീയുമുണ്ടായിരുന്നു. പിറ്റേന്ന് മാദ്ധ്യമങ്ങളിലൂടെയാണ് അപകടത്തിന്റെ വിവരങ്ങള്‍ അറിഞ്ഞത്. അപ്പോഴാണ് കൊല്ലപ്പെട്ടത് മാദ്ധ്യമപ്രവര്‍ത്തകന്‍ കെ എം ബഷീറാണെന്ന് അറിഞ്ഞതെന്നും മിഥുന്‍ കോടതിയില്‍ മൊഴി നല്‍കി. കേസില്‍ നാലാം സാക്ഷിയായ അനില്‍കുമാര്‍ നേരത്തെ മൊഴി നല്‍കിയിരുന്നു.
കേസിലെ ഏകപ്രതിയായ ശ്രീറാം വെങ്കിട്ടരാമനെതിരെ മനപൂര്‍വമല്ലാത്ത നരഹത്യ, തെളിവ് നശിപ്പിക്കല്‍ എന്നീ വകുപ്പുകളാണ് ചുമത്തിയിരിക്കുന്നത്.