പാലക്കാട്-കുളപ്പുള്ളി പാതയിൽ തൃക്കങ്ങോട്ട് ചൊവ്വാഴ്ച അർധരാത്രി നടന്ന വാഹനാപകടത്തിൽ മരിച്ച മനിശ്ശീരി പാന്തലിൽ അജയ് (31), സൗത്ത് പനമണ്ണ കയറാട്ട് വീട്ടിൽ വൈശാഖ് (30) മക്കളെ കൺ നിറയെ കാണാനാവാതെയാണ് യാത്രയായത്. കാറിലുണ്ടായിരുന്ന മറ്റ് മൂന്നു പേർ കണ്ണിയംപുറം സ്വദേശി നിധിൻ (30), പനമണ്ണ സ്വദേശി ശ്രീജിത്ത് (34), ചുനങ്ങാട് സ്വദേശി ഗോവിന്ദ് എന്നിവർക്കാണ് പരിക്ക്. ചൊവ്വാഴ്ച രാത്രി 12.30-നായിരുന്നു അപകടം. വാണിയംകുളം ഭാഗത്തുനിന്ന് അതിവേഗത്തിൽ വന്ന കാർ നിയന്ത്രണംവിട്ട് റോഡരികിലെ കലുങ്കിലും പിന്നീട് മരത്തിലും ഇടിച്ചാണ് നിന്നത്. കാർ പൂർണമായും തകർന്നുപോയി.

പരിക്ക് അതീവ ഗുരുതരമായതിനാൽ പനമണ്ണ സ്വദേശി ശ്രീജിത്തിനെ വിദ്ഗധചികിത്സയ്ക്കായി തൃശ്ശൂർ മെഡിക്കൽ കോളേജിലേക്കു മാറ്റി. മറ്റു രണ്ടുപേർ വാണിയംകുളം സ്വകാര്യ ആശുപത്രിയിൽ ചികിത്സയിലാണ്.

അതേസമയം മകളായ സാൻവി നിതാരയെ കൺനിറയെ കണ്ട് കൊതിതീർന്നില്ല. അപ്പോഴേക്കും കുടുംബത്തെ ദുഃഖത്തിലാഴ്ത്തി അജയ് വിടപറഞ്ഞു. ചൊവ്വാഴ്ച വൈകുന്നേരം വരെ കൂട്ടുകാർക്കൊപ്പം ചായയും കുടിച്ച് തമാശകൾ പറഞ്ഞ് അജയ് ഉണ്ടായിരുന്നു. തൃക്കങ്ങോട് രാത്രിയിലുണ്ടായ കാറപകടത്തിൽ മനിശ്ശീരി പാന്തലിൽ അജയ് (31) മരിച്ചത് കൂട്ടുകാരറിഞ്ഞത് ബുധനാഴ്ച പുലർച്ചെയാണ്.

വിദേശത്തായിരുന്ന അജയ് നാട്ടിലെത്തിയിട്ട് അഞ്ചുമാസമായി. മകൾ സാൻവി നിതാരയ്ക്കാകട്ടെ എട്ടുമാസമാണ് പ്രായം. കുട്ടിയെ കളിപ്പിച്ച് കൊഞ്ചിച്ച് കൊതിതീരും മുൻപാണ് വിയോഗം. വാണിയംകുളം സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഭാര്യ: ശാലിനി. അച്ഛൻ: രവീന്ദ്രൻ. അമ്മ: നിർമല. സഹോദരങ്ങൾ: അഖിൽ, നിഖിൽ.

അതുപോലെ ബെംഗളൂരുവിൽ നിന്ന് കൺമണിയുടെ 28 ചടങ്ങിനായി എത്തി. പക്ഷേ പങ്കെടുക്കാനാകാതെ മടക്കം, എന്നെന്നേക്കുമായി. പനമണ്ണ കയറാട്ട് വീട്ടിൽ വൈശാഖ് കെ. മേനോനാണ് ചൊവ്വാഴ്ചയുണ്ടായ അപകടത്തിൽ മരിച്ചത്. ഞായറാഴ്ച നടക്കേണ്ട കുട്ടിയുടെ 28 ചടങ്ങിനായി നാലു ദിവസം മുൻപാണ് വൈശാഖ് നാട്ടിൽ എത്തിയത്. ചടങ്ങിന് ബന്ധുക്കളെ ക്ഷണിച്ചിരുന്നു.ചൊവ്വാഴ്ച രാത്രിയിൽ തിരുവനന്തപുരത്ത് ചികിത്സയ്ക്കായി ട്രെയിനിൽ പോകാൻ അച്ഛൻ രാമദാസിനെയും അമ്മ റിട്ട. അധ്യാപിക ജ്യോതിയെയും ഒറ്റപ്പാലം റെയിൽവേ സ്റ്റേഷനിൽ കൊണ്ടുചെന്നാക്കിയിരുന്നു. ഇവരോട് യാത്രയും പറഞ്ഞാണ് ഒറ്റപ്പാലത്തുനിന്ന് മടങ്ങിയത്. ആ യാത്ര അവസാന യാത്രയായി..

ഭാര്യ. സവിത (സൗത്ത് ഇന്ത്യൻ ബാങ്ക്. പെരിന്തൽമണ്ണ)