നേപ്പാളിലെ മിന്നല്‍ പ്രളയത്തില്‍ കാണാതായവരില്‍ കൊല്ലം സ്വദേശിനിയും. ലണ്ടനില്‍ സ്ഥിരതാമസക്കാരിയായ പരവൂര്‍ കോങ്ങല്‍ സ്വദേശിനി സുനന്ദ മണിരാജനെയാണ് (63) കാണാതായത്. 27 വര്‍ഷമായി ലണ്ടനില്‍ സ്ഥിരതാമസമാണ് സുനന്ദയും കുടുംബവും. കൈലാസ യാത്രക്കായാണ് ഇവര്‍ നേപ്പാളിലേയ്ക്ക് പോയത്.

22ാം തീയതിയാണ് സുനന്ദ ഉള്‍പ്പെട്ട സംഘം ലണ്ടനില്‍ നിന്ന് യാത്ര പുറപ്പെട്ടത്. ആല്‍പൈന്‍ എക്കോ ട്രെക്ക് എന്ന കമ്പനിക്കൊപ്പമായിരുന്നു യാത്ര ചെയ്തിരുന്നത്. 25ന് ഉച്ചയ്ക്ക് മുമ്പാണ് സുനന്ദയുമായി കുടുംബത്തിന് അവസാനമായി വാട്‌സാപ്പിലൂടെ ബന്ധപ്പെടാന്‍ കഴിഞ്ഞത്. അതിര്‍ത്തി കടക്കാനായി കാത്തുനില്‍ക്കുകയാണെന്നായിരുന്നു കുടുംബത്തെ അറിയിച്ചത്. പിന്നീട് ഇവരെക്കുറിച്ച് വിവരമൊന്നും ലഭിച്ചിട്ടില്ല.

റേഞ്ച് പ്രശ്‌നം മൂലമാണ് സുനന്ദ ബന്ധപ്പെടാതിരുന്നതെന്നാണ് കുടുംബം കരുതിയത്. പിന്നീടായിരുന്നു ദുരന്തവാര്‍ത്ത അറിഞ്ഞത്. പാലം കടക്കാനായി നിന്നപ്പോള്‍ മിന്നല്‍ പ്രളയമുണ്ടായെന്നും സംഘത്തെ മുഴുവന്‍ കാണാതായെന്നുമാണ് ട്രാവല്‍ ഏജന്റ് അറിയിച്ചതെന്നും കുടുംബം പറയുന്നു. അവസാനമായി ലഭിച്ച വിവരമനുസരിച്ച് അതിര്‍ത്തിയിലെ റസുവഗാധി മേഖലയിലായിരുന്നു ഇവര്‍. നേപ്പാള്‍ അധികൃതരുടെ കാണാതായവരുടെ പട്ടികയിലും സുനന്ദയുടെ പേര് ഉള്‍പ്പെട്ടിട്ടുണ്ട്.

ഗോസൈന്‍കുണ്ഡ തീര്‍ത്ഥാടനത്തിനായി പോയ സുനന്ദ ഉള്‍പ്പെടെ 16 ഇസ്‌കോണ്‍ തീര്‍ത്ഥാടകരുമായുള്ള ബന്ധം നഷ്ടപ്പെട്ടതായി ഇസ്‌കോണും സാമൂഹ്യമാദ്ധ്യമങ്ങളിലൂടെ അറിയിച്ചിട്ടുണ്ട്. ബ്രിട്ടന്‍, ദക്ഷിണാഫ്രിക്ക, അയര്‍ലന്‍ഡ് എന്നിവിടങ്ങളില്‍ നിന്നുള്ളവരാണ് സംഘത്തിലുള്ളത്. സംഘത്തിലെ ഏക മലയാളിയാണ് സുനന്ദയെന്ന് കുടുംബം പറഞ്ഞു. ലണ്ടനിലെ എയര്‍പോര്‍ട്ടില്‍ സെക്യൂരിറ്റി ഓഫീസറായി ജോലി ചെയ്തിരുന്നയാളാണ് സുനന്ദ.