ബീമാപള്ളി ഉറൂസിന് ഇന്ന് കൊടിയേറും... രാവിലെ എട്ടിന് ബീമാപള്ളി അസിസ്റ്റന്റ് ഇമാം മാഹീൻ അബൂബക്കർ ഫൈസിയുടെ നേതൃത്വത്തിൽ പ്രാർഥനയ്‌ക്കുശേഷം ദർഗാഷെരീഫിൽ നിന്ന് ആരംഭിക്കുന്ന പട്ടണ പ്രദക്ഷിണത്തോടെയാണ് ചടങ്ങുകൾ ആരംഭിക്കുക, വിശ്വാസികള്‍ക്ക് യാത്രാസൗകര്യമൊരുക്കുന്നതിനായി കെ.എസ്.ആര്‍.ടി.സി വിപുലമായ സ്പെഷല്‍ സര്‍വീസുകള്‍ ആരംഭിച്ചു. തിരുവനന്തപുരത്ത് പ്രാദേശിക അവധി

പട്ടണപ്രദക്ഷിണം തിരികെ എത്തുന്നതോടെ ചീഫ് ഇമാം അൽഹാഫിള് കുമ്മനം നിസാമുദ്ദീൻ അസ്ഹരിയുടെ നേതൃത്വത്തിൽ പ്രത്യേക കൂട്ട പ്രാർഥന നടക്കുന്നതാണ്.

ദുബായിൽ നിന്ന്‌ എത്തിക്കുന്ന ഉറൂസ് പതാക ജമാഅത്ത് പ്രസിഡന്റ് എ എം ഇഖ്ബാൽ മിനാരത്തിൽ ഉയർത്തുന്നതോടെ 10 ദിവസം നീണ്ടുനിൽക്കുന്ന ഉറൂസിന് തുടക്കം കുറിക്കും. സെമിനാറുകൾ, മത പ്രഭാഷണങ്ങൾ എന്നിവ ഉണ്ടാകും. ഉറൂസിന് എത്തുന്നവർക്ക് എല്ലാവിധ സംവിധാനങ്ങളും ഒരുക്കിയിട്ടുണ്ടെന്ന്‌ സംഘാടകർ അറിയിച്ചു.

അതേസമയം ബീമാപള്ളി ഉറൂസിനും വെട്ടുകാട് പള്ളി പെരുന്നാളിനുമെത്തുന്ന വിശ്വാസികള്‍ക്ക് യാത്രാസൗകര്യമൊരുക്കുന്നതിനായി കെ.എസ്.ആര്‍.ടി.സി വിപുലമായ സ്പെഷല്‍ സര്‍വീസുകള്‍ ആരംഭിച്ചു. യാത്രക്കാരുടെ തിരക്ക് പരിഗണിച്ച് രണ്ട് തീര്‍ഥാടന കേന്ദ്രങ്ങളിലേക്കുമായി ആകെ 45 ബസുകളാണ് സര്‍വീസ് നടത്തുന്നത്. ഈ സര്‍വീസുകള്‍ ഏകോപിപ്പിക്കുന്നതിനും നിയന്ത്രിക്കുന്നതിനുമായി തിരുവനന്തപുരം സിറ്റി യൂണിറ്റ് ഓഫിസര്‍ക്ക് നോഡല്‍ ഓഫിസറുടെ ചുമതല നല്‍കിയിട്ടുണ്ട്.

ബീമാപള്ളി ഉറൂസുമായി ബന്ധപ്പെട്ട് ഇത്തവണ 20 ബസുകളാണ് കെ.എസ്.ആര്‍.ടി.സി ഉപയോഗിക്കുന്നത്. കഴിഞ്ഞ വര്‍ഷം 14 ബസുകളായിരുന്നു സര്‍വീസ് നടത്തിയിരുന്നത്. കിഴക്കേക്കോട്ടയില്‍ നിന്ന് ഇഞ്ചക്കല്‍, വള്ളക്കടവ് വഴിയും കിഴക്കേക്കോട്ടയില്‍ നിന്ന് ഇഞ്ചക്കല്‍, കല്ലുമൂട് വഴിയുമാണ് ബീമാപള്ളിയിലേക്ക് സര്‍വീസുകള്‍ ക്രമീകരിച്ചിരിക്കുന്നത്. യാത്രക്കാരുടെ ആവശ്യാനുസരണമാകും ബസുകള്‍ സര്‍വീസ് നടത്തുക. ഇതിനായി ബീമാപള്ളിയില്‍ ഒരു സ്റ്റേഷന്‍ മാസ്റ്റര്‍ ഓഫിസും പ്രവര്‍ത്തിക്കുന്നുണ്ട്.
അതേസമയം ബീമാപള്ളി ഉറൂസ് മഹോത്സവത്തോടനുബന്ധിച്ച് തിരുവനന്തപുരം നഗരസഭാ പരിധിയിലെ എല്ലാ വിദ്യാഭ്യാസ സ്ഥാപനങ്ങൾക്കും സർക്കാർ ഓഫീസുകൾക്കും ഇന്ന് പ്രാദേശിക അവധിയാണ്. മുൻകൂട്ടി നിശ്ചയിച്ച പൊതുപരീക്ഷകൾക്ക് ഈ അവധി ബാധകമല്ല.