കുറ്റിയാടിയില്‍ പ്രായപൂര്‍ത്തിയാകാത്ത കുട്ടിയെക്കുറിച്ച് സമൂഹമാധ്യമത്തിലെ വിഡിയോയിലൂടെ ലൈംഗികാരോപണം നടത്തിയ സംഭവത്തില്‍ യുവതി അറസ്റ്റില്‍. കോഴിക്കോട് കുറ്റിയാടി തൊട്ടില്‍പ്പാലം സ്വദേശി വടക്കേതില്‍ രമ്യ ഷിംജിത്താണ്(36) അറസ്റ്റിലായത്. കുട്ടിയുടെ മാതാവിനോടുളള വിരോധം കാരണം കുട്ടിക്കെതിരെ ലൈംഗിക അധിക്ഷേപം നടത്തിയതിനാണ് നിയമനടപടിയുടെ ഭാഗമായി ഇവരെ അറസ്റ്റ് ചെയ്തത്.

വടക്കര്‍ പറവൂര്‍ പൊലീസ് ആണ് പോക്‌സോ കേസും ഐടി ആക്റ്റിലെ വിവിധ വകുപ്പുകളും ചുമത്തി രമ്യ ഷിംജിത്തിന്റെ അറസ്റ്റ് രേഖപ്പെടുത്തിയത്. രമ്യ ഷിംജിത്തിന്റെ സുഹൃത്തിന്റെ മകള്‍ക്കെതിരെയാണ് അധിക്ഷേപം നടത്തിയത്. മുന്‍പ് സുഹൃത്തുക്കളായിരുന്ന ശേഷം പിണങ്ങിയതോടെ കുട്ടിക്കെതിരെ വ്യാജ ലൈംഗിക ആരോപണവുമായി രമ്യ വിഡിയോ പോസ്റ്റ് ചെയ്‌തെന്നാണ് കേസ്. നിരന്തരം വിഡിയോകള്‍ ഈ വിഷയത്തില്‍ വന്നതോടെയാണ് സുഹൃത്ത് കേസ് നല്‍കിയത്.

ഇന്ന് പുലര്‍ച്ചെ കണ്ണൂര്‍ ജില്ലയിലെ ഇരിട്ടിക്കടുത്തുള്ള ബന്ധുവീട്ടില്‍ നിന്നാണ് ഇവരെ കസ്റ്റഡിയിലെടുത്തത്. അറസ്റ്റിന് ആദ്യം വഴങ്ങിയില്ലെങ്കിലും ഒടുവില്‍ കോടതിയുടെ അറസ്റ്റ് വാറന്റ് പൊലീസ് കാണിച്ചതോടെയാണ് വഴങ്ങിയത്. പൊലീസ് കസ്റ്റഡിയില്‍ എടുക്കുമ്പോള്‍ ഉണ്ടായ ബഹളവും പിന്നീട് പൊലീസ് വാഹനത്തില്‍ കൊണ്ടുപോകുമ്പോള്‍ പൊലീസിനെ ഭീഷണിപ്പെടുത്തുന്നതും രമ്യ ഷിംജിത്ത് തന്നെ മൊബൈല്‍ ഫോണില്‍ റെക്കോര്‍ഡ് ചെയ്ത് ഇവരുടെ സമൂഹമാധ്യമ അക്കൗണ്ടില്‍ പോസ്റ്റ് ചെയ്തു. പൊലീസ് സംഘം വടക്കന്‍ പറവൂര്‍ സ്‌റ്റേഷനിലേക്കാണ് ഇവരെ കൊണ്ടു പോയത്.