മള്ട്ടിപ്ലക്സ് തിയറ്ററുകളിലെ അമിത വിലയില് നിയമനടപടികള് കടുപ്പിക്കാന് ഭക്ഷ്യവകുപ്പ്
സംസ്ഥാനത്തെ മള്ട്ടിപ്ലക്സ് തിയറ്ററുകളില് പോപ്കോണ് ഉള്പ്പെടെയുള്ള ഭക്ഷ്യവസ്തുക്കള്ക്കു അമിത വില ഈടാക്കുന്നതിനെതിരെ നിയമനടപടികള് കടുപ്പിക്കാന് ഭക്ഷ്യവകുപ്പ്. നിയമലംഘനങ്ങള്ക്കെതിരെ ഉപഭോക്തൃ കോടതികളില് കേസ് നല്കാന് ജില്ലാ സപ്ലൈ ഓഫിസര്മാര്ക്ക് അനുവാദം നല്കാനാണ് വകുപ്പിന്റെ തീരുമാനം. മന്ത്രി അനൂപ് ജേക്കബിന്റെ നിര്ദേശപ്രകാരം വിജ്ഞാപനം ഉടന് പുറപ്പെടുവിക്കാനുള്ള ഒരുക്കത്തിലാണു വകുപ്പ്. ഇതിനുള്ള കരട് ഉടന് വകുപ്പ് ഉദ്യോഗസ്ഥര് തയാറാക്കി മന്ത്രിക്കു കൈമാറും. മന്ത്രിയുടെ അനുമതിയോടെ അടുത്തു തന്നെ വിജ്ഞാപനം പുറപ്പെടുവിക്കുമെന്ന് ഉദ്യോഗസ്ഥര് അറിയിച്ചു.
വിജ്ഞാപനം പ്രാബല്യത്തില് വന്നാല് സര്ക്കാരിനു വേണ്ടി ജില്ലാ സപ്ലൈ ഓഫിസര്മാര്ക്ക് പരാതികള് സംബന്ധിച്ച് നേരിട്ട് ഉപഭോക്തൃ കോടതികളില് കേസ് നല്കാന് കഴിയും. അമിത വില ഈടാക്കുന്നതുമായി ബന്ധപ്പെട്ട് 9 പരാതികളാണ് നിലവില് തയാറായിട്ടുള്ളത്. ആദ്യപരാതി കൊച്ചിയിലെ ഉപഭോക്തൃ കോടതിയിലാവും നല്കുക. ഇതിനു പുറമേ വിലവിവര പട്ടിക പ്രദര്ശിപ്പിക്കാത്തതിനു എസന്ഷ്യല് കമ്മേറാഡിറ്റീസ് നിയമപ്രകാരവും കേസ് ഫയല് ചെയ്യും.
ലീഗല് മെട്രോളജി വകുപ്പ്, ഭക്ഷ്യസുരക്ഷാ വകുപ്പ് എന്നിവര് കഴിഞ്ഞ ദിവസങ്ങളില് നടത്തിയ പരിശോധനകളില് വലിയ തോതിലുള്ള ക്രമക്കേടുകളാണ് കണ്ടെത്തിയിരിക്കുന്നത്. തൂക്കക്കുറവ്, വിലവിവര പട്ടിക പ്രദര്ശിപ്പിക്കാതിരിക്കല് തുടങ്ങിയ ക്രമക്കേടുകള്ക്കായി 49 കേസുകളാണ് ഇതുവരെ എടുത്തിരിക്കുന്നത്.
https://www.facebook.com/Malayalivartha
