ഫറോക്ക് റെയില്‍വേ സ്‌റ്റേഷനില്‍ മാരക ലഹരിമരുന്നായ കൊക്കെയ്ന്‍ പിടികൂടിയ സംഭവത്തില്‍ മലയാളി ഡിജെയും വിദേശികളും അടക്കം 7 പേര്‍ കൊച്ചി നര്‍കോട്ടിക്‌സ് കണ്‍ട്രോള്‍ ബ്യൂറോയുടെ പിടിയില്‍. ഇതില്‍ മൂന്നു പേരെ യുഎഇയില്‍ മുന്‍പ് ലഹരിമരുന്നുമായി ബന്ധപ്പെട്ട കേസില്‍ ശിക്ഷിച്ച ശേഷം നാടുകടത്തപ്പെട്ടവരാണ്. 'ഓപ്പറേഷന്‍ ഡൊമിനോ'യുടെ ഭാഗമായി 16.55 ലക്ഷം രൂപ വിലവരുന്ന 33.10 ഗ്രാം കൊക്കെയ്ന്‍ പിടികൂടിയ കേസിലാണു തിരുവനന്തപുരം ശാസ്തമംഗലം സ്വദേശി ഡിജെ സിദ്ധാര്‍ഥ് ദാമോര്‍, കോഴിക്കോട് ബേപ്പൂര്‍ നോര്‍ത്ത് സ്വദേശി ഹംദാന്‍ അഹമ്മദ്, അരക്കിണര്‍ സ്വദേശി പി.അഫ്‌ലാഹ്, പഞ്ചാബ് കപൂര്‍ത്തല സ്വദേശി ഗുര്‍പ്രീത് സിങ്, തമിഴ്‌നാട് സ്വദേശി അരുണ്‍ രാജ്കുമാര്‍, നൈജീരിയക്കാരി സോണിയ എന്ന ചിസോബ ഹെലന്‍ ആന്തണി, സിംബാബ്‌വെ സ്വദേശി മുഫുകാരെ വിറ്റാലിസ് ടാഡിസ്വനാഷെ എന്നിവര്‍ അറസ്റ്റിലായത്.

ബെംഗളൂരുവില്‍ നിന്നു കേരളത്തിലെ വിവിധ പാര്‍ട്ടികള്‍ക്കും മറ്റും ലഹരിമരുന്നു എത്തിക്കുന്ന സംഘമാണിത്. ഗുര്‍പ്രീത് സിങ്, ഹംദാന്‍ അഹമ്മദ്, പി.അഫ്‌ലാഹ് എന്നിവരെ 8.12 ഗ്രാം കൊക്കെയ്‌നുമായി ഫറോക്ക് റെയില്‍വേ സ്‌റ്റേഷനില്‍ നിന്ന് ഈ മാസം പത്തിനാണ് അറസ്റ്റ് ചെയ്തത്. സംഘത്തില്‍ പെട്ട സിദ്ധാര്‍ഥ് ദമോറിനെ അന്നു തന്നെ തിരുവനന്തപുരത്തു നിന്നു കോഴിക്കോട്ടേക്കുള്ള യാത്രയ്ക്കിടെ അറസ്റ്റ് ചെയ്തു. ഊട്ടിയില്‍ ഒരു റിസോര്‍ട്ടിന്റെ ഉടമ കൂടിയായ സിദ്ധാര്‍ഥ് ദമോറിന്റെ നേതൃത്വത്തില്‍ കേരളത്തില്‍ പലയിടത്തും ഡിജെ പാര്‍ട്ടികള്‍ നടക്കാറുണ്ടെന്ന് എന്‍സിബി വൃത്തങ്ങള്‍ സൂചിപ്പിച്ചു. ഇയാളെ പിടികൂടിയതിനു പിന്നാലെയാണ് ലഹരിമരുന്നു സംഘത്തിലെ പ്രധാന കണ്ണിയും ബെംഗളൂരുവില്‍ ഐടി മേഖലയില്‍ ജോലി ചെയ്യുന്നയാളുമായ അരുണ്‍ രാജ്കുമാറിനെ അറസ്റ്റ് ചെയ്തത്.

വിദേശികളില്‍ നിന്നു കൊക്കെയ്ന്‍ വാങ്ങി ഏജന്റുമാര്‍ക്കും ഉപഭോക്താക്കള്‍ക്കും വിതരണം ചെയ്യുന്നത് അരുണ്‍ രാംകുമാറാണെന്ന് എന്‍സിബി അറിയിച്ചു. ഇരുവരില്‍ നിന്നും ലഭിച്ച വിവര പ്രകാരമാണു നൈജീരിയക്കാരിയായ സോണിയ എന്ന ചിസോബ ഹെലന്‍ ആന്തണിയെ 12 നും സിംബാബ്‌വെ സ്വദേശി മുഫുകാരെ വിറ്റാലിസ് ടാഡിസ്വനാഷെയെ 13 നും ബെംഗളൂരുവില്‍ നിന്ന് എന്‍സിബി അറസ്റ്റ് ചെയ്തത്. ഇവരില്‍ നിന്ന് 16 ഗ്രാം, 8.98 ഗ്രാം വീതം കൊക്കെയ്‌നും പിടികൂടി. അടിയന്തര മെഡിക്കല്‍ വീസയിലാണ് ചിസോബ പത്തു വര്‍ഷം മുന്‍പ് ഇന്ത്യയില്‍ എത്തിയത്. വിദ്യാര്‍ഥി വീസയിലാണ് മുഫുകാരെ ഇന്ത്യയില്‍ എത്തിയതെന്നും എന്‍സിബി വൃത്തങ്ങള്‍ സൂചിപ്പിച്ചു. പിടിയിലായ സിദ്ധാര്‍ഥ് ദാമോര്‍, ഹംദാന്‍ അഹമ്മദ്, പി.അഫ്‌ലാഹ് എന്നിവര്‍ മുന്‍പ് യുഎഇയില്‍ ലഹരിമരുന്നു കേസില്‍ ശിക്ഷിക്കപ്പെട്ടവരാണെന്നും ഇന്ത്യയിലേക്കു നാടുകടത്തിയ ശേഷം ഇവര്‍ കേസില്‍ പിടിയിലായ മറ്റുള്ളവരുമായി ബന്ധം പുതുക്കുകയായിരുന്നുവെന്നും എന്‍സിബി അറിയിച്ചു.