പെരുമ്പാവൂര്‍ എംഎല്‍എയുടെ പിഎ ആണെന്ന് പറഞ്ഞു പണം തട്ടാന്‍ ശ്രമിച്ച കേസില്‍ നിരവധി കേസുകളില്‍ പ്രതിയായ യുവാവ് പിടിയില്‍. കോട്ടപ്പടി ഇടയാത് വീട്ടില്‍ സുരേഷിനെയാണ് (42) പെരുമ്പാവൂര്‍ പൊലീസ് അറസ്റ്റ് ചെയ്തത്. കാഞ്ഞിരക്കാട് സ്വദേശി സജിത്തിന്റെ പരാതിയിലാണു നടപടി. ജൂലൈ 15 ന് സജിത്തിന്റെ ഫോണിലേക്ക് എംഎല്‍എയുടെ പിഎ ആണെന്നു പറഞ്ഞ് സുരേഷ് വിളിക്കുകയായിരുന്നു.

എംഎല്‍എയുടെ വീടിനടുത്തുള്ള ചേച്ചിക്ക് ഡയാലിസിസ് ചെയ്യുന്നതിനു പണം ആവശ്യമുണ്ടെന്നു പറയുകയും ഗൂഗിള്‍ പേ വഴി പണം അയയ്ക്കാന്‍ ആവശ്യപ്പെടുകയും ചെയ്തു. സംശയം തോന്നിയ സജിത്ത് പൊലീസില്‍ പരാതി നല്‍കുകയായിരുന്നു. പ്രതിക്ക് കാട്ടാക്കട, പെരുമ്പാവൂര്‍, കുറുപ്പംപടി, കോട്ടപ്പടി, കോടാട്, കോതമംഗലം എന്നിവിടങ്ങളിലായി നിരവധി കേസുകളുണ്ട്. കാട്ടാക്കടയില്‍ സമാനമായ കേസാണുള്ളത്.