ഏഷ്യന്‍ ഗെയിംസ് പുരുഷ ക്രിക്കറ്റ് ഫൈനലില്‍ പാകിസ്ഥാനെ 19 റണ്‍സിന് പരാജയപ്പെടുത്തി ഇന്ത്യ സ്വര്‍ണമെഡല്‍ നിലനിര്‍ത്തിയതിന് പിന്നാലെ ആഹഌദം പങ്കുവച്ച് മലയാളിതാരം സഞ്ജു സാംസണ്‍. സ്വര്‍ണം നേടാന്‍ ടീം ഏറെ കഷ്ടപ്പെട്ടുവെന്നും മത്സരശേഷം സഞ്ജു പറഞ്ഞു. തുടര്‍ച്ചയായ രണ്ടാം തവണയായിരുന്നു ഇന്ത്യ സ്വര്‍ണമെഡല്‍ സ്വന്തമാക്കിയത്.

കൊറോഗി സ്‌പോര്‍ട്‌സ് പാര്‍ക്കില്‍ നടന്ന ആവേശകരമായ പോരാട്ടത്തില്‍ ആദ്യം ബാറ്റ് ചെയ്ത ഇന്ത്യ 20 ഓവറില്‍ ആറ് വിക്കറ്റ് നഷ്ടത്തില്‍ 211 റണ്‍സായിരുന്നു നേടിയത്. മറുപടി ബാറ്റിംഗില്‍ പാകിസ്ഥാന് 20 ഓവറില്‍ ആറ് വിക്കറ്റ് നഷ്ടത്തില്‍ 192 റണ്‍സെടുക്കാനേ കഴിഞ്ഞുള്ളൂ. ടോസ് നേടിയ ഇന്ത്യ ബാറ്റിംഗ് തിരഞ്ഞെടുക്കുകയായിരുന്നു.

20 പന്തില്‍ നിന്ന് ഓപ്പണര്‍ അഭിഷേക് ശര്‍മ നേടിയ തകര്‍പ്പന്‍ അര്‍ദ്ധസെഞ്ച്വറി ഇന്ത്യയ്ക്ക് മികച്ച തുടക്കമാണ് നല്‍കിയത്. 28 പന്തില്‍ 61 റണ്‍സ് നേടിയാണ് അഭിഷേക് പുറത്തായത്. തുടര്‍ന്ന് തിലക് വര്‍മയുടെ വെടിക്കെട്ട് ബാറ്റിംഗിലൂടെ ഇന്ത്യ 200 കടന്നു. 22 പന്തില്‍ പുറത്താകാതെ 51 റണ്‍സാണ് തിലക് നേടിയത്. ശിവം ദുബെ 14 പന്തില്‍ നിന്നും 27 റണ്‍സും നേടി. മൂന്നാം നമ്പറില്‍ ബാറ്റിംഗിനിറങ്ങിയ സഞ്ജുവിന് കാര്യമായ സംഭാവന നല്‍കാനായില്ല. നാലു പന്തില്‍ രണ്ട് റണ്‍സ് മാത്രമെടുത്ത സഞ്ജു അഹമ്മദ് ദാനിയാലിന്റെ പന്തില്‍ പുറത്താവുകയായിരുന്നു.

'ഒരുപാട് സന്തോഷമുണ്ട്. ഞങ്ങള്‍ രണ്ട് മത്സരങ്ങള്‍ മാത്രമാണ് കളിച്ചത്, എന്നാല്‍ രണ്ടിന്റെയും സാഹചര്യങ്ങള്‍ വ്യത്യസ്തമായിരുന്നുവെന്ന് സഞ്ജു സാംസണ്‍ പറഞ്ഞു. ഫൈനല്‍ മത്സരം വളരെ കടുത്തതായിരുന്നു. എതിരാളികള്‍ മികച്ച രീതിയില്‍ കളിച്ചു. സ്വര്‍ണം നേടാന്‍ ഞങ്ങള്‍ക്ക് കഠിനാധ്വാനം ചെയ്യേണ്ടിവന്നു. അവസാനം വരെ ഫലം പ്രവചിക്കാന്‍ കഴിയാത്ത മത്സരമായിരുന്നു. ജയവും തോല്‍വിയും ഏത് ടീമിനും സംഭവിക്കാം. അവരും നന്നായി കളിക്കാനാണ് ഇവിടെ എത്തിയത്. വിക്കറ്റ് ബാറ്റിംഗിന് അനുകൂലമായിരുന്നു, ഏകദേശം 400 റണ്‍സാണ് മത്സരത്തില്‍ പിറന്നത്. മത്സരം ഇങ്ങനെ മാറുമെന്ന് ഞങ്ങള്‍ പ്രതീക്ഷിച്ചിരുന്നില്ല. എന്നാല്‍ ഞങ്ങളുടെ ബൗളര്‍മാര്‍ വളരെ നന്നായി പന്തെറിഞ്ഞു.

നിലവില്‍ എനിക്ക് വലിയ ലക്ഷ്യങ്ങളൊന്നുമില്ല. ഇതുവരെ എത്താന്‍ കഴിഞ്ഞതില്‍ ഞാന്‍ സന്തുഷ്ടനാണ്. സന്തോഷത്തോടെയാണ് നാട്ടിലേക്ക് മടങ്ങുന്നത്. ജപ്പാനിലേക്കുള്ള എന്റെ ആദ്യ സന്ദര്‍ശനമാണിത്. വളരെ നല്ല രാജ്യമാണ് ജപ്പാന്‍. ഇവിടെയുള്ള ആളുകളും വളരെ നല്ലവരാണ്. ഇവിടത്തെ സംവിധാനങ്ങളും മികച്ചതാണ്. ഇവിടെ ഞങ്ങള്‍ ഒരുപാട് ആസ്വദിച്ചു. ജപ്പാനില്‍ ക്രിക്കറ്റിന് നല്ല സാധ്യതയുണ്ടെന്നാണ് എനിക്ക് തോന്നുന്നത്. കുറച്ചുകൂടി സൗകര്യങ്ങളും ക്രിക്കറ്റ് പരിശീലനത്തിനുള്ള സംവിധാനങ്ങളും ഒരുക്കാനായാല്‍ ഇവിടെ ക്രിക്കറ്റിന് വളരാന്‍ കഴിയും.' സഞ്ജു കൂട്ടിച്ചേര്‍ത്തു.