മാവേലിക്കരയിലെ ആദിമൂലം വെട്ടിക്കോട്ട് നാഗരാജസ്വാമി ക്ഷേത്രത്തിലെ പ്രശസ്തമായ ആയില്യം മഹോത്സവത്തോടനുബന്ധിച്ച് ചൊവ്വാഴ്ച മാവേലിക്കര താലൂക്കിന് പുറമേ കായംകുളം മണ്ഡലത്തിലെ വിവിധ പ്രദേശങ്ങള്‍ക്കും പ്രാദേശിക അവധി പ്രഖ്യാപിച്ചു. പൊതു പരീക്ഷകള്‍ മുന്‍ നിശ്ചയ പ്രകാരം നടത്തും. സഹകരണഎക്‌സൈസ് മന്ത്രി എം. ലിജുവിന്റെ ഇടപെടലിനെത്തുടര്‍ന്നാണ് കായംകുളം നിയമസഭാ മണ്ഡലത്തില്‍പ്പെടുന്ന കാര്‍ത്തികപ്പള്ളി താലൂക്കിലെ വിവിധ പ്രദേശങ്ങള്‍ക്ക് കൂടി അവധി അനുവദിച്ചത്.

കായംകുളം നഗരസഭ, കൃഷ്ണപുരം, പത്തിയൂര്‍, കണ്ടല്ലൂര്‍, ദേവികുളങ്ങര എന്നീ പഞ്ചായത്തുകളിലെ സര്‍ക്കാര്‍ ഓഫീസുകള്‍ക്കും വിദ്യാഭ്യാസ സ്ഥാപനങ്ങള്‍ക്കുമാണ് 6ന് അവധി പ്രഖ്യാപിച്ചിട്ടുള്ളത്. അവധി വേണമെന്ന ജനങ്ങളുടെ ആവശ്യം കണക്കിലെടുത്താണ് കായംകുളം എം.എല്‍.എ കൂടിയായ മന്ത്രി എം ലിജു വിഷയത്തില്‍ ഇടപെട്ടത്. തുടര്‍ന്നാണ് മുഖ്യമന്ത്രി അവധി അവശ്യം പരിഗണിക്കുകയും പൊതുഭരണ വകുപ്പ് പ്രിന്‍സിപ്പല്‍ സെക്രട്ടറി ഉത്തരവിറക്കുകയും ചെയ്തത്. കന്നിമാസത്തിലെ ആയില്യം നക്ഷത്രത്തിലാണ് ക്ഷേത്രത്തിലെ പ്രധാന ഉത്സവം. നാടിന്റെ നാനാഭാഗത്തുനിന്ന് ആയിരങ്ങളാണ് നാഗരാജ പ്രീതിക്കായി ആയില്യദിവസം ഇവിടെ എത്തിച്ചേരുന്നത്.