കോക്രോച്ച് ജനതാ പാര്‍ട്ടിക്കെതിരെ മനുഷ്യാവകാശ കമ്മീഷന്‍ കേസെടുത്തു
കോക്രോച്ച് ജനതാ പാര്‍ട്ടി (സിജെപി) സംഘടിപ്പിച്ച പ്രതിഷേധ പ്രകടനത്തില്‍ പ്രായപൂര്‍ത്തിയാകാത്ത കുട്ടികളെ പങ്കെടുപ്പിച്ച സംഭവത്തില്‍ ദേശീയ മനുഷ്യാവകാശ കമ്മീഷന്‍ (എന്‍എച്ച്ആര്‍സി) സ്വമേധയാ കേസെടുത്തു. മുംബൈ ശിവാജി പാര്‍ക്കില്‍ നടന്ന സംഭവത്തില്‍ അടിയന്തരമായി അന്വേഷണം നടത്തി ഒരാഴ്ചക്കകം മറുപടി നല്‍കാന്‍ കമ്മീഷന്‍ വിവിധ ഔദ്യോഗിക സ്ഥാപനങ്ങള്‍ക്ക് നോട്ടീസ് അയച്ചിട്ടുണ്ട്.
മുംബൈ പോലീസ് കമീഷണര്‍, കേന്ദ്ര ഇലക്ട്രോണിക്‌സ് ആന്‍ഡ് ഇന്‍ഫര്‍മേഷന്‍ ടെക്‌നോളജി മന്ത്രാലയം, എക്‌സ് (ട്വിറ്റര്‍), മഹാരാഷ്ട്ര വനിതാ ശിശുവികസന വകുപ്പ് എന്നിവര്‍ക്കാണ് മനുഷ്യാവകാശ കമീഷന്‍ നോട്ടീസ് നല്‍കിയിരിക്കുന്നത്. ഇതില്‍ സി ജെ പി സംഘാടകരുടെ പങ്കിനെക്കുറിച്ച് വിശദമായ അന്വേഷണം നടത്താന്‍ മുംബൈ പൊലീസിനോട് കമീഷന്‍ ആവശ്യപ്പെട്ടിട്ടുണ്ട്. പൊലീസിന്റെ ഭാഗത്തുനിന്നുള്ള നിയമപരമായ ഇടപെടലുകളും നടപടികളും തടയുന്നതിന് വേണ്ടി കുട്ടികളെ സമരത്തിന്റെ മുന്‍നിരയില്‍ മനഃപൂര്‍വ്വം നിര്‍ത്തിയതാണോ എന്ന് പരിശോധിക്കാന്‍ കമീഷന്‍ ശുപാര്‍ശ ചെയ്തു.
സംഭവത്തില്‍ ജുവനൈല്‍ ജസ്റ്റിസ് ആക്ട് ഉള്‍പ്പെടെയുള്ള കുട്ടികളുടെ സംരക്ഷണ നിയമങ്ങള്‍ ലംഘിക്കപ്പെട്ടിട്ടുണ്ടോ എന്ന് പരിശോധിക്കാന്‍ ബന്ധപ്പെട്ട അധികാരികള്‍ക്ക് നിര്‍ദ്ദേശം നല്‍കിയിട്ടുണ്ട്. സമരം നടന്ന സമയത്ത് കുട്ടികളുടെ ചിത്രങ്ങളും വീഡിയോകളും സോഷ്യല്‍ മീഡിയയില്‍ പ്രചരിപ്പിച്ചതുമായി ബന്ധപ്പെട്ട ഡിജിറ്റല്‍ തെളിവുകള്‍ കൃത്യമായി സൂക്ഷിച്ചുവെക്കാന്‍ എക്‌സിനോട് കമീഷന്‍ ആവശ്യപ്പെട്ടിട്ടുണ്ട്. കുട്ടികളുടെ സ്വകാര്യതയെയും സുരക്ഷയെയും ബാധിക്കുന്ന തരത്തിലുള്ള ചിത്രങ്ങള്‍ പിന്നീട് ദുരുപയോഗം ചെയ്യാന്‍ സാധ്യതയുള്ളതിനാലാണ് ഈ നീക്കം.
https://www.facebook.com/Malayalivartha
