ദുബായിയില്‍ നിന്ന് ടെല്‍ അവീവിലേക്ക് പോകുകായിരുന്ന ഫ്‌ലൈദുബായ് വിമാനത്തിലെ സഹപൈലറ്റിന്റെ ആക്രമണത്തില്‍ ക്യാപ്റ്റന്‍ സ്മിത് മച്ഛറിന്റെ തലയോട്ടിക്ക് സംഭവിച്ചത് ഗുരുതരപരിക്കെന്ന് റിപ്പോര്‍ട്ട്. വിമാനം അപകടത്തില്‍പ്പെടുത്താനുള്ള സഹപൈലറ്റായ ഹമാം അല്‍ഹമ്മാമിയുടെ ശ്രമത്തെയാണ് ഇന്ത്യക്കാരനായ ക്യാപ്റ്റന്‍ സ്മിത്ത് മച്ഛര്‍ ചെറുത്തുതോല്‍പിച്ചത്.

കോക്പിറ്റിനുള്ളില്‍ സഹപൈലറ്റിന്റെ കുത്തേറ്റുവീണെങ്കിലും ജീവനക്കാരും യാത്രക്കാരും ഓടിയെത്തി അക്രമിയെ കീഴടക്കി. വിമാനം നിയന്ത്രണത്തിലാക്കാനും അവര്‍ സഹായിച്ചു. തുടര്‍ന്ന് ഓഫ് ഡ്യൂട്ടിയിലുണ്ടായിരുന്ന രണ്ട് പൈലറ്റുമാര്‍ ചേര്‍ന്ന് സൗദി അറേബ്യയിലെ അന്താരാഷ്ട്ര വിമാനത്താവളത്തില്‍ വിമാനം അടിയന്തര ലാന്‍ഡിംഗ് നടത്തി. ഉടന്‍തന്നെ മെഡിക്കല്‍ സംഘമെത്തി ക്യാപ്റ്റനെ ആശുപത്രിയിലേക്ക് മാറ്റുകയും ചെയ്തു.

സഹപൈലറ്റിന്റെ ക്രാഷ് ആക്‌സ് ഉപയോഗിച്ചുള്ള ആക്രമണത്തില്‍ സ്മിതിന്റെ തലയോട്ടിക്ക് പൊട്ടലുണ്ടായിട്ടുണ്ടെന്നാണ് വിവരം. റിപ്പോര്‍ട്ടുകള്‍ പ്രകാരം 'ഡിപ്രസ്ഡ് സ്‌കള്‍ ഫ്രാക്ച്ചര്‍' എന്നറിയപ്പെടുന്ന പരിക്കാണ് സ്മിത്തിന് സംഭവിച്ചത്. തലയോട്ടിയിലെ അസ്ഥിയുടെ ഒരു ഭാഗം അകത്തേക്ക് തള്ളിപ്പോകുന്ന തരത്തിലുള്ള പൊട്ടല്ലാണിത്. സൗദിയില്‍ ഇതിനായുള്ള അടിയന്തര ചികിത്സകള്‍ നല്‍കിയശേഷമാണ് അദ്ദേഹത്തെ യുഎഇയിലേക്ക് മാറ്റിയത്.

തലയോട്ടിയിലെ അസ്ഥി പൊട്ടി അതിന്റെ ഒരു ഭാഗം തലച്ചോറിന് നേരെ അകത്തേയ്ക്ക് നീങ്ങുന്നതാണ് ഡിപ്രസ്ഡ് സ്‌കള്‍ ഫ്രാക്ച്ചര്‍. അസ്ഥിയുടെ ഈ ഭാഗം തലച്ചോറില്‍ സമ്മര്‍ദം ചെലുത്തുകയോ തലച്ചോറിന് പരിക്കേല്‍പ്പിക്കുകയോ ചെയ്യും എന്നതിനാല്‍ അടിയന്തരചികിത്സ നല്‍കേണ്ടത് അത്യാവശ്യമാണ്. സഹപൈലറ്റിന്റ ആക്രമണത്തില്‍ സ്മിത്തിന്റെ കൈകാലുകള്‍, നെഞ്ച്, വയറിന്റെ മുകള്‍ഭാഗം എന്നിവിടങ്ങളിലും പരിക്കേറ്റിട്ടുണ്ട്. അദ്ദേഹം സുഖംപ്രാപിച്ചുവരുന്നതായാണ് റിപ്പോര്‍ട്ട്.