കേരള പിഎസ്‌സിയെ അട്ടിമറിക്കാന്‍ ബിജെപി ഗവര്‍ണറെ കരുവാക്കുന്നുവെന്ന് എം വി ഗോവിന്ദന്‍
ഇത്രയും മികച്ച രീതിയില്‍ പ്രവര്‍ത്തിക്കുന്ന ഒരു ഭരണഘടനാ സ്ഥാപനത്തെ അട്ടിമറിക്കാന്‍ ബിജെപി ഗവര്‍ണറെ കരുവാക്കുകയാണെന്ന് ആരോപിച്ച് സിപിഎം സംസ്ഥാന സെക്രട്ടറി എം വി ഗോവിന്ദന്‍. ഭരണഘടനയുടെ ആര്‍ട്ടിക്കില്‍ 316 അനുസരിച്ച് നിയമിക്കപ്പെട്ട പിഎസ്‌സി ചെയര്‍മാനെയും അംഗങ്ങളെയും പുറത്താക്കാന്‍ ഗവര്‍ണര്‍ രാഷ്ട്രപതിക്ക് ശുപാര്‍ശ ചെയ്തത് തികച്ചും ജനാധിപത്യവിരുദ്ധവും ഭരണഘടനാ വിരുദ്ധവുമാണെന്ന് അദ്ദേഹം വിമര്‍ശിച്ചു. വാര്‍ത്താസമ്മേളനത്തിലാണ് അദ്ദേഹത്തിന്റെ വിമര്‍ശനം.
ഭരണഘടനയുടെ ആര്‍ട്ടിക്കിള്‍ 317 അനുസരിച്ച് പിഎസ്‌സി അംഗങ്ങളുടെ ഭാഗത്തുനിന്ന് എന്തെങ്കിലും തരത്തിലുള്ള തെറ്റുകുറ്റങ്ങള്‍ ഉണ്ടായിട്ടുണ്ടെങ്കില്‍ അത് പരിശോധിക്കേണ്ടത് സുപ്രീംകോടതിയാണ്. സുപ്രീംകോടതിയുടെ നിര്‍ദേശം അനുസരിച്ച് മാത്രമെ സംസ്ഥാന ഗവര്‍ണര്‍ക്കും സര്‍ക്കാരിനും രാഷ്ട്രപതിക്ക് ശുപാര്‍ശ നല്‍കാന്‍ അവകാശമുള്ളുവെന്നും അദ്ദേഹം പറഞ്ഞു.
കേരളത്തിലെ പിഎസ്‌സി ഇന്ത്യയില്‍ തന്നെ ഏറ്റവും കൂടുതല്‍ സര്‍ക്കാര്‍ ജോലി നല്‍കിയതില്‍ മുന്നിലാണ്. കേരള പിഎസ്‌സിക്കെതിരെ സുപ്രീംകോടതിയുടെ യാതൊരുവിധ പരാമര്‍ശങ്ങളോ കേസുകളോ നിലവിലില്ലെന്നിരിക്കെയാണ് ഗവര്‍ണറുടെ ഈ അസാധാരണ നീക്കമെന്നും എം വി ഗോവിന്ദന്‍ ചൂണ്ടിക്കാട്ടി. ഇത്രയും മികച്ച രീതിയില്‍ പ്രവര്‍ത്തിക്കുന്ന ഒരു ഭരണഘടനാ സ്ഥാപനത്തെ തകര്‍ക്കാനാണ് ഗവര്‍ണറെ കരുവാക്കി ബിജെപി ശ്രമിക്കുന്നതെന്നും അദ്ദേഹം ആരോപിച്ചു.
ഗവര്‍ണര്‍ക്ക് അനുകൂലമായ നിലപാടാണ് ഇക്കാര്യത്തില്‍ മുഖ്യമന്ത്രി വിഡി സതീശന്‍ സ്വീകരിച്ചത്. ഗവര്‍ണറുടെ ഈ ഭരണഘടനാ വിരുദ്ധ തീരുമാനത്തെ മുഖ്യമന്ത്രിയും യുഡിഎഫും പിന്തുണയ്ക്കുന്നുണ്ടോയെന്ന് വ്യക്തമാക്കണമെന്നും ഗോവിന്ദന്‍ ആവശ്യപ്പെട്ടു. ഇനി അങ്ങനെയല്ല ഗവര്‍ണറുടെ നടപടിക്ക് എതിരാണെങ്കില്‍ മുഖ്യമന്ത്രി അതും വ്യക്തമാക്കണമെന്ന് അദ്ദേഹം കൂട്ടിച്ചേര്‍ത്തു.
https://www.facebook.com/Malayalivartha
