മണ്ഡലകാലത്ത് തീർഥാടകരെ വരവേൽക്കാനുള്ള ഒരുക്കങ്ങളിലാണ് ശബരിമല. ദർശനത്തിനുള്ള വെർച്വൽ ക്യൂ ബുക്കിങ് ആരംഭിച്ചു. ശബരിമല മണ്ഡലകാല തീർഥാടനത്തിന് ഒരുക്കങ്ങൾ സജീവമാകുമ്പോൾ അയ്യപ്പഭക്തർക്ക് യാത്രയും ദർശനവും കൂടുതൽ സുഗമവും സുരക്ഷിതവുമാക്കാൻ പ്രത്യേക വെബിനാർ സംഘടിപ്പിക്കുന്നു. 'മനസ്സൊരുക്കാം മലയാത്രയ്ക്ക്' എന്ന പേരിൽ സംഘടിപ്പിക്കുന്ന വെബിനാർ നവംബർ 4 ബുധനാഴ്ച വൈകിട്ട് ആറിനാണ് നടക്കുന്നത്. മണ്ഡലകാലത്ത് ശബരിമലയിലേക്ക് പോകാൻ തയ്യാറെടുക്കുന്ന ഭക്തർക്ക് ഏറെ പ്രയോജനപ്പെടുന്ന വിവരങ്ങൾ ഇതിലൂടെ ലഭ്യമാകും.

ശബരിമല പൊലീസ് ചീഫ് കോഓർഡിനേറ്ററും എഡിജിപിയുമായ പി. വിജയനാണ് വെബിനാറിൽ പങ്കെടുക്കുന്നത്. തീർഥാടനവുമായി ബന്ധപ്പെട്ട സുരക്ഷാ ക്രമീകരണങ്ങൾ, യാത്രയ്ക്കിടയിൽ ഭക്തർ ശ്രദ്ധിക്കേണ്ട കാര്യങ്ങൾ, ദർശനം സുഗമമാക്കുന്നതിനുള്ള സംവിധാനങ്ങൾ തുടങ്ങി തീർഥാടകർക്ക് അറിയേണ്ട കാര്യങ്ങളെക്കുറിച്ച് അദ്ദേഹം വിശദീകരിക്കും. മാത്രമല്ല, ഭക്തർക്ക് നേരിട്ട് ചോദ്യങ്ങൾ ചോദിക്കാനും എഡിജിപിയിൽനിന്ന് മറുപടി ലഭിക്കാനും അവസരമുണ്ടാകും.

വെബിനാറിൽ പങ്കെടുക്കാൻ മുൻകൂട്ടി രജിസ്റ്റർ ചെയ്യണം. രജിസ്ട്രേഷൻ പൂർണമായും സൗജന്യമാണ്. അതേസമയം, ഈ വർഷത്തെ മണ്ഡല-മകരവിളക്ക് തീർഥാടനത്തിനുള്ള വെർച്വൽ ക്യൂ ബുക്കിങ്ങും ആരംഭിച്ചിട്ടുണ്ട്. ശബരിമലയിലേക്ക് യാത്ര തിരിക്കുന്നതിന് മുൻപ് ആവശ്യമായ വിവരങ്ങൾ മനസ്സിലാക്കാൻ ഭക്തർക്ക് ഈ വെബിനാർ നല്ലൊരു അവസരമായിരിക്കും.