മദ്യപിച്ച് വാഹനമോടിച്ച് അപകടമുണ്ടാക്കുന്ന കേസുകളിൽ കോടതിയുടെ ശിക്ഷാവിധി കാത്തുനിൽക്കാതെ ലൈസൻസ് റദ്ദാക്കലടക്കം നടപടികൾ സ്വീകരിക്കണമെന്ന് ഹൈക്കോടതി. ഇത്തരം സാഹചര്യങ്ങളിൽ ലൈസൻസ് റദ്ദാക്കാനോ ലൈസൻസ് കൈവശം വെക്കുന്നതിൽ നിന്ന് അയോഗ്യനാക്കാനോ മോട്ടോർ വാഹന വകുപ്പ് അധികൃതർക്ക് അധികാരമുണ്ട്.

എന്നാൽ, ഉചിതമായ സാഹചര്യങ്ങളിൽ പോലും ലൈസൻസ് റദ്ദാക്കാനുള്ള അധികാരം വളരെ അപൂർവമായി മാത്രമേ ഉപയോഗിക്കുന്നുള്ളൂവെന്ന് ജസ്റ്റിസ് കൗസർ എടപ്പഗത്ത് ചൂണ്ടിക്കാട്ടിുകയുണ്ടായി. ഇക്കാര്യത്തിൽ മോട്ടോർ വാഹന വകുപ്പിന്റെ നിഷ്ക്രിയത്വത്തിൽ കോടതി അതൃപ്തി രേഖപ്പെടുത്തുകയും ചെയ്തു. മദ്യപിച്ച് വാഹനമോടിച്ചതുമായി ബന്ധപ്പെട്ട ജാമ്യാപേക്ഷ പരിഗണിക്കവെയാണ് കോടതിയുടെ ഈ നിരീക്ഷണം.

തൃശൂർ ചൂണ്ടൽ-കുന്നംകുളം റോഡിൽ ബൈക്കിടിച്ച് ഒരാൾ മരിച്ച സംഭവത്തിൽ ജാമ്യം തേടി കണിപ്പയ്യൂർ സ്വദേശി കെ.എ. ഗീവർഗീസ് നൽകിയ ജാമ്യാപേക്ഷയാണ് കോടതി പരിഗണിച്ചത്.