ഡോളറിനെതിരെ രൂപയൂടെ മൂല്യത്തിൽ വർധന. വ്യാപാരത്തിന്റെ തുടക്കത്തിൽ 24 പൈസയുടെ നേട്ടമാണ് രൂപ സ്വന്തമാക്കിയത്. 93.74ലേക്കാണ് രൂപ കുതിച്ചത്. ആഗോള വിപണിയിൽ എണ്ണവില കുറഞ്ഞത് അടക്കമുള്ള അനുകൂല ഘടകങ്ങളാണ് രൂപയ്ക്ക് തുണയായത്.

ഇന്ത്യ മുഖ്യമായി ആശ്രയിക്കുന്ന ബ്രെൻഡ് ക്രൂഡ് വില ബാരലിന് നൂറ് ഡോളറിൽ താഴെ തന്നെയാണ്. 98.31 ഡോളറിലേക്കാണ് എണ്ണവില താഴ്ന്നു പോയത്. അമേരിക്കയിലെ ഇടക്കാല തെരഞ്ഞെടുപ്പ് ഫലം അടക്കമുള്ള വിഷയങ്ങളാണ് എണ്ണവില കുറയാനായി കാരണം. പശ്ചിമേഷ്യൻ സംഘർഷത്തിന് അയവ് വരാൻ അമേരിക്കയിലെ തെരഞ്ഞെടുപ്പ് ഫലം സഹായിക്കുമെന്നാണ് വിലയിരുത്തലുകളുള്ളത്.

വെള്ളിയാഴ്ച രൂപ 43 പൈസയുടെ മുന്നേറ്റമാണ് കാഴ്ചവെച്ചത്. അതിനിടെ തുടർച്ചയായ ദിവസങ്ങളിൽ നേട്ടം സ്വന്തമാക്കിയ ഓഹരി വിപണി ഇന്ന് നഷ്ടത്തിലാണ്.

ബിഎസ്ഇ സെൻസെക്‌സ് 300ലധികം പോയിന്റാണ് താഴ്ന്നത്. നിഫ്റ്റി 25000 എന്ന സൈക്കോളജിക്കൽ ലെവൽ തൊട്ടതിന് പിന്നാലെയാണ് താഴ്ന്നത്.

എച്ച്‌സിഎൽ ടെക്, ഇൻഫോസിസ്, പവർ ഗ്രിഡ്, ഭാരതി എയർടെൽ, അൾട്രാ ടെക് സിമന്റ്, ടിസിഎസ് ഓഹരികളാണ് പ്രധാനമായി നഷ്ടം നേരിട്ടത്. അതേസമയം , ഐസിഐസിഐ ബാങ്ക്,എസ്ബിഐ, എച്ച്ഡിഎഫ്‌സി ബാങ്ക്, ഇന്റർഗ്ലോബ് ഏവിയേഷൻ ഓഹരികൾ നേട്ടം സ്വന്തമാക്കുകയും ചെയ്തു.