സ്ത്രീ വേഷത്തിൽ ക്ലാസെടുക്കാനെത്തുന്ന അധ്യാപകൻ! ശരീരത്തിൽ വലിയ കൃത്രിമ മാറിടം, കടുംചുവപ്പ് ലിപ്സ്റ്റിക്ക്, മേക്കപ്പ്, ഹൈഹീൽ ചെരിപ്പുകൾ... ലോകപ്രശസ്തമായ ഓക്സ്ഫഡ് സർവകലാശാലയിലെ ഒരു അധ്യാപകന്റെ വേഷവിധാനമാണ് ഇപ്പോൾ വലിയ വിവാദത്തിന് തിരികൊളുത്തിയിരിക്കുന്നത്. അധ്യാപകന്റെ വസ്ത്രധാരണം തങ്ങളെ അസ്വസ്ഥരാക്കുന്നുവെന്ന് വിദ്യാർഥികളും മുൻ വിദ്യാർഥികളും വനിതാ ജീവനക്കാരും പരാതിപ്പെട്ടതായാണ് റിപ്പോർട്ട്.

ഓക്സ്ഫഡിന് കീഴിലുള്ള സെന്റ് ഹിൽഡാസ് കോളജിലെ ബയോകെമിസ്ട്രി അധ്യാപകനായ മാറ്റ് റാറ്റ്‌ലിയാണ് വിവാദത്തിലെ വ്യക്തി. 36 വയസ്സുകാരനായ ഇദ്ദേഹം ക്ലാസുകളിലും പരിശീലന പരിപാടികളിലും സ്ത്രീ വേഷത്തിലാണ് എത്തുന്നത്. കൃത്രിമ മാറിടം ഉൾപ്പെടെയുള്ള വേഷവിധാനങ്ങൾ ധരിച്ചുള്ള ചിത്രങ്ങളും വിഡിയോകളും പുറത്തുവന്നതോടെ സംഭവം കൂടുതൽ ചർച്ചയായി.

അധ്യാപകന്റെ വേഷം തങ്ങളെ അസ്വസ്ഥരാക്കുന്നുവെന്നാണ് ചില വിദ്യാർഥികളുടെയും മുൻ വിദ്യാർഥികളുടെയും പരാതി. പരിശീലന പരിപാടിക്കിടെ അധ്യാപകന്റെ വേഷം കണ്ട് ബുദ്ധിമുട്ട് അനുഭവപ്പെട്ടതായി ഒരു വനിതാ ജീവനക്കാരിയും ആരോപിച്ചതായാണ് റിപ്പോർട്ടുകൾ.

മേയ് ഒന്നിന് മൂന്ന് മുൻ വിദ്യാർഥികൾ കോളജ് പ്രിൻസിപ്പലിന് പരാതി നൽകിയിരുന്നു. വനിതകളുടെ വിദ്യാഭ്യാസത്തിനായി സ്ഥാപിതമായ കോളജിൽ ഇത്തരം വേഷവിധാനങ്ങൾ അനുവദിക്കുന്നത് അംഗീകരിക്കാനാവില്ലെന്നാണ് പരാതിക്കാരുടെ നിലപാട്. കോളജിന്റെ തൊഴിൽപരമായ മര്യാദകളും ലൈംഗികാതിക്രമ വിരുദ്ധ നയങ്ങളും ചൂണ്ടിക്കാട്ടിയാണ് വിമർശനം.

അതേസമയം, അധ്യാപകന്റെ അക്കാദമിക് മികവും റിപ്പോർട്ടുകളിൽ പരാമർശിക്കുന്നുണ്ട്. മികച്ച അധ്യാപകനുള്ള പുരസ്കാരത്തിന് നാമനിർദേശം ചെയ്യപ്പെട്ടിട്ടുള്ള വ്യക്തിയാണ് മാറ്റ് റാറ്റ്‌ലി.

വിവാദത്തിൽ ഓക്സ്ഫഡ് സർവകലാശാല പ്രതികരിച്ചിട്ടുണ്ട്. എല്ലാവരെയും ഉൾക്കൊള്ളുന്ന, പരസ്പര ബഹുമാനമുള്ള അന്തരീക്ഷം ഉറപ്പാക്കാൻ സർവകലാശാല പ്രതിജ്ഞാബദ്ധമാണെന്നും അധ്യാപകർ തൊഴിൽപരമായ മാനദണ്ഡങ്ങൾ പാലിക്കണമെന്നും അധികൃതർ വ്യക്തമാക്കി. എന്നാൽ വ്യക്തിഗത ജീവനക്കാരുമായി ബന്ധപ്പെട്ട വിഷയങ്ങളിൽ കൂടുതൽ പ്രതികരിക്കാനാവില്ലെന്നും അറിയിച്ചു.

വ്യക്തിസ്വാതന്ത്ര്യവും വസ്ത്രധാരണ സ്വാതന്ത്ര്യവും ഒരു വശത്ത്. വിദ്യാർഥികളുടെ സൗകര്യവും വിദ്യാഭ്യാസ സ്ഥാപനങ്ങളിലെ തൊഴിൽപരമായ മര്യാദകളും മറുവശത്ത്. ഈ രണ്ട് നിലപാടുകൾ തമ്മിലുള്ള ചർച്ചയ്ക്കാണ് ഓക്സ്ഫഡിലെ സംഭവം ഇപ്പോൾ വഴിതുറന്നിരിക്കുന്നത്.