വ്രതശുദ്ധിയോടെ തീർത്ഥാടകർ ശബരിമലയിലേക്ക്.... മണ്ഡല- മകരവിളക്ക് പൂജകൾക്കായി ശബരിമല ഒരുങ്ങി, ഇന്ന് നട തുറക്കും

വ്രതശുദ്ധിയോടെ തീർത്ഥാടക ലക്ഷങ്ങൾ എത്തുന്ന ശബരിശസവിധം മണ്ഡല- മകരവിളക്ക് പൂജകൾക്കായി ഒരുങ്ങി. ഇന്ന് വൈകിട്ട് 5ന് തന്ത്രി കണ്ഠരര് ബ്രഹ്മദത്തന്റെ സാന്നിദ്ധ്യത്തിൽ മേൽശാന്തി ഇ.ഡി.പ്രസാദ് നമ്പൂതിരി നടതുറന്ന് ശ്രീലകത്ത് ദീപം തെളിക്കും. തുടർന്ന് മേൽശാന്തി പതിനെട്ടാംപടി ഇറങ്ങി ഹോമകുണ്ഡത്തിൽ അഗ്നി പകരുന്നതോടെ സന്നിധാനം ശരണമന്ത്രങ്ങളാൽ മുഖരിതമാകും.
ഇരുമുടിക്കെട്ടുമായി വരുന്ന നിയുക്ത മേൽശാന്തി സുബ്രഹ്മണ്യൻ ശങ്കരൻ നമ്പൂതിരിയെയും നിയുക്ത മാളികപ്പുറം മേൽശാന്തി എ.ദാമോദരൻ നമ്പൂതിരിയെയും കൈപിടിച്ച് പതിനെട്ടാംപടിയിലൂടെ മേൽശാന്തി പ്രസാദ് നമ്പൂതിരിയുടെ നേതൃത്വത്തിൽ സോപാനത്തേക്ക് ആനയിക്കുകയും ചെയ്യും. സുബ്രഹ്മണ്യൻ ശങ്കരൻ നമ്പൂതിരിയെ തന്ത്രി കലശാഭിഷേകം നടത്തി ശ്രീകോവിലിനുള്ളിലേക്ക് കൊണ്ടുപോകുന്നതാണ്.
അയ്യപ്പവിഗ്രഹത്തിന് സമീപമിരുത്തി കാതിൽ മൂലമന്ത്രം ചൊല്ലിക്കൊടുക്കും. ദാമോദരൻ നമ്പൂതിരിയെയും ഇതേരീതിയിൽ മാളികപ്പുറം ക്ഷേത്രത്തിൽ മേൽശാന്തിയായി അവരോധിക്കുന്നതാണ്. വൃശ്ചികപ്പുലരിയായ നാളെ പുലർച്ചെ മൂന്നിന് പുതിയ മേൽശാന്തിമാരാണ് സന്നിധാനം, മാളികപ്പുറം നടകൾ തുറക്കുക.
വൃശ്ചികം ഒന്നുമുതൽ മണ്ഡലപൂജ വരെ പ്രതിദിനം 80,000പേർക്ക് ദർശനത്തിന് സൗകര്യമൊരുക്കും. വെർച്വൽ ക്യൂ ബുക്കിംഗിലൂടെ 60,000 പേർക്ക് ദർശനം നടത്താവുന്നതാണ്. സ്പോട്ട് ബുക്കിംഗ് വഴി നിലയ്ക്കലിൽ 10,000 പേർക്കും എരുമേലി കാനനപാതവഴി 2,000 പേർക്കും വണ്ടിപ്പെരിയാർ സത്രം പുൽമേടുവഴി 2,000 പേർക്കും ദർശനം നടത്താനാകും.
ഓൺലൈൻ ബുക്കിംഗിലൂടെ എരുമേലി, സത്രം കാനന പാതകൾ വഴി 3,000 പേർക്ക് വീതം ദർശന സൗകര്യമുണ്ട്. ചെങ്ങന്നൂർ റെയിൽവെ സ്റ്റേഷനിലും സ്പോട്ട് ബുക്കിംഗിന് സൗകര്യമൊരുക്കുന്നതാണ്.
https://www.facebook.com/Malayalivartha

























