കപ്പല്‍ വഴി വമ്പന്‍ സ്വര്ണക്കടത്ത് പലരും നടത്തുന്നുണ്ടെന്നു മേനി പറഞ്ഞ ജോയ് ആലുക്കയും വെട്ടില്‍, സ്വര്‍ണക്കടത്തില്‍ ജോയ് ആലുക്കാസും
വിമാനത്താവളങ്ങള്‍ വഴി ചെറിയ അളവില്‍ മാത്രമാണ്‌ സ്വര്ണക്കടത്ത് നടക്കുന്നതെന്നും കപ്പല്‍ വഴി വന്‍ സ്വര്ണക്കടത്ത് നടത്തുന്നെന്നും ജോയ് ആലുക്കാസ്‌ ഗ്രൂപ്പ്‌ ചെയര്‍മാന്‍ നേരത്തേ പറഞ്ഞിരുന്നു. അതിന്‌ പിന്നാലെയാണ്‌ നികുതി വെട്ടിച്ച് ജോയ് ആലുക്കാസിലേക്ക് കടത്താന്‍ ശ്രമിച്ച 9.5 കിലോ സ്വര്‍ണം നെടുമ്പാശ്ശേരി വിമാനത്താവളത്തില്‍ വെച്ച് പിടികൂടിയത്‌. ഈ സ്വര്‍ണം ജോയ് ആലുക്കാസിലേക്കുള്ളതാണെന്ന് സെയില്‍ ടാക്‌സ് ഡെപ്യൂട്ടി കമ്മീഷണറാണ് അറിയിച്ചത്.
സെയില്‍ ടാക്‌സിന്റെ ഇന്റെലിജന്‍സ് വിഭാഗത്തിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് ഇന്നലെ രാത്രി ഒമ്പതരയോടെ ഡല്‍ഹിയില്‍ നിന്നെത്തിയ തൃശ്ശൂര്‍ സ്വദേശി ജെറിനെ ഇന്റെലിജന്‍സ് വിഭാഗം പരിശോധിച്ചത്. പത്ത് കിലോയോളം സ്വര്‍ണം മതിയായ രേഖകളില്ലാതെ ജെറിന്റെ കൈവശം ഉണ്ടായിരുന്നു. ഡല്‍ഹിയില്‍ നിന്നും കൊണ്ടുവന്ന സ്വര്‍ണം ജോയ് ആലുക്കാസിന്റെ പേരിലാണ് വാങ്ങിയിരിക്കുന്നത്. ആറ് കോടിയോളം രൂപ വിലമതിക്കുന്ന സ്വര്‍ണത്തില്‍ ഒന്നരക്കിലോയോളം സ്വര്‍ണം ഉരുക്കാനുള്ള പഴയ സ്വര്‍ണമാണ്.
ജോയ് ആലുക്കാസിന്റെ പേരില്‍ വാങ്ങിയിരിക്കുന്ന സ്വര്‍ണം രജിസ്‌ട്രേഷന്‍ പോലുമില്ലാത്ത തൃശ്ശൂര്‍ ജ്വല്ലേഴ്‌സിന്റെ പേരിലാണ് വിതരണത്തിനായി കൊണ്ടുവന്നിരിക്കുന്നത്. ആറ് കിലോയോളം സ്വര്‍ണം വ്യാജ പേരിലുള്ള അന്യസംസ്ഥാന ജ്വല്ലറികളുടെ പേരിലും ഉണ്ട്. നികുതി വെട്ടിച്ച് കൊണ്ടുവന്ന സ്വര്‍ണം ആലുവ ട്രഷറിയില്‍ സൂക്ഷിച്ചിരിക്കുകയാണ്. 30 ലക്ഷത്തോളം രൂപ കെട്ടിവെച്ചാല്‍ മാത്രമേ ഈ സ്വര്‍ണം വിട്ടു കൊടുക്കുകയുള്ളുവെന്ന് സെയില്‍ ടാക്‌സിന്റെ ഉന്നത ഉദ്യോഗസ്ഥര്‍ അറിയിച്ചു.
നേരത്തെ മലബാര്‍ ഗോള്‍ഡും സ്വര്ണക്കടത്ത് വിവാദത്തില്‍ അകപ്പെട്ടിരുന്നു. സ്വര്‍ണക്കടത്തുമായി ബന്ധപ്പെട്ട കരിപ്പൂരില്‍ പിടിയിലായ ഷഹബാസ് എന്നയാളില്‍ നിന്നും മലബാര്‍ ഗോള്‍ഡ് 10 കിലോ സ്വര്‍ണം വാങ്ങിയെന്നായിരുന്നു ആരോപണം. സ്വര്‍ണക്കടത്തുമായി ബന്ധപ്പെട്ട് സംസ്ഥാനത്തെ സ്വര്‍ണവിതരണക്കാര്‍ നിരീക്ഷണത്തിലാണ്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
