തിരുവനന്തപുരത്ത് തെരുവുനായകളെ പിടികൂടാന്‍ തുടങ്ങി. കോര്‍പ്പറേഷന്റെ ആഭിമുഖ്യത്തിലാണ് തെരുവുനായ്ക്കളെ പിടികൂടുന്നത്. പിടികൂടിയ തെരുവുനായ്ക്കളെ വന്ധ്യംകരിക്കാനാണ് തീരുമാനം. അക്രമകാരികളായ തെരുവ് നായ്ക്കളെ കൊല്ലാന്‍ തിരുവനന്തപുരം നഗരസഭ തീരുമാനിച്ചിട്ടുണ്ട്. മൃഗഡോക്ടര്‍ നല്‍കുന്ന സാക്ഷ്യപത്രത്തിന്റെ അടിസ്ഥാനത്തിലായിരിക്കും നായ്ക്കളെ കൊല്ലുക. തെരുവുനായ ശല്യം അറിയ്ക്കാന്‍ പ്രത്യേക ഹെല്‍പ്പ് ലൈന്‍ നമ്പറും ആരംഭിച്ചിട്ടുണ്ട്.
അതേസമയം, പുല്ലുവിളയില്‍ വീണ്ടും തെരുവുനായ ആക്രമണം ഉണ്ടായി. പുല്ലുവിള സ്വദേശി ജോയ്ക്കാണ് ഇന്ന് രാവിലെ തെരുവുനായ ആക്രമണത്തില്‍ പരുക്കേറ്റത്. ഇയാളെ ജനറല്‍ ആശുപത്രിയില്‍ പ്രവേശിപ്പിച്ചു.
നായ്ക്കളെ വന്ധ്യംകരിക്കാനും വന്ധ്യംകരിച്ചവയെ പുനരധിവസിപ്പിക്കുന്നതിന് ജില്ലാതലത്തില്‍ ഫാമുകള്‍ തുടങ്ങാനും സര്‍ക്കാര്‍ തീരുമാനമെടുത്തിട്ടുണ്ട്. ഫാമുകള്‍ക്കായി ജില്ലാ കേന്ദ്രങ്ങളില്‍ രണ്ടേക്കര്‍ സ്ഥലം വീതം അനുവദിക്കും. വന്ധ്യംകരിച്ച നായ്ക്കളെ സംരക്ഷിക്കാനുള്ള ചുമതല മൃഗസ്‌നേഹികളുടെ സംഘടനകള്‍ക്ക് നല്‍കും. നായക്കളെ വന്ധ്യംകരിക്കാനുള്ള ഡോക്ടര്‍മാരെ നല്‍കാനുള്ള ചുമതല ജില്ലാ പഞ്ചായത്തുകള്‍ക്ക് നല്‍കാനും കഴിഞ്ഞ ദിവസം ചേര്‍ന്ന ഉന്നതതല യോഗത്തില്‍ തീരുമാനമായി. 

ആക്രമണകാരികളായ തെരുവ് നായകളെ മരുന്ന് കുത്തിവെച്ച് കൊല്ലാന്‍ രേഖാമൂലം അനുമതി നല്‍കിക്കൊണ്ടുള്ള ഉത്തരവ് തദ്ദേശ സ്ഥാപനങ്ങള്‍ക്ക് നല്‍കുമെന്ന് മന്ത്രി കെ.ടി ജലീല്‍. ഇതിന് പ്രിന്‍സിപ്പല്‍ സെക്രട്ടറിയെ ചുമതലപ്പെടുത്തിയിട്ടുണ്ട്. തദ്ദേശ സ്ഥാപനങ്ങളിലെ തനത് ഫണ്ട് മതിയാവില്ലെങ്കില്‍ പ്ലാന്‍ഫണ്ടില്‍ നിന്ന് ഇതിനുള്ള ചെലവ് കണ്ടെത്താമെന്നും മന്ത്രി വാര്‍ത്താസമ്മേളനത്തില്‍ പറഞ്ഞു.