ജെയ്ഷയുടെ ആരോപണത്തെ തള്ളി അത്‌ലറ്റിക് ഫെഡറേഷന്‍
ഒളിമ്പിക്‌സ് മാരത്തണ്‍ മത്സരത്തിനിടെ വെള്ളം നല്‍കിയില്ലെന്ന മലയാളി താരം ഒ.പി ജെയ്ഷയുടെ ആരോപണം തള്ളി അത്‌ലറ്റിക് ഫെഡറേഷന്‍ ഓഫ് ഇന്ത്യ (എ.എഫ്.ഐ). ഒ.പി ജെയ്ഷയുടെ ആരോപണം തെറ്റിദ്ധരിപ്പിക്കുന്നതും അസത്യവുമായ കാര്യങ്ങളാണ്. പ്രത്യേകം കുടിവെള്ളം ആവശ്യമുണ്ടെന്ന് ജെയ്ഷ അധികൃതരെ അറിയിച്ചിരുന്നില്ല. മത്സരാര്‍ഥികള്‍ക്ക് വെള്ളം വിതരണം ചെയ്യേണ്ട ചുമതല സംഘാടകര്‍ക്കാണെന്നും ഫെഡറേഷന്‍ വാര്‍ത്താക്കുറിപ്പിലൂടെ അറിയിച്ചു.
തങ്ങള്‍ നല്‍കിയ എനര്‍ജി ഡ്രിങ്ക് ജെയ്ഷയും കോച്ചും വേണ്ടെന്ന് വെക്കുകയായിരുന്നുവെന്ന് എ.എഫ്.ഐയുടെ മുതിര്‍ന്ന ഉദ്യോഗസ്ഥന്‍ വി.കെ വത്സന്‍ മാധ്യമങ്ങളോട് പറഞ്ഞു.
അത്‌ലറ്റിക് ഫെഡറേഷന്റെ പ്രസ്താവനക്ക് മറുപടിയുമായി ജെയ്ഷ രംഗത്തെത്തി. താന്‍ കള്ളം പറഞ്ഞതാണെന്ന് തെളിഞ്ഞാല്‍ കായിക രംഗത്ത് നിന്ന് വിടവാങ്ങുമെന്ന് ജെയ്ഷ വ്യക്തമാക്കി. അത്‌ലറ്റിക് ഫെഡറേഷനാണ് കളവ് പറയുന്നത്. വര്‍ഷങ്ങളായി കായിക രംഗത്തുള്ള താന്‍ ഇതുവരെ ഫെഡറേഷനെതിരെ പരാതി പറഞ്ഞിട്ടില്ലെന്നും അവര്‍ കൂട്ടിച്ചേര്‍ത്തു.
42 കിലോമീറ്റര്‍ ദൈര്‍ഘ്യമുള്ള മാരത്തണില്‍ പങ്കെടുത്ത ജെയ്ഷ ഫിനിഷിങ് ലൈനില്‍ തളര്‍ന്നു വീണിരുന്നു. രണ്ട് മണിക്കൂറിന് ശേഷമാണ് ജെയ്ഷക്ക് ബോധം വന്നത്. കുടിവെള്ളം, ഗ്ലൂക്കോസ്, എനര്‍ജി ജെല്ലുകള്‍ എന്നിവ മാരത്തണ്‍ താരങ്ങള്‍ക്ക് അതാത് രാജ്യങ്ങള്‍ നല്‍കാറുണ്ട്. ഓരോ രണ്ടര കിലോമീറ്റര്‍ പിന്നിടുമ്പോഴാണ് താരങ്ങള്‍ക്ക് ഇവ നല്‍കുക. എന്നാല്‍, മാരത്തണ്‍ ഓടുന്ന നിരത്തുകളിലുള്ള ഇന്ത്യന്‍ െഡസ്‌കുകള്‍ കാലിയായിരുന്നു.
മറ്റു രാജ്യങ്ങളുടെ കൗണ്ടറുകളില്‍നിന്ന് കുടിവെള്ളവും മറ്റും എടുക്കുന്നത് അയോഗ്യയാക്കപ്പെടാനും ഇടയാക്കും. ജെയ്ഷക്ക് ഒരു പരിധിവരെ സഹായകരമായത് ഒളിമ്പിക് കമ്മിറ്റി തയാറാക്കിയ ഡെസ്‌ക്കുകളാണ്. എട്ടു കിലോമീറ്റര്‍ പിന്നിടുമ്പോള്‍ മാത്രമേ അവ കുടിവെള്ളം ലഭ്യമാക്കുകയുള്ളൂ.
https://www.facebook.com/Malayalivartha
