ഓടിക്കൊണ്ടിരുന്ന ഓട്ടോറിക്ഷയ്ക്ക് മുന്നിലേയ്ക്ക് തെരുവുനായ്ക്കള്‍ ചാടിയതിനെ തുടര്‍ന്ന് വാഹനം മറിഞ്ഞ് െ്രെഡവര്‍ക്ക് ഗുരുതര പരുക്ക്. പിറവം സ്വദേശി ഷൈമോനാണ് പരുക്കേറ്റത്. കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുന്ന ഇദ്ദേഹത്തിന്റെ ഒരു വൃക്ക നീക്കം ചെയ്തു. അപകടനില തരണം ചെയ്തിട്ടില്ലെന്നും അടുത്ത 24 മണിക്കൂര്‍ നിര്‍ണ്ണായകമാണെന്നും ഡോക്ടര്‍മാര്‍ അറിയിച്ചു.
കഴിഞ്ഞ ദിവസം രാത്രി യാത്രക്കാരുമായി പിറവത്തേയ്ക്ക് എത്തവേ ആയിരുന്നു അപകടം. വഴിയരുകില്‍ കടികൂടുകയായിരുന്ന തെരുവുനായ്ക്കള്‍ ഓട്ടോറിക്ഷയ്ക്കു നേരെ ചാടി എത്തുകയും വാഹനം നിയന്ത്രണംവിട്ട് മറിയുകയായിരുന്നു.
അപകട സമയം ഓട്ടോറിക്ഷയില്‍ ഉണ്ടായിരുന്ന രണ്ട് സ്ത്രീകളും ഒരു കൈക്കുഞ്ഞും അത്ഭുതകരമായി രക്ഷപെട്ടു. ഓട്ടോറിക്ഷ ശരീരത്തിലേയ്ക്ക് മറിഞ്ഞാണ് ഷൈമോന് പരുക്കേറ്റത്.