ആര്യാടനും പിപി തങ്കച്ചനും പടിക്കു പുറത്ത്, ഗ്രൂപ്പു കളിക്കവസാനം കോണ്ഗ്രസ് രാഷ്ട്രീയകാര്യ സമിതിയുടെ ചെയര്മാന് കെപിസിസി പ്രസിഡന്റ് വി എം സുധീരന് തന്നെ
15 പേരുടെ രാഷ്ട്രീയകാര്യ സമിതിയെ രൂപീകരിക്കുമെന്നാണ് കോണ്ഗ്രസ് ഉപാധ്യക്ഷന് രാഹുല് ഗാന്ധി അറിയിച്ചിരുന്നതെങ്കിലും ഗ്രൂപ്പുകള് ഏഴും എട്ടും പേരുകള് നിര്ദ്ദേശിച്ചതോടെയാണ് 21 പേര് ഉള്പ്പെട്ട രാഷ്ട്രീയ കാര്യ സമിതിയെ തിരഞ്ഞെടുത്തത്. കോണ്ഗ്രസ് അധ്യക്ഷ സോണിയ ഗാന്ധിയുടെ അംഗീകാരത്തോടെ എ.ഐ.സി.സി ജനറല് സെക്രട്ടറി ജനാര്ദന് ദ്വിവേദിയാണ് സമിതിയംഗങ്ങളുടെ പേരുകള് പ്രഖ്യാപിച്ചത്. മുതിര്ന്നവര്ക്കും യുവാക്കള്ക്കും വനിതകള്ക്കും സമിതിയില് പ്രാതിനിധ്യം നല്കാന് ശ്രമിച്ചിട്ടുണ്ട്.
സംഘടനാ പ്രവര്ത്തനങ്ങള് മുന്നോട്ടുനീക്കുന്നതിന് മാരത്തണ് ചര്ച്ചകള്ക്കൊടുവില് ഹൈകമാന്ഡ് മുന്നോട്ടുവച്ച മൂന്നിന നിര്ദ്ദേശങ്ങളില് ആദ്യത്തേതാണ് രാഷ്ട്രീയകാര്യ സമിതി. കെപിസിസി തലം വരെ പുന$സംഘടന, തുടര്ന്ന് സംഘടനാ തെരഞ്ഞെടുപ്പ് എന്നിവയാണ് അടുത്തപടി. രാഷ്ട്രീയകാര്യ സമിതി രൂപവത്കരിക്കുന്നതിനും പുന$സംഘടനക്കും എ, ഐ ഗ്രൂപ്പുകള് എതിരായിരുന്നു. എന്നാല്, ഹൈകമാന്ഡിന്റെ താല്പര്യത്തിന് വിട്ടുകൊടുക്കുകയാണ് ഒടുവില് ഉമ്മന് ചാണ്ടിയും ചെന്നിത്തലയും ചെയ്തത്.
രാഷ്ട്രീയകാര്യ സമിതിയെ നിയമിച്ചപ്പോള് കോണ്ഗ്രസിലെ മുതിര്ന്ന നേതാക്കളായ ആര്യാടന് മുഹമ്മദും പി പി തങ്കച്ചനും പടിക്ക് പുറത്തായി. സുധീരന് നിര്ദ്ദേശിച്ച അംഗങ്ങള്ക്കൊപ്പം ഗ്രൂപ്പ് പ്രതിനിധിളെയും ഉള്പ്പെടുത്തിയാണ് കോണ്ഗ്രസ് രാഷ്ട്രീയകാര്യ സമിതിയെ നിയമിച്ചത്. 21 അംഗങ്ങളുള്ള സമിതിയുടെ ചെയര്മാന് കെപിസിസി പ്രസിഡന്റ് തന്നെയാണെന്നതും ഗ്രൂപ്പ് താല്പ്പര്യങ്ങള്ക്കേറ്റ തിരിച്ചടിയായി. പ്രതിപക്ഷ നേതാവ് രമേശ് ചെന്നിത്തല, മുന് മുഖ്യമന്ത്രി ഉമ്മന് ചാണ്ടി, കെ. മുരളീധരന്, പി.സി. ചാക്കോ എന്നിവരും സമിതിയില് അംഗങ്ങളാണ്.
പി.ജെ.കുര്യന്, മുല്ലപ്പള്ളി രാമചന്ദ്രന്, എം.എം.ഹസന്, കെ.സി.ജോസഫ്, തിരുവഞ്ചൂര് രാധാകൃഷ്ണന്, കെ.വി.തോമസ്, എം.ഐ.ഷാനവാസ്, കെ.സുധാകരന്, കെ.സി.വേണുഗോപാല്, കൊടിക്കുന്നില് സുരേഷ്, വി.ഡി.സതീശന്, ബെന്നി ബെഹ്നാന്, ഷാനിമോള് ഉസ്മാന്, ടി.എന്.പ്രതാപന്, പി.സി.വിഷ്ണുനാഥ്, എം.ലിജു എന്നിവരാണ് സമിതിയിലെ മറ്റ് അംഗങ്ങള്.
https://www.facebook.com/Malayalivartha
