വാഹനത്തില്‍ നിന്നു റോഡില്‍ പടര്‍ന്ന എന്‍ജിന്‍ ഓയിലില്‍ തെന്നി തെറിച്ചുവീണ ബൈക്ക് യാത്രികന്‍ ലോറി കയറി മരിച്ചു. വന്യക്കോട് കാനക്കുഴി വീട്ടില്‍ സുശീലയുടെ മകന്‍ പ്രണോദ് സേവ്യര്‍ (27) ആണു മരിച്ചത്. ഇന്നലെ രാവിലെ 10.30നു ദേശീയപാതയില്‍ കളിയിക്കാവിള പിപിഎം ജംക്ഷനിലാണു സംഭവം. വന്യക്കോട്ടു നിന്നു പടന്താലുംമൂട്ടിലേക്കു പോകവെ മുന്നില്‍ പോയ ലോറിയെ ഓവര്‍ടേക്ക് ചെയ്യുന്നതിനിടെ ഓയിലില്‍ തെന്നിത്തെറിച്ച് അതേ വാഹനത്തിനടിയില്‍പെടുകയായിരുന്നു.
തലയിലൂടെ ടയര്‍ കയറി തല്‍ക്ഷണം മരിച്ചു. രാവിലെ 10.30 മുതല്‍ പടന്താലുംമൂട് തൊട്ടു കളിയിക്കാവിള വരെയുള്ള റോഡിലായിരുന്നു ഓയില്‍ പടര്‍ന്നത്. സംഭവമറിയാതെ എത്തിയ എട്ടോളം ഇരുചക്രവാഹനങ്ങള്‍ റോഡിന്റെ പലയിടത്തായി അപകടത്തില്‍പെട്ടു പത്തോളം പേര്‍ക്കു പരുക്കേറ്റിട്ടുണ്ട്. ഒറ്റാമരം ജംക്ഷനില്‍ മാതാവും മകനും ഓയിലില്‍ തെന്നിവീണതിനെത്തുടര്‍ന്നു നാട്ടുകാര്‍ ബൈക്ക് റോഡിനു കുറുകെ നിര്‍ത്തി ഗതാഗതം തടയുന്നതിനിടെയാണു കളിയിക്കാവിളയിലെ അപകടം .
തെന്നിമറിഞ്ഞ വാഹനങ്ങളില്‍ നിന്നു തെറിച്ചുവീണ പലരും തലനാരിഴയ്ക്കാണു പിന്നിലും, എതിര്‍ദിശിയിലും നിന്നെത്തിയ വാഹനങ്ങളില്‍ നിന്നു രക്ഷപ്പെട്ടത്. മരിച്ച പ്രണോദ് പടന്താലുംമൂട്ടില്‍ ഓട്ടോ ഇലക്ട്രിക് സ്ഥാപനം നടത്തി വരികയായിരുന്നു. സഹോദരങ്ങള്‍: പ്രമോദ് സേവ്യര്‍, വിനോദ് സേവ്യര്‍. മൃതദേഹം പോസ്റ്റ്‌മോര്‍ട്ടത്തിനു ശേഷം വൈകിട്ടോടെ വീട്ടിലെത്തിച്ച് ഏഴു മണിയോടെ സംസ്‌കരിച്ചു. ഓയില്‍ പടര്‍ന്ന ഭാഗങ്ങളില്‍ ഫയര്‍ഫോഴ്‌സിന്റെ നേതൃത്വത്തില്‍ പാറപ്പൊടി വിതറി. ഒായില്‍ ചോര്‍ന്ന വാഹനം കണ്ടെത്താനായിട്ടില്ല.