തിരു: വാര്‍ഷിക പദ്ധതിതുകയുടെ 50 ശതമാനം പോലും ചെലവഴിക്കാതെ 15 വകുപ്പുകള്‍ കഴിഞ്ഞ സര്‍ക്കാരിന്റെ കാലത്ത്‌ ഗുരുതരവീഴ്‌ച വരുത്തിയതായുള്ള പബ്ലിക്‌ എക്‌സ്‌പെന്‍ഡിച്ചര്‍ റിവ്യൂ കമ്മിറ്റിയുടെ റിപ്പോര്‍ട്ട്‌ കഴിഞ്ഞ സര്‍ക്കാരിന്റെ ധനമാനേജ്‌മെന്റിലുണ്ടായ വീഴ്‌ചയാണ്‌ തെളിയിക്കുന്നതെന്ന്‌ ധനമന്ത്രി കെഎം മാണി നിയമസഭയില്‍ പറഞ്ഞു. ഉപധനാഭ്യര്‍ത്ഥന ചര്‍ച്ചക്കുള്ള മറുപടിയിലാണ്‌ അദ്ദേഹം ഇക്കാര്യം പറഞ്ഞത്‌.  പബ്ലിക്‌ എസ്‌ക്‌പെന്‍ഡിച്ചര്‍ റിവ്യൂകമ്മിറ്റിയുടെ റിപ്പോര്‍ട്ട്‌ മന്ത്രി സഭയുടെ മേശപ്പുറത്ത്‌ വച്ചു. നികുതി, ആഭ്യന്തരം, സഹകരണം, പൊതുവിദ്യാഭ്യാസം, വിനോദസഞ്ചാരം തുടങ്ങി കഴിഞ്ഞ സര്‍ക്കാരിലെ വകുപ്പുകളുടെ പ്രവര്‍ത്തനത്തെ എക്‌സ്‌പെന്‍ഡിച്ചര്‍ റിവ്യൂകമ്മിറ്റി വളരെ മോശം ഗണത്തിലാണ്‌ ഉള്‍പ്പെടുത്തിയിട്ടുള്ളത്‌. ഇതാണ്‌ യാഥാര്‍ത്ഥ്യമെന്നിരിക്കെ കഴിഞ്ഞ സര്‍ക്കാരിന്റെ നേട്ടങ്ങള്‍ വിശദീകരിച്ച്‌ ഊറ്റം കൊള്ളുന്നതില്‍ അര്‍ഥമില്ല. 
2010-11ല്‍ 4786 കോടി കഴിഞ്ഞ സര്‍ക്കാര്‍ നഷ്ടപ്പെടുത്തിയതായി മന്ത്രി കെഎം മാണി പറഞ്ഞു.
അണ്ടര്‍ അസസ്‌മെന്റും കുറഞ്ഞ വസൂലാക്കല്‍ കാരണവുമാണ്‌ ഇക്കാലയളവില്‍ റവന്യൂ വരുമാനം നഷ്ടപ്പെടുത്തിയത്‌. തെക്കേയിന്ത്യയില്‍ ഏറ്റവും ഉയര്‍ന്ന കടബാധ്യതയുള്ള സംസ്ഥാനം കേരളമാണെന്നും എക്‌സ്‌പെന്റിച്ചര്‍ റിവ്യൂ കമ്മിറ്റി കണ്ടെത്തിയിട്ടുണ്ട്‌്‌.
ഇതെല്ലാം കഴിഞ്ഞ സര്‍ക്കാരിന്റെ ധനകാര്യ മാനേജ്‌മെന്റിലുള്ള പിഴവാണ്‌.
ഈ സര്‍ക്കാര്‍ അധികാരത്തില്‍ വരുമ്പോള്‍ കരാറുകാരുടെ മൂന്നു മാസത്തെ കുടിശിക കൊടുക്കാനുണ്ടായിരുന്നു. ഇപ്പോള്‍ കുടിശികയില്ല. ക്ഷേമ പെന്‍ഷനും കുടിശികയില്ല. കടം വാങ്ങുന്ന തുകയുടെ 10 ശതമാനം റവന്യൂ ചെലവിന്‌ ഉപയോഗിക്കണമെന്ന്‌ തോമസ്‌ ഐസക്കിന്റെ വാദം സ്വീകരിക്കില്ലെന്ന്‌ മന്ത്രി പറഞ്ഞു. ഈ സര്‍ക്കാര്‍ അധികാരത്തില്‍ വരുമ്പോള്‍ 78,673 കോടിയായിരുന്നു കടമെന്നും മന്ത്രി പറഞ്ഞു.