ജിഷ വധക്കേസ് അന്വേഷണത്തില് ഗുരുതര വീഴ്ചയെന്ന് വിജിലന്സ് റിപ്പോര്ട്ട്
പെരുമ്പാവൂരിലെ നിയമ വിദ്യാര്ഥിനി ജിഷയുടെ കൊലപാതകക്കേസിലെ അന്വേഷണം തുടക്കം മുതല് പാളിയെന്ന് വിജിലന്സ് റിപ്പോര്ട്ട്. ഇപ്പോഴുള്ള തെളിവുകള് കോടതിയില് നിലനില്ക്കില്ലെന്നും വിലയിരുത്തല്. ശാസ്ത്രീയ തെളിവുകള് ശേഖരിക്കുന്നതില് ഗുരുതര വീഴ്ചയുണ്ടായി. വിജിലന്സ് ഡയറക്ടര് ജേക്കബ് തോമസിന്റെ റിപ്പോര്ട്ട് ആഭ്യന്തരസെക്രട്ടറി ഡിജിപിക്ക് നല്കി. എന്നാല് 16 പേജുള്ള വിജിലന്സ് ഡയറക്ടറുടെ റിപ്പോര്ട്ട് ഡിജിപി ലോക്നാഥ് ബെഹ്റ തള്ളി. കഴിഞ്ഞ വര്ഷം ഏപ്രില് 28നാണ് ജിഷയെ വീട്ടിനുള്ളില് മരിച്ചനിലയില് കണ്ടെത്തിയത്. ക്രൂരമായ ലൈംഗിക പീഡനത്തിനിരയായ നിലയിലായിരുന്നു മൃതദേഹം. സംഭവ ദിവസം വൈകുന്നേരം 5.30നും ആറിനുമിടയില് പെരുമ്പാവൂര് കുറുപ്പംപടി വട്ടോളിപ്പടിയിലെ കനാല് പുറമ്പോക്കിലെ അടച്ചുറപ്പില്ലാത്ത വീട്ടിലേക്ക് അതിക്രമിച്ചു കയറി ജിഷയെ മാനഭംഗപ്പെടുത്തി കൊലപ്പെടുത്തിയെന്നതാണ് പ്രതിക്കെതിരായ പ്രധാന കുറ്റം. പ്രതി അമീറുല് ഇസ്ലാമിനെ തമിഴ്നാട്ടില്നിന്ന് അറസ്റ്റ് ചെയ്തിരുന്നു.
കേസില് എഫ്.ഐ.ആര് രജിസ്റ്റര് ചെയ്തത് മുതല് പിഴവ് സംഭവിച്ചുവെന്നാണ് റിപ്പോര്ട്ടിലുള്ളത്. മുന്വിധിയോടെയാണ് അന്വേഷണം നടന്നത്. ഇപ്പോഴത്തെ നിലയില് ഈ കുറ്റപത്രവുമായി മുന്നോട്ട് പോയാല് കോടതിയില് നിന്ന് തിരിച്ചടിയുണ്ടാകുമെന്നും വിജിലന്സ് ഡയറക് ടര് ജേക്കബ് തോമസ് സര്ക്കാരിന് കൈമാറിയ റിപ്പോര്ട്ടിലുള്ളതായാണ് വിവരം. കഴിഞ്ഞ ജനുവരിയിലാണ് 16 പേജ് വരുന്ന അതീവ രഹസ്യ സ്വഭാവത്തിലുള്ള റിപ്പോര്ട്ട് ആഭ്യന്തര സെക്രട്ടറിക്ക് കൈമാറിയത്. ആഭ്യന്തര സെക്രട്ടറി റിപ്പോര്ട്ട് മുഖ്യമന്ത്രിക്കും ഡിജിപിക്കും കൈമാറി. കേസില് അമീറുള് ഇസ്ലാം മാത്രമാണോ പ്രതി എന്ന സംശയവും കൂടുതല് പ്രതികള് ഉണ്ടാകാനുള്ള സാധ്യതയും വിജിലന്സ് ഉന്നയിക്കുന്നുണ്ട്. ശാസ്ത്രീയ തെളിവുകള് ശേഖരിക്കുന്നതില് വീഴ്ച പറ്റി. ഇപ്പോഴുള്ള തെളിവുകള് കോടതിയില് നിലനില്ക്കില്ല. പരിശോധനയില് കണ്ടെത്തിയ വിവരവും സ്വന്തം നിഗമനങ്ങളും ചേര്ത്താണ് ഡിജിപി ജേക്കബ് തോമസ് റിപ്പോര്ട്ട് സമര്പ്പിച്ചത്.
ടിപി സെന്കുമാര് ഡിജിപിയായിരിക്കെ നടന്ന അന്വേഷണത്തിലും പിന്നീട് ഡിജിപിയായി വന്ന ലോക്നാഥ് ബെഹ്റ നിയോഗിച്ച പ്രത്യേക സംഘത്തിനും അന്വേഷണത്തില് വീഴ്ച സംഭവിച്ചുവെന്നാണ് വിജിലന്സ് കണ്ടെത്തിയിരിക്കുന്നത്.കേസ് അന്വേഷണത്തെ കുറിച്ച് ലഭിച്ച പരാതിയില് വിജിലന്സ് അന്വേഷണം നടത്തുന്നതിനെ പോലീസ് എതിര്ത്തിരുന്നു. ജേക്കബ് തോമസിന്റെ റിപ്പോര്ട്ട് ഡിജിപി തള്ളുകയും ചെയ്തു. ഡിജിപി സര്ക്കാരിന് പരാതി നല്കുകയും ചെയ്തിരുന്നു.കോടതിയില് വിചാരണയിലെത്തി നില്ക്കുന്ന കേസില് വിജിലന്സ് റിപ്പോര്ട്ട് നിര്ണായകമാകും. ഒപ്പം സര്ക്കാരിനെ വെട്ടിലാക്കുന്നതുമാണ് റിപ്പോര്ട്ട്.
https://www.facebook.com/Malayalivartha
