കെ.എം.മാണിയെ യു ഡി എഫിലേക്ക് മടക്കി കൊണ്ടുവരാനുള്ള ചര്‍ച്ചക്ക് പി.കെ.കുഞ്ഞാലിക്കുട്ടിയെ നിയോഗിക്കാന്‍ ഹൈക്കമാന്റ് തീരുമാനമെന്ന് സൂചന. മാണിക്കെതിരെ മോശമായ ഭാഷയില്‍ മുഖപ്രസംഗം എഴുതിയ വീക്ഷണം പത്രാധിപരെ ശാസിക്കണമെന്നും ഹൈക്കമാന്റ് സംസ്ഥാന നേതൃത്വത്ത അറിയിച്ചതായി വിവരമുണ്ട്.

കോണ്‍ഗ്രസ് രാജ്യമെമ്പാടും പ്രതിസന്ധി നേരിടുമ്പോള്‍ രണ്ട് എം.പിമാരും ആറ് എം എല്‍ എ മാരുമുള്ള കെ.എം.മാണിയെ ഒഴിവാക്കുന്നതെങ്ങനെയെന്ന് ഹൈക്കമാന്റ് എം.എം.ഹസനോട് ആരാഞ്ഞു. എരിതീയില്‍ എണ്ണ ഒഴിക്കുന്ന പ്രവര്‍ത്തനമുണ്ടായാല്‍ ഹസന്റെ പണി പോകുന്ന സാഹചര്യമാണുള്ളത്.

ബാര്‍ക്കോഴ ആരോപണത്തില്‍ കെ.എം.മാണിയോട് ഇടതുപക്ഷം കാണിക്കുന്ന മൃദുസമീപനത്തിലും യുഡിഎഫിന് ഭയമുണ്ട്. ആറ് എം എല്‍ എ മാര്‍ പോയാല്‍ എന്താകുമെന്നാണ് യു ഡി എഫ് ചോദിക്കുന്നത്. കെ.എം.മാണിയുമായുള്ള വിഷയം രമേശ് ചെന്നിത്തലയാണ് വഷളാക്കുന്നതെന്ന തോന്നല്‍ ഹൈക്കമാന്റിനുണ്ട്.

കഴിഞ്ഞയാഴ്ച ഡല്‍ഹിയിലെത്തിയ കുഞ്ഞാലിക്കുട്ടിയുമായി സോണിയാ ഗാന്ധി ഇത് സംബന്ധിച്ച് ചര്‍ച്ച നടത്തിയിരുന്നു. കുഞ്ഞാലിക്കുട്ടി മധ്യസ്ഥനാകണം എന്നതായിരുന്നു പ്രധാന ആവശ്യം.

രാഷ്ട്രപതി തിരഞ്ഞെടുപ്പിന്റെ ചര്‍ച്ചകള്‍ക്കായി ഡല്‍ഹിയിലെത്തിയ ജോസ് കെ.മാണി എം.പിയുമായി സോണിയാ ഗാന്ധി അനൗപചാരികമായി സംസാരിച്ചിരുന്നു എന്നാണ് വിവരം.

എന്നാല്‍ കേരളത്തിലെ ചില കോണ്‍ഗ്രസ് നേതാക്കള്‍ കെ.എം.മാണിക്കെതിരെ സ്വീകരിക്കുന്ന നിലപാടുകളില്‍ അവര്‍ വ്രണിത ഹൃദയരാണ്. കെ.എം.മാണിക്കെതിരെ പ്രകോപനം പാടില്ലെന്ന് കെ പി സി സി പറഞ്ഞിട്ടും അത് കേള്‍ക്കാതെ അദ്ദേഹത്തിനെതിരെ നിലപാട് സ്വീകരിക്കുന്നവര്‍ പാര്‍ട്ടി അച്ചടക്കം ലംഘിക്കുന്നു എന്നു തന്നെയാണ് കോണ്‍ഗ്രസ് ഹൈക്കമാന്റ് വിശ്വസിക്കുന്നത്. രമേശ് ചെന്നിത്തലയെ ഹൈക്കമാന്റ് സംശയിക്കുന്നത് ഇത്തരമൊരു സാഹചര്യത്തിലാണ്.

കേരള കോണ്‍ഗ്രസ് മുഖപത്രമായ പ്രതിഛായ കോണ്‍ഗ്രസിനെതിരെ ലേഖനം എഴുതിയിട്ടില്ല. എല്‍ ഡി എഫ്, പാര്‍ട്ടി ചെയര്‍മാന് മുഖ്യമന്ത്രി പദം വാഗ്ദാനം ചെയ്തിട്ടും അദ്ദേഹം സ്വീകരിച്ചില്ലെന്നാണ് പ്രതിഛായ എഴുതിയത്. ഇത് കോണ്‍ഗ്രസിനോടുള്ള ആത്മബന്ധം കാരണമാണ്. എന്നാല്‍ അതിന് വീക്ഷണം നല്‍കിയ മറുപടി അഭിമാനത്തിന് നിരക്കുന്നതായിരുന്നില്ല.