അയ്യപ്പ ദര്‍ശനത്തിന്റെ പുണ്യം നുകരാന്‍ ഗാനഗന്ധര്‍വന്‍ സന്നിധാനത്തെത്തി. കന്നിക്കാരിയായി കൈപിടിച്ച് ഒപ്പം ഭാര്യ പ്രഭയും. പതിറ്റാണ്ടുകളായി അയ്യപ്പനെ പാടിയുറക്കുന്ന മധുരസ്വരത്തിന്റെ ഉടമയായ ഗായകന്‍ കെ.ജെ. യേശുദാസ് തികഞ്ഞ ഭക്തനായാണ് എത്തിയത്. കറുപ്പു മുണ്ടും വെള്ള ജുബ്ബയും സ്വാമി മുദ്രയുള്ള രുദ്രാക്ഷ മാലയുമണിഞ്ഞ് ചുണ്ടില്‍ അയ്യപ്പമന്ത്രവുമായി. കന്നിക്കെട്ടെടുത്ത് മല ചവിട്ടാന്‍ കറുപ്പുടുത്തായിരുന്നു പ്രഭയും.

പമ്പാ ഗണപതികോവിലില്‍ ഇരുവര്‍ക്കും ഇരുമുടിക്കെട്ടു നിറയ്ക്കുമ്പോള്‍ അകമ്പടിയായത് 'മണ്ണിലും വിണ്ണിലും തൂണിലും തുരുമ്പിലും ദൈവമിരിക്കുന്നു....' എന്ന അദ്ദേഹത്തിന്റെ തന്നെ പാട്ടായിരുന്നു.

പമ്പാഗണപതിയെ തൊഴുത്, തേങ്ങയുടച്ചു വിഘ്‌നം നീക്കി. ഉപദേവന്മാരെ തൊഴുത് മലകയറ്റം തുടങ്ങിയപ്പോള്‍ മഴയായി. ഡോളിയില്‍ കുടപിടിച്ചിരുന്നു മല കയറിയതിനാല്‍ അധികമാരും തിരിച്ചറിഞ്ഞില്ല.

സന്നിധാനം വലിയ നടപ്പന്തലിലെത്തിയപ്പോള്‍ ഡോളിയില്‍ നിന്നിറങ്ങി. ജുബ്ബയൂരി. അരയില്‍ കറുത്ത തോര്‍ത്തു കെട്ടി. നാളികേരം ഉടച്ച് പടി തൊട്ടുവന്ദിച്ചു. ശരണംവിളിച്ച് പതിനെട്ടാംപടി കയറി സോപാനത്തെത്തി ഇഷ്ടദേവനെ തൊഴുതു. ശ്രീലകത്തു നിന്നു കിട്ടിയ തീര്‍ഥം നെറുകയില്‍ സ്വീകരിച്ചു. പ്രസാദം തൊട്ടു.

മാളികപ്പുറത്തു തൊഴുത് മേല്‍ശാന്തി പുതുമന മനു നമ്പൂതിരിയില്‍ നിന്നു പ്രസാദവും സ്വീകരിച്ചു. കളഭാഭിഷേകം കണ്ടു തൊഴുതു. അയ്യപ്പ വിഗ്രഹത്തില്‍ അഭിഷേകം ചെയ്ത കളഭം തന്ത്രി കണ്ഠര് മഹേഷ് മോഹനരില്‍ നിന്നു സ്വീകരിച്ചപ്പോഴും സന്നിധാനമാകെ ഗന്ധര്‍വ സംഗീതത്തിന്റെ ഈരടികളായിരുന്നു.

തിരുനടയില്‍ നില്‍ക്കുമ്പോഴാണ് മഹാഗായകനെ കൂടുതലാളുകള്‍ തിരിച്ചറിഞ്ഞത്. ഭക്തഹൃദയങ്ങളില്‍ സ്ഥാനം ഉറപ്പിച്ച സ്വരത്തിന്റെ ഉടമയെ മൊബൈല്‍ ക്യാമറയില്‍ പകര്‍ത്താനുള്ള തിക്കും തിരക്കുമായി. എല്ലാവര്‍ക്കും അവസരം നല്‍കി.

വര്‍ഷങ്ങളയി ഹരിഹരാത്മജനെ പാടിയുറക്കുന്ന ഹരിവരാസനം നേരിട്ടുള്ള അര്‍ച്ചനയായി സോപാനത്തു നിന്നു ചൊല്ലി രാത്രി പത്തിന് ആ അനുഗൃഹീതമായ കണ്ഠത്തില്‍ നിന്ന് ഹരിവരാസനം ഒഴുകിയെത്തിയപ്പോള്‍ സ്വാമിഭക്തരും അതേറ്റു ചൊല്ലി.

നടന്നു മല കയറാനുള്ള ബുദ്ധിമുട്ടുണ്ട്. മനുഷ്യനെ മനുഷ്യന്‍ ചുമക്കുന്ന ഡോളിയില്‍ കയറാന്‍ മനസ്സ് അനുവദിച്ചിരുന്നില്ല. അതിനാലാണ് ഏതാനും വര്‍ഷം ദര്‍ശനത്തിന് എത്താഞ്ഞത്. ഡോളിയിലെങ്കിലും തിരുസന്നിധിയില്‍ എത്തണമെന്ന് പലരും നിര്‍ബന്ധിച്ചതിനാലാണ് കഴിഞ്ഞ വര്‍ഷം മുതല്‍ വീണ്ടും വരാന്‍ തുടങ്ങിയത്.