വരാപ്പുഴയില്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ മുഖ്യപ്രതി തിരുവനന്തപുരം തിരുമല എം.എസ്.പി നഗര്‍ ബഥേല്‍ ഹൗസില്‍ ശോഭ ജോണി(43)ന് 18 വര്‍ഷം തടവും 1.11 ലക്ഷം രൂപ പിഴയും എറണാകുളം അഡി. സെഷന്‍സ് കോടതി വിധിച്ചു. കുറ്റക്കാരനെന്ന് കണ്ടെത്തിയ ആര്‍മിയിലെ മുന്‍ കേണല്‍ ജയരാജന്‍ നായര്‍ (73)ക്ക് 11 വര്‍ഷമാണ് തടവ്. മറ്റുപ്രതികളായ തിരുവനന്തപുരം ശാസ്തമംഗലം കാഞ്ഞിരമ്പാറ അരുതക്കുഴി തച്ചങ്കേരി വീട്ടില്‍ കേപ് അനിയെന്ന അനില്‍ കുമാര്‍, കാസര്‍കോട് പട്ടമഥുര്‍ അര്‍ജുനഗളിയില്‍ പുഷ്പവതി, കണ്ണൂര്‍ പയ്യന്നൂര്‍ ചെറുപുഴ രാമപുരത്തൊഴുവന്‍ വീട്ടില്‍ വിനോദ് കുമാര്‍, ജിന്‍സന്‍ ജോസ്, ബൈജു. പി. വര്‍ഗീസ് എന്നിവരെ വെറുതേ വിട്ടിരുന്നു.

2011 മാര്‍ച്ചിലാണ് ശോഭാ ജോണിന്റെ നേതൃത്വത്തിലുള്ള സംഘം വരാപ്പുഴയില്‍ വാടകയ്ക്ക് വീടെടുത്ത് പെണ്‍വാണിഭം നടത്തിയത്. പൊലീസ് റെയ്ഡില്‍ അനാശാസ്യത്തിനാണ് ആദ്യം കേസ് എടുത്തത്. പെണ്‍കുട്ടിക്ക് പ്രായപൂര്‍ത്തിയായില്ലെന്ന് കണ്ടെത്തിയപ്പോള്‍ പീഡനക്കേസും ചുമത്തി.

കാസര്‍കോട്, ബംഗളുരു എന്നിവിടങ്ങളിലും സംഘം പെണ്‍കുട്ടിയെ കൊണ്ടുപോയി പലര്‍ക്കും കാഴ്ച വച്ചു എന്നാണ് കേസ്. മാനഭംഗം, പ്രായപൂര്‍ത്തിയാകാത്ത പെണ്‍കുട്ടിയെ ഉപദ്രവിച്ചു, അന്യായമായി തടങ്കലില്‍ വയ്ക്കുക, വധഭീഷണി, സംഘം ചേര്‍ന്നുള്ള കുറ്റകൃത്യം എന്നിവ തെളിഞ്ഞതായി കോടതി പറഞ്ഞു.

വരാപ്പുഴ പെണ്‍കുട്ടിയെ പീഡിപ്പിച്ചതുമായി ബന്ധപ്പെട്ട് 34 കേസുകളുണ്ട്. 24 എണ്ണത്തില്‍ കുറ്റപത്രം നല്‍കി. അഞ്ചില്‍ വിചാരണ പൂര്‍ത്തിയായി.