ബൈക്കിലെത്തിയ രണ്ട് യുവാക്കള്‍ ചേര്‍ന്ന് ഓട്ടോ െ്രെഡവറെ നടുറോഡിലിട്ട് ക്രൂരമായി മര്‍ദ്ദിച്ച കേസില്‍ ഒരാളെ പൊലീസ് അറസ്റ്റ് ചെയ്തു. മുടപുരം എസ്.എന്‍. ജംഗ്ഷന് സമീപം ഈച്ചരന്‍വിളാകത്ത് താമസിക്കുന്ന അനന്തുവാണ് പിടിയിലായത്. മറ്റൊരു പ്രതി മുടപുരം സ്വദേശി ശ്രീക്കുട്ടന്‍ ഒളിവിലാണ്. ഇയാളെ ഉടനെ പിടിക്കുമെന്ന് ആറ്റിങ്ങല്‍ സി.ഐ: അനില്‍കുമാര്‍ പറഞ്ഞു.

ഓട്ടോറിക്ഷാ െ്രെഡവറും പാചകത്തൊഴിലാളിയുമായ ആറ്റിങ്ങല്‍ മുടപുരം കൊച്ചാലുംമൂട് ചരുവിള വീട്ടില്‍ സുധീറാണ് (44) ഈ മാസം 13ന് ആക്രമണത്തിന് ഇരയായത്. മദ്യലഹരിയിലായിരുന്നപ്പോള്‍ ഉണ്ടായ പ്രകോപനമാണ് ആക്രമണത്തിന് കാരണമെന്ന് അനന്തു പൊലീസില്‍ മൊഴി നല്‍കി. പ്രതികള്‍ക്കെതിരെ വധശ്രമത്തിന് പൊലീസ് കേസെടുത്തു.

13 ന് വൈകുന്നേരം അഞ്ചു മണിയോടെ കനത്ത മഴയത്ത് മുടപുരം ജംഗ്ഷനില്‍ ബൈക്കിലെത്തിയ പ്രതികള്‍ അവിടെ വട്ടമിട്ടു കറങ്ങുകയും പല വാഹനങ്ങളെയും ഇടിക്കാന്‍ ശ്രമിക്കുകയും ചെയ്തു. സുഹൃത്തിനൊപ്പമെത്തിയ സുധീറിന്റെ ബൈക്കിലും ഇടിക്കാന്‍ ശ്രമിച്ചു. ഇത് ചോദ്യം ചെയ്ത സുധീറിനെ യുവാക്കള്‍ പിടിച്ചിറക്കി നടുറോഡിലിട്ട് മാരകമായി മര്‍ദ്ദിക്കുകയായിരുന്നു. മൃതപ്രായനായ സുധീറിനെ മര്‍ദ്ദിക്കുന്നത് തടയാന്‍ ശ്രമിച്ച നാട്ടുകാരോട് പ്രതികള്‍ തട്ടിക്കയറുകയും സുധീറിനെ വീണ്ടും മര്‍ദ്ദിക്കുകയും ചെയ്തു.തലയ്ക്കും നെഞ്ചിനും പരിക്കേറ്റ സുധീര്‍ ചിറയിന്‍കീഴ് താലൂക്കാശുപത്രയിലും ആറ്റിങ്ങലെ സ്വകാര്യ ആശുപത്രിയിലും ചികിത്സ തേടിയിരുന്നു.

സംഭവത്തിന്റെ പിറ്റേ ദിവസം ചിറയിന്‍കീഴ് പൊലീസില്‍ പരാതി നല്‍കിയെങ്കിലും ,പിന്നീട് പുറത്ത് വച്ച് മദ്ധ്യസ്ഥതയില്‍ പ്രതികള്‍ പണം നല്‍കി പ്രശ്‌നം ഒത്തുതീര്‍പ്പാക്കിയെന്നാണ് പൊലീസിന് ലഭിച്ച വിവരം. പൊലീസ് ആവശ്യപ്പെട്ടതനുസരിച്ച് സുധീര്‍ ഇന്നലെ വൈകിട്ട് സ്‌റ്റേഷനിലെത്തി മൊഴി നല്‍കിയിരുന്നു.