സര്‍വകലാശാലക്ക്‌ സംശയരോഗം; പെന്‍ക്യാമറ വരുന്നു, സിസിറ്റിവിയും
വൈസ്‌ ചാന്‍സലറെ പെണ്ണുങ്ങള്‍ പീഡിപ്പിക്കുമെന്ന്‌ ഭയന്ന്‌ സ്‌ത്രീകള്‍ക്ക്‌ പ്രവേശനം നിഷേധിച്ചതിന്‌ പിന്നാലെ കാമ്പസില്‍ സിസിറ്റിവി ക്യാമറകളും സെക്യൂരിറ്റി ഉദ്യോഗസ്ഥര്‍ക്ക്‌ പെന്‍ ക്യാമറകളും നല്‍കാന്‍ കാലിക്കറ്റ്‌ സര്‍വകലാശാല തീരുമാനിച്ചു. സര്‍വകലാശാലയിലെ മുഴുവന്‍ സെക്യൂരിറ്റിക്കാര്‍ക്കും പെന്‍ക്യാമറ നല്‍കും. ഇവര്‍ പോക്കറ്റില്‍ പേനയും തിരുകി നില്‍ക്കുമ്പോള്‍ മുമ്പില്‍ വരുന്നവരുടെയെല്ലാം തിരുമുഖം ക്യാമറയില്‍ പതിയും. വൈസ്‌ ചാന്‍സലറുടെ പോക്കറ്റില്‍ എത്ര പെന്‍ക്യാമറ തിരുകണം എന്നതിനെകുറിച്ച്‌ തര്‍ക്കം മുറുകിയെന്നും രസികന്മാര്‍ പറയുന്നത്‌. അടുത്തപടിയായി സംശയരോഗം സിലബസില്‍ ഉള്‍പ്പെടുത്തണമെന്നാണ്‌ കേള്‍ക്കുന്നത്‌. സംശയ രോഗത്തെ കുറിച്ച്‌ പഠിപ്പിക്കാന്‍ യോഗ്യന്‍ സര്‍വകലാശാലയിലെ പ്രമാണി തന്നെയാണെന്നും വിദ്യാര്‍ത്ഥികള്‍ പറയുന്നു.
തമാശയാണെന്ന്‌ കരുതരുത്‌. വി.സി. എം അബ്‌ദുള്‍സലാം ക്യാമറകള്‍ വാങ്ങാനുള്ള നിര്‍ദേശം സര്‍വകലാശാലയുടെ പര്‍ച്ചേസ്‌ വിംഗിന്‌ നല്‍കി കഴിഞ്ഞു. സര്‍വകലാശാലയിലെ സെക്യൂരിറ്റി സൂപ്രണ്ട്‌ പി. അബ്‌ദുള്‍ ഹമീദിനെ വിളിച്ചു വരുത്തിയും വി.സി ഇക്കാര്യം ആവശ്യപ്പെട്ടിട്ടുണ്ട്‌. സമരങ്ങളുടെ ദൃശ്യങ്ങള്‍ ഉടനടി പകര്‍ത്താന്‍ വേണ്ടിയാണ്‌ ഇത്തരം ക്യാമറകള്‍ സ്ഥാപിക്കുന്നതെന്നാണ്‌ സെക്യൂരിറ്റി ഉദ്യോഗസ്ഥര്‍ പറയുന്നത്‌. ഇതിനെ സ്വകാര്യതയിലേക്കുള്ള കടന്നുകയറ്റമാണെന്ന്‌ വിദ്യാര്‍ത്ഥി സംഘടനകള്‍ വാദിക്കുന്നു. അപ്പോള്‍ റെയില്‍വ സ്റ്റേഷനുകളിലെ സിസിറ്റിവി ക്യാമറയോ എന്നാണ്‌ വൈസ്‌ ചാന്‍സലര്‍ ചോദിക്കുന്നത്‌.
ക്യാമറകള്‍ വാങ്ങാന്‍ സര്‍ക്കാര്‍ അംഗീകാരം വേണമെന്നിരിക്കെ അതിന്റെയൊന്നും ആവശ്യമില്ലെന്നാണ്‌ വൈസ്‌ ചാന്‍സലര്‍ പര്‍ച്ചേസ്‌ വിഭാഗത്തിനു നല്‍കിയിരിക്കുന്ന നിര്‍ദ്ദേശം. ക്യാമറ വാങ്ങാന്‍ ക്വട്ടേഷന്‍ വാങ്ങണമെന്ന നിബന്ധനയും പാലിക്കേണ്ടതില്ലത്രേ. സര്‍വകലാശാലയിലെ ധനകാര്യവിഭാഗം ക്വറിയിട്ടാല്‍ താനത്‌ മറികടക്കുമെന്നാണ്‌ വൈസ്‌ ചാന്‍സലര്‍ ഉദ്യോഗസ്ഥരോട്‌ പറയുന്നത്‌. വേണമെങ്കില്‍ സര്‍ക്കാര്‍ അംഗീകാരം വാങ്ങാനും മടിക്കില്ലെന്ന്‌ വി.സി പറയുന്നു.
കാലിക്കറ്റ്‌ സര്‍വകലാശാല വളപ്പില്‍ സമരങ്ങള്‍ ഒരുത്തരവിലൂടെ ഹൈക്കോടതി വിലക്കിയിട്ടുണ്ട്‌. എന്നിട്ടും സമരങ്ങള്‍ നിര്‍ബാധം തുടരുന്നു. സമരക്കാരുടെ വീഡിയോ ചിത്രീകരണം ഇല്ലാത്തതു കാരണം, ഇക്കാര്യം ഹൈക്കോടതിയെ അറിയിക്കാനുവിന്നില്ലെന്നാണ്‌ വൈസ്‌ ചാന്‍സലര്‍ പറയുന്നത്‌. സമരക്കാര്‍ കുട്ടികളാണെന്ന കാര്യം ഹൈക്കോടതിയുടെ ശ്രദ്ധയിലെത്തിച്ചാല്‍ നടപടി വരുമെന്നാണ്‌ വി.സി.യുടെ പക്ഷം.
അതേസമയം കോഴിക്കോട്‌ സര്‍വകലാശാലയിലെ മൊത്തം 80 ശതമാനം വരുന്ന വനിതകളെ അപമാനിക്കാനുള്ള ശ്രമമാണ്‌ ക്യാമറകള്‍ സ്ഥാപിക്കുന്നതിന്‌ പിന്നിലെന്ന്‌ വിദ്യാഭ്യാസ സംഘടനകള്‍ ആരോപിക്കുന്നു. ഇത്തരം വിഷ്വലുകള്‍ ദുരുപയോഗം ചെയ്യപ്പെടുമെന്നും വിദ്യാര്‍ത്ഥികള്‍ വാദിക്കുന്നു. കാലിക്കറ്റ്‌ സര്‍വകലാശാല പട്ടാള ക്യാമ്പാണോ എന്ന സംശയവും ജീവനക്കാരും വിദ്യാര്‍ത്ഥികളും ഉന്നയിക്കുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
