പ്രതിപക്ഷ നേതാവ് രമേശ് ചെന്നിത്തല നയിക്കുന്ന പടയൊരുക്കം സമരജാഥ ഇന്ന് കോട്ടയം ജില്ലയിലെ പര്യടനം പൂര്‍ത്തിയാക്കും. ഉമ്മന്‍ ചാണ്ടിയുടെ സ്വന്തം തട്ടകമായ ജില്ലയില്‍ ജാഥയ്ക്ക് വിപുലമായ സ്വീകരണ പരിപാടികളാണ് ഒരുക്കിയിരുന്നത്. ഉമ്മന്‍ ചാണ്ടിയെ ഒറ്റതിരിഞ്ഞാക്രമിക്കാനുള്ള എല്‍ഡിഎഫ് നീക്കത്തെ യുഡിഎഫ് ഒറ്റക്കെട്ടായി നേരിടുമെന്നായിരുന്നു ചെന്നിത്തലയുടെ പ്രഖ്യാപനം.

ജനനായകന്റെ മണ്ണിലേക്ക് പടനായകന് സ്വാഗതമെന്നായിരുന്നു കോട്ടയം ജില്ലയിലെ പടയൊരുക്കം ജാഥയുടെ പ്രചരണബോര്‍ഡുകള്‍. ഉമ്മന്‍ചാണ്ടിയുടെയും എ ഗ്രൂപ്പ് പ്രമുഖരുടെയും ജില്ലയില്‍ അതിവിപുലമായ സ്വീകരണമാണ് ജാഥയ്ക്ക് ഒരുക്കിയിരുന്നത്. പുതുപ്പള്ളിയില്‍ ആനയും അമ്ബാരിയും വര്‍ണവാദ്യാഘോഷങ്ങളുടെയും അകമ്ബടിയോടെയായിരുന്നു ജാഥയ്ക്ക് വരവേല്‍പ്പ്. ഉമ്മന്‍ചാണ്ടിയെ വാനോളം പുകഴ്ത്തിയായിരുന്നു ജാഥാക്യാപ്റ്റന്റെ പ്രസംഗം.

ജാഥ നയിക്കുന്നത് പ്രതിപക്ഷനേതാവായിരുന്നെങ്കിലും കൈയടിയും ആര്‍പ്പുവിളിയും കൂടുതല്‍ ലഭിച്ചത് ഉമ്മന്‍ ചാണ്ടിക്ക് തന്നെയായിരുന്നു. പ്രവര്‍ത്തകരെ അഭിനന്ദിച്ച് സ്വീകരണത്തെക്കുറിച്ച് ഉമ്മന്‍ ചാണ്ടിയും നേതാക്കളെ ബോധ്യപ്പെടുത്തി.ഗ്രൂപ്പ് വൈരങ്ങളോ അഭിപ്രായഭിന്നതകളോ പ്രകടമാകാതിരിക്കാന്‍ കൃത്യമായ ഗൃഹപാഠം നേതാക്കള്‍ നേരിട്ട് ഇടപെട്ട് ക്രമീകരിച്ചിരുന്നു. എല്ലാ സ്വീകരണകേന്ദ്രങ്ങളിലും സ്ത്രീകളുള്‍പ്പെടെ ഉള്ളവരുടെ വലിയ പ്രാതിനിധ്യവും ശ്രദ്ധേയമായിരുന്നു.