നിലമ്പൂര്‍ എം.എല്‍.എ അനധികൃതമായി നിര്‍മിച്ച തടയണ പൊളിക്കണമെന്ന മലപ്പുറം ജില്ലാ കളക്ടറുടെ ഉത്തരവ് ഹൈക്കോടതി തല്‍ക്കാലത്തേക്ക് സ്‌റ്റേ ചെയ്തു. ഇത് സംബന്ധിച്ച വിശദമായ വാദം ക്രിസ്മസ് അവദിക്ക് ശേഷം കോടതി കേള്‍ക്കും. അന്‍വറിന്റെ ഭാര്യാ പിതാവ് അബ്ദുള്‍ ലത്തീഫ് നല്‍കിയ ഹര്‍ജിയിലാണ് കോടതി ഉത്തരവ്. ഏറനാട് താലൂക്കില്‍ തനിക്കുള്ള എട്ടേക്കര്‍ ഭൂമിയിലാണ് തടയണ നിര്‍മിച്ചതെന്നും തന്റെ ഭാഗം കേള്‍ക്കാതെയാണ് തടയണ പൊളിക്കാന്‍ കളക്ടര്‍ ഉത്തരവിട്ടത്. തടയണ അനധികൃതമായി നിര്‍മിച്ചതാണെന്ന് കാട്ടി വിവിധ വകുപ്പുകള്‍ റിപ്പോര്‍ട്ട് നല്‍കിയിട്ടുണ്ട്. ഇതിന്റെയൊന്നും പകര്‍പ്പ് തനിക്ക് ലഭിച്ചിട്ടില്ലെന്നും ഹര്‍ജിക്കാരന്‍ കോടതിയില്‍ വ്യക്തമാക്കി. ഇതേ തുടര്‍ന്നാണ് കോടതി സ്‌റ്റേ നല്‍കിയത്. 

അതേസമയം തടയണ പൊളിക്കണമെന്നും പി.വി അന്‍വറിന്റെ നിയമലംഘനങ്ങള്‍ തടയണമെന്നും ആവശ്യപ്പെട്ട് കോണ്‍ഗ്രസ് ഇന്ന് കളക്ടറേറ്റിന് മുന്നില്‍ നടത്താനിരുന്ന രാപ്പകല്‍ സമരം പ്രഹസനമായി ഒതുങ്ങി. രാപ്പകല്‍ സമരത്തിന് പകരം വൈകുന്നേരം വരെയുള്ള പ്രതിഷേധമായി ചുരുക്കിയിരിക്കുകയാണ്. നിശ്ചയിച്ചതിലും ഒരു മണിക്കൂര്‍ വൈകിയാണ് സമരം തുടങ്ങിയത്. സമരം ഉദ്ഘാടനം ചെയ്യാന്‍ പ്രതിപക്ഷനേതാവ് രമേശ് ചെന്നിത്തല 11 മണിവരെ എത്തിയിരുന്നില്ല. താമസിക്കാതെ എത്തുമെന്ന് കോണ്‍ഗ്രസ് ജില്ലാ നേതൃത്വം അറിയിച്ചു. തടയണ നിര്‍മിക്കാന്‍ അനുമതി നല്‍കിയ കൂടരഞ്ഞി പഞ്ചായത്ത് പ്രസിഡന്റും സമരത്തില്‍ പങ്കെടുക്കുന്നുണ്ട്.

തടയണ പൊളിക്കണമെന്ന് ആവശ്യപ്പെട്ട് ശക്തമായ സമരപരിപാടികള്‍ സംഘടിപ്പിക്കുമെന്ന് കഴിഞ്ഞ മാസം 23നാണ് കോണ്‍ഗ്ര് ജില്ലാ നേതൃത്വം പ്രഖ്യാപിച്ചത്. ആദ്യഘട്ടത്തില്‍ ശക്തമായ സമരം വേണ്ടെന്നും രണ്ടാംഘട്ടത്തില്‍ സമരം ശക്തമാക്കുമെന്നും കോഴിക്കോട് ഡി.സി.സി പ്രസിഡന്റ് ടി. സിദ്ദിഖ് അറിയിച്ചു. കോണ്‍ഗ്രസ് പ്രദേശികനേതൃത്വം തുടക്കംമുതല്‍ അന്‍വറിന് അനുകൂലമായ നിലപാടുകളാണ് സ്വീകരിച്ചിരുന്നത്. സംസ്ഥാന നേതൃത്വം ഇതിനെതിരെ രംഗത്തെത്തിയെങ്കിലും നിലപാടില്‍ അയവ് വരുത്തിയിരുന്നില്ല. ഇപ്പോഴത്തേത് ജനങ്ങളുടെ കണ്ണില്‍ പൊടിയിടാനുള്ള തന്ത്രമാണെന്ന് നാട്ടുകാര്‍ ആരോപിക്കുന്നു.