സി.പി.എമ്മിന്റെ സമുന്നതനായ നേതാവായിരുന്ന കെ .ജി . ദാമോദരനുണ്ണിത്താന്‍ മരണമടഞ്ഞിട്ട് ഡിസബര്‍ 22 നു മുപ്പത്തിയൊന്നു വര്‍ഷം തികയുകയാണ്. അടൂര്‍, പള്ളിക്കല്‍ സ്വദേശിയായ കെ.ജിയെ ഒരിക്കല്‍ പരിചയപ്പെട്ടവരാരും പെട്ടെന്ന് മറക്കില്ല. 1986 ഡിസബര്‍ 22 നാണ് അദ്ദേഹം മരിച്ചത്. സി.പി.എം സംസ്ഥാന സെക്രട്ടറിയേറ്റ് അംഗവും ഇടത് മുന്നണിയിലെ പ്രമുഖ നേതാവുമായിരുന്ന കെ.ജി സാധാരണക്കാരുടേയും, കര്‍ഷകത്തൊഴിലാളികളുടേയും നേതാവായാണ് പൊതു പ്രവര്‍ത്തനം ആരംഭിച്ചത് . ചെറുപ്പത്തിലെ പ്രസംഗ വേദികളിലെ ശ്രദ്ധേയ സാന്നിദ്ധ്യമായി . 

രണ്ടാം ലോക മഹായുദ്ധ കാലത്ത് ഫാസിസ്റ്റു ശക്തികള്‍ക്കൊപ്പം ചേര്‍ന്ന ജപ്പാനെ തുറന്നുകാട്ടാനായി പാര്‍ട്ടി സംഘടിപ്പിച്ച ജപ്പാന്‍ വിരുദ്ധ മേളകളില്‍ നടത്തിയ ഉജ്വല പ്രസംഗങ്ങളാണു കെ.ജി.ദാമോദരനുണ്ണിത്താനെ ജനങ്ങള്‍ക്കിടയില്‍ പ്രിയങ്കരനാക്കിയത്. അക്കാലത്ത് എ.കെ.ജി , പി.കൃഷ്ണപിള്ള എന്നിവരുമായി ഇടപഴകാന്‍ ലഭിച്ച അവസരം ലഭിച്ചു. വര്‍ഗ രാഷ്ട്രീയത്തിന്റെ പുതിയ പാഠങ്ങള്‍ ്അങ്ങനെയാണ് സ്വായത്തമാക്കിയത്. കൊല്ലം ജില്ലാ കമ്മിറ്റി സെക്രട്ടറിട്ടറിയേറ്റു മെമ്പറായി തെരഞ്ഞെടുക്കപ്പെട്ട കെ .ജി 59 ല്‍ സംസ്ഥാന കമ്മറ്റിയിലേക്കു തിരഞ്ഞെടുക്കപ്പെട്ടു.

സൗമ്യമായ പെരുമാറ്റത്തോടൊപ്പം അനീതിക്കും അക്രമത്തിനുമെതിരായ കാര്‍ക്കശ്യനിലപാടും കെ.ജി എടുത്തിരുന്നു. അദ്ദേഹത്തെ വ്യക്തിപരമായി തേജോവധം ചെയ്യാനായി മാര്‍ക്‌സിസ്റ്റ് വിരുദ്ധ വക്താക്കള്‍ നികൃഷ്ടമായ പല മാര്‍ഗങ്ങളും ഉപയോഗിച്ചു. അമ്പരപ്പിക്കുന്ന അഴിമതിക്കഥകള്‍ അദ്ദേഹത്തിനെതിരെ പ്രചരിപ്പിച്ചു. അടൂരിലും , കൊല്ലത്തും ധാരാളം വസ്തുക്കള്‍ വാങ്ങി കൂട്ടിയെന്നു പോലും കഥകളുണ്ടായി. പരത്തി . കൊട്ടാര സദൃശമായ വീടുണ്ടന്നും അതില്‍ വില പറയാനാവാത്ത പലതും ശേഖരിച്ചിട്ടുണ്ടെന്നും എതിരാളികള്‍ ആക്ഷേപിച്ചു. ഇതിനെയെല്ലാം അദ്ദേഹം സമചിത്തതയോടെ നേരിട്ടു. 
ചെറിയൊരു ഒരു വീട് സ്വന്തമായി പണിയാന്‍ പെട്ടപാട് സഖാവിനും, ഭാര്യക്കുമേ അറിയുകയുള്ളൂ . അതിനു വേണ്ടി കുടുംബ വക കിട്ടിയ ഭൂമി വില്‍ക്കേന്‍ണ്ടി വന്നു . അതു പോലെ പാര്‍ട്ടി പ്രവര്‍ത്തനത്തിനായി ഏക്കറു കണക്കിന് ഭുമി തുച്ചമായ വിലയ്ക്കു വില്‍ക്കുകയും ചെയ്തു.
കെ.ജി പല തവണ അറസ്റ്റിലായിട്ടുണ്ട്, അടിയന്തരാവസ്ഥക്കാലത്ത് 18 മാസം ജയില്‍വാസ്സം അനുഭവിക്കേണ്ടി വന്നു. സഖാവ് ഇ എം എസ്സ് പല സന്ദര്‍ഭങ്ങളിലും വന്നു താമസ്സിച്ചിട്ടുള്ളത് കെ.ജി യുടെ വസ്സതിയിലായിരുന്നു.. ആ ദിനങ്ങളൊക്കെയും പള്ളിക്കലിലേ കമ്മ്യൂണിസ്റ്റ്കാര്‍ക്കെല്ലാം മറക്കാന്‍ കഴിയുന്ന കാര്യമായിരുന്നില്ലായെന്ന് ഇന്നു ജീവിച്ചിരിക്കുന്ന പഴയകാല സഖാക്കളും ഓര്‍മിക്കുന്നു. 

സി.പി ഐയും കോണ്‍ഗ്രസും ഒരുമിച്ച് നിലയുറപ്പിച്ച അവസ്സരത്തിലാണ് തെങ്ങമം ബാലകൃഷ്ണനെതിരായി കെ.ജി അടൂരില്‍ മല്‍സരിച്ചത്. മൂവായിരം വോട്ടിന്് കെ.ജി അന്ന് പരാജയപ്പെട്ടു. അടൂര്‍ പള്ളിക്കല്‍ പഞ്ചായത്തിന്റെ രൂപീകരണം മുതല്‍ മരിക്കുംവരെ പ്രസിഡന്റ് ആയിരുന്നു കെ.ജി. പാര്‍ടിക്കെതിരെ വരുന്ന എല്ലാ കൂരമ്പുകളെയും ശക്തമായി നേരിടുകയും മറ്റെല്ലാ താല്പര്യങ്ങള്‍ക്കും ഉപരിയായി പാര്‍ടി താല്‍പര്യങ്ങള്‍ക്ക് മാത്രം പ്രാധാന്യം നല്‍കി മുന്നോട്ടു പോകുന്ന രീതിയായിരുന്നു അദ്ദേഹത്തിനുണ്ടായിരുന്നത്. മരിച്ചിട്ട് മൂന്ന് പതിറ്റാണ്ട് പിന്നിടുമ്പോഴും സഖാവിന്റെ ജ്വലിക്കുന്ന ഓര്‍മകള്‍ പള്ളിക്കലില്‍ നിറഞ്ഞ് നില്‍ക്കുന്നു.