സോളാര് കേസില് സരിത എസ്. നായര്ക്കും ഗണേഷ് കുമാറിനുമെതിരെ സരിതയുടെ മുന് അഭിഭാഷകനായിരുന്ന ഫെനി ബാലകൃഷ്ണന് മൊഴി നല്കി
സോളാര് കേസില് സരിത എസ്. നായര്ക്കും ഗണേഷ് കുമാറിനുമെതിരെ സരിതയുടെ മുന് അഭിഭാഷകനായിരുന്ന ഫെനി ബാലകൃഷ്ണന് കൊട്ടാരക്കര ഒന്നാം ക്ലാസ് ജുഡീഷ്യല് മജിസ്ട്രേറ്റ് കോടതിയില് മൊഴി നല്കി. സോളാര് കമ്മിഷന് മുമ്പാകെ സരിത നല്കിയ കത്തില് മുന് മുഖ്യമന്ത്രി ഉള്പ്പെടെയുള്ള കോണ്ഗ്രസ് നേതാക്കള്ക്കെതിരെയുള്ള ആരോപണങ്ങള് ഗണേഷ് കുമാറിന്റെ നിര്ദ്ദേശപ്രകാരം എഴുതി ചേര്ത്തതാണെന്നാരോപിച്ച് മുന് ജില്ലാ ഗവണ്മെന്റ് പ്ലീഡര് സുധീര് ജേക്കബ് ഫയല് ചെയ്ത ഹര്ജിയിലാണ് ഫെനി ബാലകൃഷ്ണന് കോടതിയില് മൊഴി നല്കിയത്.
സുധീര് ജേക്കബ് ഹര്ജിയില് പറഞ്ഞ ആരോപണങ്ങള് ശരിവയ്ക്കുന്ന തരത്തിലാണ് ഫെനി ബാലകൃഷ്ണന് കോടതിയില് മൊഴി നല്കിയത്. സോളാര് കമ്മീഷന് മുമ്പാകെ ഹാജരാക്കിയ 25 പേജുകളുള്ള കത്ത് പത്തനംതിട്ട ജില്ലാ ജയിലില് വച്ച് ഫെനി ബാലകൃഷ്ണന് ലഭിക്കുമ്പോള് 21 പേജുകളേ ഉണ്ടായിരുന്നുള്ളൂവെന്നും പിന്നീട് ആ കത്ത് ഗണേഷ് കുമാറിന്റെ ബന്ധുവായ ശരണ്യാ മനോജിനെ ഏല്പ്പിച്ചതായും പിന്നീട് ഗണേഷ് കുമാറിന്റെ നിര്ദ്ദേശ പ്രകാരം ശരണ്യ മനോജും ഗണേഷ് കുമാറിന്റെ പി. എ പ്രദീപ് കുമാറും ചേര്ന്ന് നാല് പേജുള്ള ഒരു ഡ്രാഫ്റ്റ് തയ്യാറാക്കി സരിതയെ ഏല്പിക്കുകയായിരുന്നു.
സരിത അന്നേ ദിവസം തന്നെ നാല് പേജ് കൂടി തിരുവനന്തപുരത്തെ വസതിയില് വച്ച് പുതുതായി എഴുതി ചേര്ത്തുവെന്നും ഗണേഷ് കുമാറിനെ മന്ത്രിസഭയില് നിന്നും പുറത്താക്കിയതാണ് ഇത് ചെയ്യുന്നതിന് പ്രേരണ ആയിട്ടുള്ളതെന്നും ഫെനി ബാലകൃഷ്ണന് കോടതി മുമ്പാകെ മൊഴി നല്കി. സോളാര് കേസില് തുടക്കം മുതല് തന്നെ സരിത ബ്ലാക്ക്മെയിലിങ്ങാണ് നടത്തിയിട്ടുള്ളതെന്നും ഇതിന് തെളിവായി ശരണ്യ മനോജടക്കമുള്ളവരുടെ റെക്കോര്ഡ് ചെയ്ത ഫോണ് സംഭാഷണങ്ങള് തന്റെ കൈവശമുണ്ടെന്നും ഫോണ് സംഭാഷണങ്ങള് കോടതി ആവശ്യപ്പെട്ടാല് സമര്പ്പിക്കാന് തയ്യാറാണെന്നും അദ്ദേഹം വ്യക്തമാക്കി.
സീസണ് അനുസരിച്ച് ഏത് രാഷ്ട്രീയ പാര്ട്ടി നേതാക്കന്മാര്ക്കെതിരെയും ഇവര് ആരോപണങ്ങള് ഉന്നയിക്കാമെന്നും സരിതയുടെ താളത്തിനൊത്ത് നില്ക്കാന് കഴിയാത്തതു കൊണ്ടാണ് താന് സരിതയുടെ വക്കാലത്തില് നിന്നും പിന്മാറിയതെന്നും ഫെനി പിന്നീട് മാധ്യമങ്ങളോട് പറഞ്ഞു.
https://www.facebook.com/Malayalivartha
