പ്ലസ് ടു ബാച്ചുകള് അനുവദിച്ച രേഖകള് ഹാജരാക്കണമെന്ന് കോടതി
സംസ്ഥാനത്ത് പ്ലസ് ടു സ്കൂളുകളും അധിക ബാച്ചുകളും അനുവദിച്ച രേഖകള് ഹാജരാക്കണമെന്ന് കോടതി നിര്ദ്ദേശിച്ചു. അധിക ബാച്ചുകള് അനുവദിച്ചതില് സര്ക്കാര് ഹയര് സെക്കന്ഡറി ഡയറക്ടറുടെ ശുപാര്ശ മറികടന്നിട്ടുണ്ടോ എന്നു ഹൈക്കോടതി പരിശോധിക്കുന്നു. പ്ലസ് ടു വിഷയത്തില് സര്ക്കാര് നടപടികള് എത്രത്തോളം സുതാര്യമാണെന്നു വിലയിരുത്തുമെന്നു കോടതി വ്യക്തമാക്കി. ഈ വര്ഷം 700 പ്ലസ് ടു ബാച്ചുകളാണ് അനുവദിച്ചിരിക്കുന്നത്.
പ്ലസ് ടു അനുവദിച്ചതില് അപാകത ആരോപിക്കുന്ന 48 ഹര്ജികളാണു ജസ്റ്റിസ് പി.ആര്. രാമചന്ദ്രമേനോന് പരിഗണിക്കുന്നത്. ഹയര് സെക്കന്ഡറി ഡയറക്ടര് സ്ഥലപരിശോധന നടത്തിയ ശേഷമാണോ ശുപാര്ശ നല്കിയതെന്ന്, വാദത്തിനിടെ കോടതി ചോദിച്ചു. കേസില് നാളെ വാദം തുടരും. പ്ലസ് ടു കാര്യത്തില് മാനദണ്ഡങ്ങളും വ്യവസ്ഥകളും പാലിച്ചാണു സര്ക്കാര് നടപടിയെന്നു ഗവണ്മെന്റ് പ്ലീഡര് ടി.ടി. മഹമ്മൂദ് ബോധിപ്പിച്ചു. ഓരോ പ്രദേശത്തിന്റെയും വിദ്യാഭ്യാസാവശ്യവും സ്കൂളുകളുടെ യോഗ്യതയും പരിഗണിച്ചാണു നടപടി.
ഈ വര്ഷത്തെ പ്ലസ് ടു പ്രവേശനം അവസാനിക്കാറായ ഘട്ടത്തില് കോടതി ഇടപെടുന്നതു കടുത്ത ആശയക്കുഴപ്പമുണ്ടാക്കും. ആയിരക്കണക്കിനു വിദ്യാര്ഥികളുടെ ഭാവിയെ ദോഷകരമായി ബാധിക്കുമെന്നും സര്ക്കാര് വാദിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
