കോണ്‍ഗ്രസുമായി ബന്ധം വേണമെന്ന സി.പി.എം ജനറല്‍സെക്രട്ടറി സീതാറാംയെച്യൂരിയുടെയും സി.പി.ഐയുടെയും നിലപാടിനെ മുഖ്യമന്ത്രി പിണറായി വിജയന്‍ തള്ളി. സി.പി.ഐ സംസ്ഥാന സമ്മേളനത്തോട് അനുബന്ധിച്ച് മലപ്പുറത്ത് നടന്ന ഇടത്പക്ഷം- പ്രതീക്ഷകളും സാധ്യതകളും എന്ന സെമിനാറില്‍ സംസാരിക്കുകയായിരുന്നു അദ്ദേഹം. സാമ്രാജ്യത്വ പ്രീണനമാണ് കോണ്‍ഗ്രസ് നടത്തുന്നത്. ന്യൂനപക്ഷങ്ങളും ജനാധിപത്യവാദികളും കോണ്‍ഗ്രസിനെ കൈവിട്ടു. ബി.ജെ.പിക്കെതിരെ കോണ്‍ഗ്രസിനെ കൂട്ടാനാവില്ല. യു.പി, ബീഹാര്‍, ഹിമാചല്‍, ആസാം എന്നിവിടങ്ങളില്‍ കോണ്‍ഗ്രസ് ഉണ്ടാക്കിയ തെരഞ്ഞെടുപ്പ് സംഖ്യങ്ങള്‍ക്ക് എന്ത് സംഭവിച്ചു എന്ന് പരിശോധിച്ചാല്‍ ഇക്കാര്യം വ്യക്തമാകും. ഗുജറാത്തില്‍ ബി.ജെ.പിക്കെതിരെ ശക്തമായ ജനവികാരം ഉണ്ടായിട്ടും കോണ്‍ഗ്രസ് വിജയിച്ചില്ല. കാരണം അവരുടെ തെറ്റായ പ്രവര്‍ത്തന ശൈലിയാണെന്നും മുഖ്യമന്ത്രി ചൂണ്ടിക്കാട്ടി.

ഇടത്പക്ഷത്തിന്റെ പ്രസക്തി രാജ്യത്ത് വര്‍ദ്ധിക്കുകയാണ്. ആഗോളവല്‍ക്കരണ നയങ്ങള്‍ക്കെതിരെ ശക്തമായ നയം മുന്നോട്ട് വയ്ക്കുന്നത് ഇടത്പക്ഷമാണെന്നും പിണറായി പറഞ്ഞു. അമേരിക്കയുടെ ഏകലോകക്രമം എന്ന വിദേശനയത്തിനെതിരെ ബദല്‍ മുന്നോട്ട് വയ്ക്കുന്നത് ഇടത്പക്ഷമാണ്. ബി.ജെ.പിക്കെതിരായ സമരത്തില്‍ കോണ്‍ഗ്രസുമായി സംഖ്യം ചേര്‍ന്ന് മുന്നോട്ട് പോകണമെന്ന ബദല്‍കാഴ്ചപാട് അവതരിപ്പിച്ച് മുന്നോട്ട് പോകാനാവില്ല. മുന്‍കാല അനുഭവങ്ങളില്‍ നിന്ന് ഇക്കാര്യം വ്യക്തമാകും. നവലിബറല്‍ നയങ്ങളാണ് കോണ്‍ഗ്രസ് നടപ്പാക്കുന്നത്. അവരുമായി ചേര്‍ന്ന് പ്രവര്‍ത്തിച്ചാല്‍ ജനങ്ങളെ വിശ്വാസത്തിലെടുക്കാനാകില്ല. ജനജീവിതം തകര്‍ത്ത പാര്‍ട്ടിയും ഭരണനേതൃത്വവുമാണ് കോണ്‍ഗ്രസ്. അതെല്ലാവര്‍ക്കും അറിയാം. മതനിരപേക്ഷ രാഷ്ട്രീയം മുന്നോട്ട് വെച്ച് സന്ധിയില്ലാതെ പൊരുതുകയാണ് ഇടത് നയം. അതിന് കോണ്‍ഗ്രസുമായി ചേര്‍ന്ന് നിന്നാല്‍ ശരിയാകില്ലെന്നും മുഖ്യമന്ത്രി വ്യക്തമാക്കി.

ബി.ജെ.പിയെ വളര്‍ത്തിയത് കോണ്‍ഗ്രസ് നയങ്ങളാണ്. ഏച്ചുകെട്ടിയ കൂട്ടുകെട്ടുകള്‍ ജനംതള്ളും. വര്‍ഗീയ ശക്തികളുമായി കോണ്‍ഗ്രസ് നേതാക്കള്‍ വരെ സമരസപ്പെടുന്നു എന്നും മുഖ്യമന്ത്രി ചൂണ്ടിക്കാട്ടി.