സി.ബി.ഐയെ കാട്ടി സി.പി.എമ്മിനെ ആരും വെരട്ടണ്ടെന്ന് സി.പി.എം കണ്ണൂര്‍ ജില്ലാ സെക്രട്ടറി പി.ജയരാജന്‍. ഷുഹൈബ് വധത്തില്‍ സി.ബി.ഐ അന്വേഷണം പ്രഖ്യാപിച്ച ഹൈക്കോടതി നടപടിയോട് പ്രതികരിക്കുകയായിരുന്നു അദ്ദേഹം. ഇത്തരം സംഭവങ്ങള്‍ക്ക് ഓശാനപാടുന്ന വലത്പക്ഷ മാധ്യമങ്ങളോടും പറയാനുള്ളത് ഇതു തന്നെയാണ്. സി.പി.എമ്മിനെ അടിച്ചമര്‍ത്താന്‍ വലത്പക്ഷ മാധ്യമങ്ങളും പ്രോല്‍സാഹനം നല്‍കുന്നുണ്ട്.

തൃപുരയില്‍ ആര്‍.എസ്.എസുകാര്‍ ഗര്‍ഭിണിയെ അടക്കം കൊലപ്പെടുത്തി. രാജ്യത്ത് നിന്ന് കമ്മ്യൂണിസ്റ്റുകാരെ തുടച്ച് നീക്കാനുള്ള ആര്‍.എസ്.എസ് ശ്രമത്തിന് കോണ്‍ഗ്രസും കൂട്ട് നില്‍ക്കുന്നു. തൃപുരയില്‍ അക്രമം നടത്തുന്നത് പഴയ കോണ്‍ഗ്രസുകാരാണ്. ചുവപ്പ് ഭീകരത എന്ന മുദ്രാവാക്യം ഉയര്‍ത്തിയത് ആര്‍.എസ്.എസുകാരാണ്. ഷുഹൈബ് വധത്തെ തുടര്‍ന്ന് നിരാഹാരം കിടന്ന കോണ്‍ഗ്രസ് നേതാവ് കെ.സുധാകരനും ഉയര്‍ത്തിയത് ചുവപ്പ് ഭീകരത എന്നാണ്. ത്രിപുരയില്‍ ഇടത്പക്ഷത്തെ തുടച്ച് നീക്കാന്‍ നടത്തുന്ന ഭീകരത ആര്‍.എസ്.എസും കോണ്‍ഗ്രസും കേരളത്തിലും നടത്തുകയാണെന്നും ജയരാജന്‍ ആരോപിച്ചു.

ഷുഹൈബ് വധം ശരിയായ രീതിയിലാണ് കേരളാ പോലീസ് അന്വേഷിച്ചത്. പ്രതികളെ പിടികൂടി. അവര്‍ ഡെമ്മികളാണെന്ന് കോണ്‍ഗ്രസ് നേതാക്കള്‍ ആദ്യം പറഞ്ഞെങ്കിലും പിന്നീട് തിരുത്തി. ഗൂഢാലോചന ഉള്‍പ്പെടെ അന്വേഷിച്ചുവരുകയായിരുന്നു. കേസ് സി.ബി.ഐക്ക് വിടണമെന്ന കോടതി വിധിയെ കുറിച്ച് അറിഞ്ഞു. അങ്ങനെ നടക്കട്ടെ. ഫെബ്രുവരി 12ന് എടയന്നൂരില്‍ ഷുഹൈബ് കൊല്ലപ്പെട്ടതിന്റെ പിറ്റേദിവസം തന്നെ സി.പി.എം നിലപാട് വ്യക്തമാക്കിയിരുന്നു; ഞങ്ങള്‍ക്കിതില്‍ പങ്കില്ലെന്ന്. ആ നിലപാട് ഇപ്പോഴും ആവര്‍ത്തിക്കുന്നു. കോടതി സര്‍ക്കാരിന്റെ ഭാഗം ശരിയായി കേട്ട ശേഷമാണോ അന്വേഷണം പ്രഖ്യാപിച്ചതെന്ന് അറിയില്ല. ഇക്കാര്യം സര്‍ക്കാര്‍ വ്യക്തമാക്കണമെന്നും ജയരാജന്‍ ആവശ്യപ്പെട്ടു. 

ഡമ്മി പ്രതികളെയാണ് പൊലീസ് പിടികൂടിയതെന്ന് പറഞ്ഞ കോണ്‍ഗ്രസുകാര്‍ തിരിച്ചറിയല്‍ പരേഡ് കഴിഞ്ഞ് യഥാര്‍ത്ഥ പ്രതികളാണ് അറസ്റ്റിലായതെന്ന് മാറ്റിപ്പറഞ്ഞു. സി.പി.എമ്മിന് മാറ്റിപ്പറയേണ്ടി വന്നില്ല. പാര്‍ട്ടി അന്വേഷണം പാര്‍ട്ടി ഭരണഘടന അനുസരിച്ച് നടത്തും. അക്കാര്യം പരിശോധിച്ച ശേഷം മാധ്യമങ്ങളെ അറിയിക്കും. കോടതി വിധിയില്‍ സി.പി.എം ജില്ലാ നേതൃത്വത്തിന്റെ പങ്കിനെ കുറിച്ച് പരാമര്‍ശം ഉണ്ടോ എന്ന് അറിയില്ല. ഉണ്ടെങ്കില്‍ അതിനെ നിയമപരമായി നേരിടുമെന്നും ജയരാജന്‍ അറിച്ചു.