പതിറ്റാണ്ടുകളായി വലിയ പ്രതിസന്ധി നേരിടുന്ന മൂന്നാറിലെ ഗതാഗതക്കുരുക്കിന് പരിഹാരമായി ട്രാഫിക് പരിഷ്ക്കാരങ്ങള്‍ക്ക് തുടക്കം കുറിച്ച്‌ മൂന്നാര്‍ പൊലീസ്‌. മൂന്നാര്‍ ഡിവൈഎസ്പിയുടെ നേതൃത്വത്തിലാണ് ഗതാഗതക്കുരുക്ക് നിയന്ത്രിക്കുന്നതിനാവശ്യമായ നടപടികള്‍ ആരംഭിച്ചിരിക്കുന്നത്.

വരാനിരിക്കുന്ന നീലക്കുറിഞ്ഞി വസന്തത്തിന് മുന്നോടിയായി ട്രാഫിക് നിയന്ത്രണം ഏര്‍പ്പെടുത്തിയില്ലെങ്കില്‍ ഉണ്ടാകാന്‍ പോകുന്ന വലിയ പ്രതിസന്ധിക്കെതിരെ പ്രതിക്ഷേധവുമായി നാട്ടുകാരും ടാക്സി ഡ്രൈവര്‍മാരും രംഗത്തെത്തിയിരുന്നു. ഇതേ തുടര്‍ന്നാണ് മൂന്നാര്‍ ഡിവൈഎസ്പിയുടെ നേതൃത്വത്തില്‍ ടൗണില്‍ ആവശ്യമായ ട്രാഫിക് പരിഷ്കാരങ്ങള്‍ നടത്തുവാന്‍ തീരുമാനിച്ചിരിക്കുന്നത്. ഇതിന്റെ ഭാഗമായി ടൗണിലെ റോഡിനെ രണ്ടായി തിരിച്ച്‌ ട്രാഫിക്ക് ഐലന്റുകള്‍ സ്ഥാപിച്ച്‌ തുടങ്ങിക്കഴിഞ്ഞു.

ഏറെ തിരക്കുള്ള മൂന്നാര്‍ അടിമാലി റൂട്ടിലാണ് ഐലന്റുകള്‍ സ്ഥാപിച്ച്‌ തുടങ്ങിയിരിക്കുന്നത്. ഇതോടെ ഇടയ്ക്കുനിന്നും വാഹനങ്ങള്‍ സിഗ്നല്‍ തെറ്റിച്ചുകയറി ഉണ്ടാകുന്ന ഗതാഗതക്കുരുക്കിനടക്കം പരിഹാരമായിരിക്കുകയാണ്. എന്നാല്‍ ട്രാഫിക് ഐലന്റുകള്‍ സ്ഥാപിച്ചിട്ടുണ്ടെങ്കിലും സ്വകാര്യ ബസ്സുകളുടെയടക്കം അനധികൃത പാര്‍ക്കിംഗും, റോഡിന്റെ ഇരുവശത്തും അനധികൃതമായി പ്രവര്‍ത്തിക്കുന്ന ചില കടകളും നീക്കം ചെയ്യാതെ ഗതാഗതക്കുരുക്കിന് പരിഹാരം കാണാന്‍ കഴിയില്ലെന്നാണ് നാട്ടുകാരുടെ ആക്ഷേപം.