അഞ്ഞൂറിലധികം സിനിമകള്‍ പൂര്‍ത്തിയാക്കിയ ഇന്ദ്രന്‍സ് ഫഹദ്ഫാസില്‍ അടക്കമുള്ള യുവതാരങ്ങളോട് മല്‍സരിച്ചാണ് മികച്ച നടനുള്ള പുരസ്‌ക്കാരം സ്വന്തമാക്കിയത്. അതുകൊണ്ടാണ് താനൊരു പുതുമുഖമാണെന്ന് ഇന്ദ്രന്‍സ് അവാര്‍ഡ് ലഭിച്ച ശേഷം പ്രതികരിച്ചത്. ഒരു തയ്യല്‍ക്കാരനായ ഞാന്‍ സിനിമയിലെ ഓരോന്നും പഠിച്ചുവരുകയാണ്, അതിനാലാണ് അവാര്‍ഡ് കിട്ടാന്‍ വൈകിയതെന്നും അപ്രതീക്ഷിതമായി കിട്ടിയതില്‍ സന്തോഷമുണ്ട്. മാധ്യമപ്രവര്‍ത്തകനായ വി.സി അഭിലാഷ് സംവിധാനം ചെയ്ത ആളൊരുക്കം എന്ന സിനിമയിലെ ഓട്ടംതുള്ളല്‍ കലാകാരനെ അവതരിപ്പിച്ചതിനാണ് ഇന്ദ്രന്‍സിന് അവാര്‍ഡ് കിട്ടിയത്. 2013ല്‍ അപ്പോത്തിക്കിരിയിലെ അഭിനയത്തിന് മികച്ച സഹനടനുള്ള പുരസ്‌ക്കാരം ലഭിച്ചിരുന്നു.

സിനിമയ്ക്ക് വേണ്ടി ഓട്ടന്‍തുള്ളല്‍ പരിശീലനം നടത്തിയിരുന്നതായി ഇന്ദ്രന്‍സ് പറഞ്ഞു. പലപ്പോഴും കയ്യും കാലും വഴങ്ങില്ലായിരുന്നു. പിന്നെ സിനിമയിലെ ഷോട്ടുകള്‍ക്ക് വേണ്ടിയുള്ള കാര്യങ്ങള്‍ പഠിച്ചു. അവാര്‍ഡ് ഒരുവിധത്തിലും തന്നെ ബാധിക്കില്ലെന്നും താരം പറഞ്ഞു. ബഹളമില്ലാത്ത, ജീവിതത്തോട് ചേര്‍ന്ന് നില്‍ക്കുന്ന സിനിമയാണ് ആളൊരുക്കം. ഇത് പ്രേക്ഷകരെ എവിടെയെങ്കിലുമൊക്കെ നൊമ്പരപ്പെടുത്തും. സംവിധായകന്‍ മാധ്യമപ്രവര്‍ത്തകനായത് കൊണ്ട് വളരെ സഹായമായിരുന്നു. കഥാപാത്രത്തിന്റെ നോട്ടവും ചലനവും പോലും അദ്ദേഹം അഭിനയിച്ച് കാണിച്ചു. അത് വലിയ സഹായമായിരുന്നെന്നും ഇന്ദ്രന്‍സ് പറഞ്ഞു.

തിരുവനന്തപുരം കുമാരപുരത്തെ വീട്ടില്‍ കുടുംബാംഗങ്ങള്‍ക്ക് ഒപ്പമിരുന്നാണ് ഇന്ദ്രന്‍സ് അവാര്‍ഡ് പ്രഖ്യാപനം കണ്ടത്. മണ്‍ട്രോതുരുത്ത്, ദൃഷ്ടാന്തം അങ്ങനെ നിരവധി സിനിമകളില്‍ ശ്രദ്ധേയമായ വേഷം അദ്ദേഹം ചെയ്തു. മകനെ തേടുന്ന പപ്പുപിഷാരടി എന്ന കഥാപാത്രമാണ് ആളൊരുക്കത്തില്‍ താരം അവതരിപ്പിച്ചത്.