കൊച്ചി കേന്ദ്രീകരിച്ച് 200 കോടിയോളം രൂപ കൊള്ളപ്പലിശയ്ക്ക് നല്‍കിയ ബ്‌ളേഡ് മാഫിയാ സംഘം പിടിയിലായി. തമിഴ്‌നാട് സ്വദേശികളായ സിത്താരസ്, രാജ്കുമാര്‍, ഇസക്ക് മുത്ത് എന്നിവരെയാണ് പൊലീസ് അറസ്റ്റ് ചെയ്തത്. സിനിമാ നിര്‍മാതാക്കള്‍ക്കും വ്യവസായികള്‍ക്കും വ്യാപിരികള്‍ക്കുമാണ് അനധികൃതമായി പ്രവര്‍ത്തിക്കുന്ന സംഘം പണം നല്‍കിയിരിക്കുന്നത്. വാങ്ങിയ പണത്തിന് കൊള്ള പലിശ വാങ്ങുന്നെന്ന പരാതിയെ തുടര്‍ന്നാണ് പ്രതികളെ അറസ്റ്റ് ചെയ്തത്. ചെന്നൈയിലുള്ള മഹാരാജന്‍ എന്നയാളാണ് തങ്ങളുടെ മുതലാളിയെന്ന് ഇവര്‍ പൊലീസിന് മൊഴി നല്‍കി. പള്ളുരുത്തിയിലെ ഒരു റിസോര്‍ട്ടില്‍ നിന്നാണ് ഏജന്റമാരായ മൂന്ന് പേരെ പൊലീസ് അറസ്റ്റ് ചെയ്തത്.

ആശുപത്രികള്‍ക്കും സിനിമാ നിര്‍മാതാക്കള്‍ക്കും വന്‍കിട വ്യവസായ സ്ഥാപനങ്ങള്‍ക്കുമായി 200 കോടിയോളം രൂപ സംഘം സംസ്ഥാനത്ത് പലിശയ്ക്കു നല്‍കിയിട്ടുണ്ടെന്നാണ് പ്രാഥമിക അന്വേഷണത്തില്‍ കണ്ടെത്തിയത്. ഒരു കോടി രൂപയ്ക്ക് 20 ലക്ഷം രൂപ വരെ ഇവര്‍ പലിശ ഇനത്തില്‍ മാത്രം വാങ്ങിയിട്ടുണ്ട്. സംശയത്തിന് ഇടനല്‍കാതിരിക്കാന്‍ ബാങ്ക് വഴിയായിരുന്നു ഇടപാടുകള്‍. ആര്‍ബിഐ ചട്ടങ്ങള്‍ പാലിച്ചിട്ടില്ലെന്നും മീറ്റര്‍ പലിശ ഈടാക്കിയെന്നും കണ്ടെത്തിയതിനെ തുടര്‍ന്നാണ് അറസ്റ്റ്. മഹാരാജനെ അറസ്റ്റ് ചെയ്യാന്‍ കേരളാ പൊലീസ് തമിഴ്‌നാട്ടിലേക്ക് തിരിച്ചിട്ടുണ്ട്. ഇയാളെ ചോദ്യം ചെയ്താലേ കുടുതല്‍ വിവരങ്ങള്‍ ലഭ്യമാകൂ.

കൊച്ചിയിലെ കൊട്ട്വേഷന്‍- ഗുണ്ടാ സംഘങ്ങളുടെ സഹായത്തോടെയാണ് സംഘം പ്രവര്‍ത്തിക്കുന്നതെന്നും പൊലീസിന് സൂചന ലഭിച്ചിട്ടുണ്ട്. പ്രാദേശിക നേതാക്കളുടെ പിന്തുണയും ഏജന്റുമാര്‍ക്ക് ലഭിച്ചിട്ടുണ്ട്. മഹാരാജന്‍ നേരിട്ട് കൊച്ചിയിലെത്തി പഞ്ചനക്ഷഹോട്ടലുകള്‍ കേന്ദ്രീകരിച്ചും ഇടപാടുകള്‍ നടത്തിയതായും റിപ്പോര്‍ട്ടുകളുണ്ട്.