നടിയുടെ മെഡിക്കല് റിപ്പോര്ട്ട് ദിലീപിന് നല്കണം, പ്രത്യേക കോടതി ഉള്പ്പെടെ വേണമെന്ന നടിയുടെ ഹര്ജി പരിഗണിക്കും
കൊച്ചിയില് നടിയെ ആക്രമിച്ചതിന്റെ ദൃശ്യങ്ങള് എട്ടാംപ്രതി ദിലീപിന് നല്കുന്ന കാര്യത്തില് അന്തിമതീരുമാനം ഹൈക്കോടതി എടുക്കുമെന്ന് എറണാകുളം പ്രിന്സിപ്പല് സെഷന്സ് കോടതി. വിചാരണയുടെ ഭാഗമായി പ്രതികളെ ഇന്ന് കോടതിയില് ഹാജരാക്കിയപ്പോഴാണ് കോടതി ഇക്കാര്യം വ്യക്തമാക്കിയത്. അതേസമയം നടിയുടെ മെഡിക്കല് പരിശോധനാ റിപ്പോര്ട്ട് ദിലീപിന് കൈമാറണമെന്ന് കോടതി നിര്ദ്ദേശിച്ചു. കേസിന്റെ വിചാരണ ഈമാസം 28ന് തുടങ്ങും. ദൃശ്യങ്ങള് ആവശ്യപ്പെട്ട് ദിലീപ് ഹൈക്കോടതിയെ സമീപിച്ചെങ്കിലും ഹര്ജി തള്ളിയിരുന്നു. താരത്തിന് വീണ്ടും കോടതിയെ സമീപിക്കാവുന്നതാണ്. ദൃശ്യങ്ങള് ദുരുപയോഗം ചെയ്യാന് സാധ്യതയുള്ളതിനാല് ദിലീപിന് കൈമാറരുതെന്ന് പൊലീസും പ്രോസിക്യൂഷനും കോടതിയില് ആവശ്യപ്പെട്ടു.
അതേസമയം വിചാരണ പ്രത്യക കോടതിയില് നടത്തണമെന്ന് ഉള്പ്പെടെ നാല് ആവശ്യങ്ങള് ഉന്നയിച്ച് ആക്രമണത്തിനിരയായ നടി കോടതിയില് പ്രത്യേക ഹര്ജി നല്കി. വനിതാ ജഡ്ജി വേണം കേസ് കേള്ക്കാന്, വിചാരണ രഹസ്യമായി നടത്തണം, അതുപോലെ അതിവേഗവും വേണമെന്നും പ്രത്യേക അഭിഭാഷകന് മുഖേന നല്കിയ ഹര്ജിയില് പറയുന്നു. നടിക്കായി സര്ക്കാര് അഭിഭാഷകനെ നിയമിച്ചതിനാല് അദ്ദേഹം വഴി ഹര്ജി നല്കാന് കോടതി നിര്ദ്ദേശിച്ചു. സര്ക്കാര് അഭിഭാഷന് ഉള്ളതിനാല് മറ്റുള്ളവര് വഴി നല്കുന്ന ഹര്ജി പരിഗണിക്കാനാവില്ലെന്നും പ്രിന്സിപ്പല് സെഷന്സ് കോടതി അറിയിച്ചു.
സാധാരണ ഇത്തരം കേസുകളില് രഹസ്യവിചാരണയാണ് നടത്തുന്നത്. കേരളത്തില് മുന്ചീഫ് സെക്രട്ടറി നളിനിനെറ്റോയെ മുന്മന്ത്രി നീലലോഹിതദാസന് നാടാര് പീഡിപ്പിക്കാന് ശ്രമിച്ചെന്ന കേസിലാണ് ആദ്യമായി രഹസ്യവിചാരണ നടന്നത്. കോടതി നടപടിക്രമങ്ങള് ഉള്പ്പെടെയുള്ള കാര്യങ്ങള് അതീവരഹസ്യമായായിരിക്കും നടക്കുക. മാധ്യമങ്ങള്ക്ക് കോടതിയില് പ്രവേശനം ഉണ്ടായിരിക്കില്ല. റിപ്പോര്ട്ട് ചെയ്യുന്നതിനും വിലക്കുണ്ടായിരിക്കും രഹസ്യവിചാരണയ്ക്ക്.
https://www.facebook.com/Malayalivartha
