മസാജിംഗിനിടെ യുവതിയുടെ ഫോട്ടോയെടുത്ത് വാട്ട്‌സ് ആപ്പില്‍ അയച്ചു കൊടുത്ത യുവാവ് രണ്ട് മാസത്തിന് ശേഷം ആപ്പിലായി. തലശേരി മട്ടന്നൂര്‍ റിനീഷ് ഹൗസില്‍ റിനീഷാണ് (24) പിടിയിലായത്. കഴിഞ്ഞ നവംബറിലാണ് കേസിനാസ്പദമായ സംഭവം നടന്നത്. കോവളത്തെ ഒരു മസാജിംഗ് സെന്ററില്‍ ചെന്ന പാലക്കാട് സ്വദേശിനിയായ യുവതിയുടെ പരാതിയെ തുടര്‍ന്നാണ് റിനീഷിനെ അറസ്റ്റ് ചെയ്തത്.

മസാജിംഗ് കേന്ദ്രത്തിലെ ജീവനക്കാരി യുവതിയെ മസാജ് ചെയ്യുന്നതിനിടെ, അവരുടെ സുഹൃത്തായ റിനീഷ് അവിടെ എത്തിയിരുന്നു. അതിനിടെറിനീഷ് യുവതിയുടെ ഫോട്ടോ മൊബൈല്‍ ഫോണില്‍ പകര്‍ത്തുകയായിരുന്നു. കാമറയുടെ ഫ്‌ളാഷ് മിന്നിയതായി യുവതിക്ക് സംശയം തോന്നിയിരുന്നു. എന്നാല്‍ വെറും തോന്നലാകാമെന്ന് കരുതി അത്ര കാര്യമാക്കിയില്ല.

അടുത്ത ദിവസം യുവതിയുടെ വാട്ട്‌സ് അപ്പില്‍ മസാജ് ചെയ്യുന്ന ഫോട്ടേകള്‍ വന്നപ്പോഴാണ് ഫോട്ടോയെടുത്തതായി യുവതിക്ക് ബോധ്യമായത്. റിനീഷിന്റെ മൊബൈല്‍ ഫോണ്‍ പരിശോധിച്ച് ഇക്കാര്യം ഉറപ്പിച്ച യുവതി സിംഗപ്പൂരിലുള്ള ഭര്‍ത്താവിനെ വിവരം ധരിപ്പിച്ചു. കഴിഞ്ഞ ദിവസം ഇദ്ദേഹം കേരളത്തിലെത്തിയശേഷം കോവളം പൊലീസ് സ്‌റ്റേഷനിലെത്തി പരാതി നല്‍കി. ഇതോടെ കണ്ണൂരിലേക്ക് കടന്ന പ്രതിയെ എസ്.ഐ. അജിത്കുമാറിന്റെ നേതൃത്വത്തില്‍ അവിടെ നിന്ന് പിടികൂടി ഫോണ്‍ കസ്റ്റഡിയിലെടുത്തു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.