റോഡ് ഗതാഗതം സുഗമവും അപകടരഹിതവുമാക്കുന്നതിനു വേണ്ടി ആവിഷ്ക്കരിച്ചിട്ടുള്ള നിയമങ്ങളാണ് ട്രാഫിക് നിയമങ്ങൾ. കാൽനടക്കാരും വാഹനങ്ങൾ ഓടിക്കുന്നവരും ഈ നിയമങ്ങൾ പാലിക്കാൻ ബാധ്യസ്ഥരാണ്. എന്നാൽ പലരും നിയമങ്ങൾ അറിയാമെങ്കിലും അത് പാലിക്കാറില്ല. അങ്ങനെയുള്ളവരെ കളിപ്പിച്ച് പഠിപ്പിക്കാനൊരുങ്ങുകയാണ് കേരളാ പൊലീസ്. റോഡിലെ നിയമങ്ങൾ പഠിപ്പിക്കാൻ പുതിയ ആപ്പുമായാണ് കേരളാ പൊലീസ് എത്തിയിരിക്കുന്നത്.

നല്ല ഡ്രൈവിങ്ങ് ലക്ഷ്യമാക്കിക്കൊണ്ട് ട്രാഫിക് ഗുരു എന്ന ആപ്പാണ് ഇതിനായി പൊലീസ് അവതരിപ്പിക്കുന്നത്. ഗെയിമിൽ ലോറിയോ കാറോ ബസ്സോ തെരഞ്ഞെടുക്കാം. കളിയിൽ എല്ലാ നിയമങ്ങളും അനുസരിക്കേണ്ടതുണ്ട്. അല്ലെങ്കിൽ മത്സരത്തിൽ തോൽക്കും. ഇഷ്മുള്ള കാലാവസ്ഥയിൽ ഓടിക്കാം. കുണ്ടും കുഴിയുമുള്ള റോഡ് മുതൽ നിരപ്പായ ഹൈവേ വരെ ആപ്പിലുണ്ട്. ഡ്രൈവ് ചെയ്യുമ്പോൾ കേൾക്കാൻ പാട്ടുകൾ തെരഞ്ഞെടുക്കാം. ഓവർടേക്ക് പാടില്ല. ഇൻഡിക്കേറ്റർ ഇടേണ്ട സ്ഥലത്ത് ഇൻഡിക്കേറ്റർ ഇടണം. കളിയിൽ മിടുക്കരാണെന്ന് തെളിയിച്ചാൽ കേരളാ പൊലീസിന്റെ വക സമ്മാനങ്ങളുമുണ്ട്. സിഡ്കോയും റെയിൻ കൺസേർട്ടും ചേർന്നാണ് ആപ്പ് വികസിപ്പിച്ചിരിക്കുന്നത്. ഈ ആപ്പ് പ്ലേ സ്റ്റോറിൽ നിന്നും ഡൗൺലോഡ് ചെയ്യാവുന്നതാണ്.